Burma Ram Feh Dan Ding Part 85

In Tribute To Dr.Do Sian Thang


Falam khaw hrang ih hna tuan tha bik zo a si tiin in hril tir bang seh la,Zomi Theological College ih an principal hlun Dr.Do Sian Thang ka ti ke.Falam peng mi hman si lo pi in ZTC le Lalun project ihsi hna a tuan pawl ka ruah tik ah mak ka ti law law ih upat tlak ka ti a si..Amah thawn hin bul pak cun kan thei aw lo nan a hna tuan that dan pawl ka theih nak hi kum 6-7 lai lawng (pension ih a cawlh zik hrawng ah ) a si ding.

Amah hi Teddim peng mi Mualbem khua suak a si ih Mualbem primary school ah primary tlawng a kai.Cule Maymyo tla ah high school kai in Mandalay university ihsin BSc a ong.Cui thluh ah Insein ih MIT ah a kai ih Philippines ah tla kai in theology in Singapore in doctorate a ngah.

Mualbem ah Baptist pastor tla a tuan dah.Falam ZTC ah 1981 ihsin lecturer in a thok ih a term a cem zik lam ah term 3 lai ( kum 12 ) cu ZTC principal ah a tuan. ZTC a tuan lai ah hin a hmin a thatnak a phun phun a um.college sum a ten ren ih tlawngkhen (thirte) lettama pawl ih an titlak pang ih an sar paih lo m pawl tla a mah in a sar ih tha ten a ret.Can tampi cu nikhat ah nazi 17 lai college hrang ah a  tuan tiin a student hlun pakhat in i sim.

Miphun ( Teddim mi a si nan ) a thlei dang lovi,mi natsik a nei lo.Teddim peng pawl ih dinmi cathiam pawl a phun phun khal ah a tel ve.Teddim peng mi si cing in Falam peng Falam khua hrang ah hna na sa zet in a tuan.ZTC compound ah a tuan lai ah building tha tha thuah hnih thuah thum thluh 3 le building dang tampi a sak ZTC cu Chin state ih Bible tlawng hlun le tum bik a si mi cu a tum tir sin sin.

ZTC hang ah ni khat khat ah bomnak funding duh vek in a um nawn lo dng ti a theih cia ruang ah Lailun project a tuah ih ZTC hrang ah acre tam zet a lei.Sum pai ah a dik tuk ih,a staff pawl sumpai ih dik deuh lo hrang ah cun a hrehum zet ding ti a si.Lailun ah hin grape hmun lawng si lovin tilva vulh nak,ngah cawm nak,hmun tha tha tampi a tuah.Zoh tha a si zia an rel theu ih kei tla cun ka hmu dah lo.Mi tampi in tulai ah picnic fehnak ding tlaah an hmang ring ring.

Hi tukih hna a tuan thei ih a hlawhtlin nak pakhat cu a nupi in a bom tuk ti a si.Fate an nei lovi,tlawng ta hmuah hmuah cu a fa le an si mai.Hna tuan tul lai ah tlawng ta hmuah hmuah hi zarh khat ah ni khat cu Lailun project ah hna a tuan tir theu.A thei thiam duh lo hrang ah cun an duh lo nasa fam teh.A si nan ZTC tlawng ih kai duh si na na na hrang ah cun himi ih hna an rak tuan cu an lung a kim thluh leh ko ding.Tlawng saya pawl a duhsak tuk ruangah  ramdang ah further study ding in a thlah. A si nan kan Laimi fam cu hrekkhat cu Burma ah an kir duh nawn lo.

Tu tla ah cun ZTC ah computer pawl lawng hman si lovi internet tiang in a um zo a si.ZTC compound hi Falam khua ih building tha bik um nak khal ah a  rung cang. Lailun project tuah nak le lamzin cek nak ah Falam ih Baptist kohhran le member pawl tla in hna an rak tuanpi tha zet a si.

Dr.Do Sian Thang,Falam khua in lungawi thu kan lo sim ih kan lo nghilh dah lo ding.

(Visited 37 times, 1 visits today)
%d bloggers like this: