Burma Ram Feh Dan Ding Part 81

Bawn Thur ( Tomato ) cin in len a theih !

Tui tum Pu Thawm Hlei Mang,Switzerland ih Falam a tlawn thu hla pawl ih siar nuam bik ka ti mi ah a  cang ding ih,cu cu Lailun project a va zoh thu a si.Pa Thawm ih himi project hrang ih sum tam zet a thawh tla hi a lungawi um nasa.Cule himi project rak tuah tu,Falam khaw hrang ih hna tuan tha zet ih ka hmuh ring ring mi ZTC tlawngpi  principal Dr.Do Sian Thang tla upat nak ka pe a si.A thu hla hi rem cang ah a dang ten kan ngan leh ding.

Falam peng ih khua 2,Lati le Kulzam cun bawn thur,khasuan rang leh khasuan sen cing in an len phah ih an khua khal ah motor cycle 50 tlun  a um phah ti ka theih nak a rei zo,uar um ka ti ih tuan tha ka ti.Zohthim tlak cawn tlak an si nasa.An ram vek ruah tla cun kan nih Tlairawn seh vel tla cu kan ram a tha tuk fam teh.

Ram nei lo cing ih ruahnak neih le taimak ruang ih hlawh tling thu pakhat ngan leh seh la.Hihi ziang tik ah simaw ka ngan zo,Chin ram thu a si.An ram ah mi an tam tuk ih,leiram neih a har tuk.Cu lai ah nupa pakhat ih co mi lei cu a lung tuk ih thlai cin ding in feet 3 vuak vel an laih hnu ah peng 1 lai ih hlat nak ih lei pangngai cu an nupain an phurih,an laih mi ah an silh.cuti cun thei kung an cing.An mah vek in midang in ti an tum nan an paih lo ih an tthulh thluh.Kum khat ah khur 10,kung 10 phun nak an lai theu.An tikcu neih mi dang ah ei hawl in an hlawh aw theu.Himi ka siar tik ah hin an phun pek mi pawl cu kum 10 lai ih upa an si ih thei an rah thlang.A si nan an nupa cun khur dang an lai bet thotho.Himi ruah cun Laitlang cun lei tha kan nei tam nasa a si.

Cule bawn thur ah kan kaat ding.Holland ram ah tulip pangpar in kum khat ah $ million 900 lai an ngah ti kan ngan zo.Tu cu an  ram  khaw sik tuknak ah  bawnthur an cing ih an len dan a si ding.Greece ram cu Holland hnak in let 3 lai in a tum ih,Italy ram cu Holland hnak in let 8 lai in a tum.Greece le Italy khal in bawn thur an cing ciamco nan ram fate zet Holland cun Italy hnak hman in let 5 lai in an thar tam ih European Union ram pawl ah sum tampi la in an zuar theu.

Italy le Greece ah cun 1 square meter ( cu cu feet 3 vuak vel )ah kumkhat ah bawnthur kilogram 7 lawng an thar tir thei lai ah Holland cun 1 square meter ah kilogram 70 an thar thei ta ria e.Hi hi ziang dang hman a si lo,Greece le Italy cun kan mai cin dan vek ih an cin lai ah Holland cun green house sung ah tulai thiamnak sang bik thawi bawnthur hi an cin ruang ah a si.Hinah hin thanso nak ah thiamnak a tul tuk ti a lang.Falam peng thiamnak kan than dan ding kan ngan leh ding.

Burma Feh ah a  phun phun in kan ngan zo,apple cin ruang ih India ram Himachal Pradesh tlangpar khua 3 cu India ram khawte pawl ih a lian bik an si dan,Singapore cun ram nei lo cing ih senhri par ih sum tam zet an lak dan pawl tla.

Kan Lairam khal tu vek in kan farah ring ring lo ding.Amah lawng te hna tuan tam tai mak,tanrual,hotutha neih,capital neih,hmailam hrang ih hmuh kauhnak vision neih pawl a tul nasa.Lai khawte lam an thanso lawng ah Falam khua tla kan tuah tha thei ding.

%d bloggers like this: