Burma Ram Feh Dan Ding Part 84

Hmin Lem Thawi Cahram(Article) Ngan


Burma ram ah nitin suak thuthangca pawl tla tuah theih a si zovi,April thla ni khat ih an suah ah khan pakhat tla cu copies 80,000 an rial mi cu sun hlan ah Rangoon ah an zuar thluh mai ti a si.Nitin canchinbu a um rual rual in ca ngan tu khal an tam ding ih a cang cang cun ca ngan tu pawl in an hmin ngai ngai ngan duh lovin hmin lem in an ngan theu ding.Himi hi leilungtlun hmun dang dang khal ah a um ko.

Cule thuthangca ih hmin lem ih ngan kan rel hlan ah hmin lem ih ca kuat thu hla ngan hmaisa seh la.Politic khal ah thil dang khal ah kan duh lo mi pawl sawisel nak ah maw ti hmin siat tir nakah maw hmin lem ih ca kuat awk hi a um theu ih,hi khal hi thil mak tuk cu a si lo.

History cu a tha khal a sia khal ngan a tul ih ngan hrehum pawl khal cu  ngan a tul ko.Cumi lak ah paklhat kei mai hrang ih thil um dah cu 1973 hrawng ih thil thleng a si.Khatihlai ih Falam politic ah Pu Kam Lian Buai kha hmun khat a si ih,cu le ka pa Capt.Tai Thio le Pu Nung Lian pawl kha hmun khat an si.Cumi tik ah cun kan nih lam khan Pu Kam Buai par ih kan lungkim lo nak central ( Rangoon ) ih thlen kan tum.Kei cun kei mai hmin in kan ngan ding,a tul le thawng (jail )khal ah ka tang mai ding ka ti ih,ka pa le Pu Nung Lian cun an lung a kim.Cule kan nganih ka hmin in ( hmin lem ih ngan ding cu ka duh lo law law ) envelope ah kan thun ih post office ah kan thlak.Himi hnu ah ka pa le Pu Nung Lian cun an ngaih a tha lovi,post office ( Falam Dawr hlun ) ah an va feh ih,kan ca cu ca ik tampi lak ihsin an hawl ih,an hmuh hnu ah an lak ih an thlek.Himi ka ti duh mi cu kei cun ti ceng ceng ah cun hmin lem si lovi hmin ngai ih ti a si ka duh law law.

Mizoram ah kum 19 sung thuthang ca ka tuah leh ih,ka thuthangca Zoeng khal ah Hnehtu daily khal ah vawi khat hman hmin lem in ka ngan dah lo.Thuthimnak ah Hnehtu ah Valte timi in ( amah ngai cu Vanneihtluanga a si ) article tha tha a run ngan theu vi,cumi cu hmin lem si lovin pen name ah a cang.Ka theihthiammi hrek khak pawl in hmindang phuahaw aw in ( Pen name ih ngan cu an ngan ring ring) ka papers pawl ah ngan an tum theu nan,nan duh le nan mai hmin ngai in ngan uh,cu lo cun ka lo suah sak lo ding ak ti theu.

Tulai interner email san ih Delhi ka um hnu kum 11 sung ah hmin lem thawi sawisel ( tuhlan ih Lailun group mail ah  ah ) nak hmun hnih ihsin tum 3 tum 4 cu ka tong ko.Kei khal famkim lo zet thil tisual thei ka si kovi.Leh lamah cun kei mai lam ihsi lawng in mi dang hi ka hmin ih ka sawisel ngam le ka sawisel law law kei,cu lo ah cun hmin lem cun mipi theih ding ah  ka ngan ldah o ding ti hi ka tum tah mi cu a si.

%d bloggers like this: