Burma Ram Feh Dan Ding Part 83

Aizawl LCF kum 20 A Kim Ta

Pathian zangfahnak in kan run dam cio vi,cuti cun tui sun 4-3-13 ni ah hin Aizawl ih Lai Christian Fellowship kum 20 cam tla kan thleng thei ta.Pathian thangthat in um ko seh.LCF thuhla thei zet na na na cu LCF a um hi thansonak thawi khal ih a pehawk ruang ah tui tum ah run ngan seh la.

Kan dung ah ka ngan zo,ka hrang ih ni thupibik 4 ka ti nak ah a siar cun nan thei ding ih kha tawk ah khan LCF kan rak ding thu tla ka ngan..Kei kha 1990 Fehruary thla zarh hnih nak  ih rundamnak ngah ka si.Khalai ah Aizawl ah Pu Hrang Nawl,Dr.Sang Kung,Saya Cung Nung le Pu Hram Tlai pawl ih hovin LCF hi kan rak nei zo.Kei cu ka hrinthar hlan khal ah hrinthar hnu khal ah cuti tluk in ka tel pi lo.Hrinthar hnu ah cun EC member pakhat cu ka si ko.

Cule LCF khan Saya Cug Nung kha evangelist ah kan rak la ih,1993 kum tir lam ah khan a nih kha tlun a duh thlang.Cui tlun ah kan Haka Thlangtlang pawl lak ah thenawknak a rung um.Dr.Sang Kung le Pu Hram Tlai kha an tang tlang ih,a dang pawl hmuah hmuah an tang tlang.Himi lai ah hin kan nih khal Falam tong ih khawmnak tuah kan rak tum zawk rero thlang.

Kei khan a hlan kum 1992 hrawng ah maw si U Sui Ling ( RIP ) tla in khawmawknak tuah uh  i ti nan a dang dang ih thenawk ka duh lo ka rak ti.Kei le Saya Cung Nung in kan telpi nan Falam pawl Dr.Sang Kung inn ih khawaw cu a khawm mi 60 lai ah mi 10 lai hrawng kan si theu.1993 kum tir ih kan unau pawl an thenawk tik ah cun a dang tei kan khawmawk a tul ti ka fiang nasa.Saya Cug Nung khal in i duh pi ih,Haka Pu Hram Tlai khal in milai pawl Pathian biaknak ih na ko khawm thei ding a si tak ah khawmawk nak tuah mai aw i ti.

Kei kha Mizoram ah kha tilai ah Zoeng Magazine le Hnehtu daily ka nei zovi,Burma tong in khawmnak a tuah in ti ding ti cu leh lam ah cun ka phang ko.A si nan kan mi pawl an khawmaw si lo tik ah cun tuah a tul ti cu a fiang nasa si.Cule hj tawk ah Pu C.Sang Ci hi lungawi thu sim ka duh.Sum le pai cun i bom ciamco dah lo nan Mizoram ih Zoeng magazine ka tuah ngam nak khal ka thinlung tei a mah ka rinsan ruang khal ah a si ih,cuti vek ih khawmnak keimah hmang ih Pathian ih in dinsak ding ih ka ngamnak khal a mah thinlung tei ka rinsan nak ruang ah a si tho tho.A tlun ah lungawi thu ka sim a si.

Cuti cun khawmawknak tuah ding in kan tawlrel zawk rero ih,Haka unau pawl cun suak uh hlah uh,tui LCF ah Falam tong nan hmang thei a si si tiin  Monica pa Pu Rual Uk, tui USA ih um in i ti.Kei cun Cung Nung thawn kan um cing hman in kan Falam pawl an rung khawm duh lo pi,cui ruang ah a dang tei kan khawm a tul ko ka ti.A nih cun,si seh,nang na um ah cun kan buai cuang lo ding a tha ko in ti.Cutikah Haka tong hmang cu LCF I tisehla kan ti ih Falam tong hmang cu LCF II si seh kan ti.

Cuti cun khawm thawk nak ding ni kan ruat ih,April ni 4,1993 khi April thla ih Sunday hmaisa bik a si tik ah cun himi ni ah Pu Sang Ci inn ah khawmaw kung tiin kan rel.Cumi ni ah cun mi 42 cekci kan khawm aw aw.In thihsan zo mi ka nu le ka pa Aizawl ih an rung tlawn tum a  si ih an tel ih,in thihsan zo mi ka nau Siang Em a um.Cule tui USA ih um ka nau Tha Nei Luai ih nupi Ceceng le a fapa  Zalan an um.Cule ka nau Sui Thawn tei nupa an si.Tui Malaysia ih um kan nau Reng Mang a um ih tui saya Josiah Mang Lian Tlung tla a um in ka thei,kan inn ih a um lai ah a  si.Mi 1 cu ka nghilh ding ih,cuti cun cumi kan thawhni ah kan ni sung ih sin mi 10 kan thok.Cule sung kua zawng ih a tambiks sang tu cu Pu Kap Thio tei sung,a mah cu a tel lo nan Saya Khaw Nei Khuai hovin mi 7 an si.Kan sung kua 2 in mi 17 kan si  ,.Khami ni ah Haka Thlantlang mi 12 in in khawm pi ih,Falam mi midang cu 13 an si.

Cumi ni hnu thla 2 nak tla ah cun a  khawm hi mi 300 lai kan si mai ih Pu Sang Ci building pi ih a hnuai ta bik cu man nei in kan sang law law a si.Tu tiang LCF hi a rung um thei ih,tulai tla ah cun mina zoh nak ah le mithi ruak phurh sohnaak tla ah cun an tuan tha zet ih lungawi a um nasa.Aizawl LCF hi a tul tawk tiang ih Pathian ih a kaihhruai ding ah thla kan cam cio a tul ko.

%d bloggers like this: