Burma Ram Feh Dan Ding Part 80

Chin Ram Agriculture  ihsi Kan Thanso Dan Ding


Leitlun ah Switzerland ram khi tlangpar ih um sisi income tha bik nei pawl ih tel an si.An nih cu an lo ram hnak hman in an industry le tourism ihsin sum an ngah sawn.Lei tlun ih nazi tha bik pawl an tuah.Lo tuah,hmuan tuah le tilva vulh si,industry tum nei si lo vi leitlun ram lian pawl lak ih tel ban ram 2 cu Denmark le New Zealand pawl hi an si.Ka uar law law.Cule Iceland ram khi minung malte si si 200,000 lai lawng,ram lian zet,income tam zet mahte university nei thei an si ih an uar um zet la la.

Mizoram ah 1998 ih MNF a cozah an tuan pek ah khan Pu Zoramthanga cun Switzerland of the East ah kan cang tir ding a ti ih,a ram cu a thangso tir zet ko nan a tum mi cu a si lam lam lo.

Switzerland,Denmark,Iceland le New Zealand pawl cu kan tthim lo mai ke.A si nan ram a rung that ih kan tan tlan ih hna kan tuan that cun tu hnak cun ” khi tawk ah,khi tawk ah “kan um thei ve ding.Ka ngan dah zo,tui Falam lam ih kan hotu pakhat Pu Kap Tial cu England ih ca a zir lai kan dung lam kum 40 lai ah Mirang pa pakhat in nan tthil thing hman in ei cawk lo nan hmu thei a si si a rak ti ti a si.Cule ka ngan dah mi tho tho ah Falam peng ih then li then khat fang ih tum Singapore ram in kum khat ah senhri par ihsin $800,000 lai an hmu thei,thil dang ih sum an hmuh cu rel lo seh la.Netherlands ( Holland ) ram khi zinan company tumtuk Royal Dutch Oil company nei tu an si ih,cui tlun ah leitlun ih company tumbik 20 lai ih tel ban Phillips electronic company nei tu ram an si.Industry cu thu dang ka uar zet mi pakhat cu tulip pangpar an zuar nak ihsin 1970 hrawng ah khan kum khat ah $ million (maktaduai rori ) 900 lai an rak hmu thei.Kha tawk lai ah khan Holland hnak ih let 20 lai ih tum Burma ram cun ramdang ih a zawrh tam bik ( sum a ngah tamnak bik ) fangcang ihsin Holland ih pangpar man zat hman a rak hmu thei lo.

Kan ram a that cun kan theidum pawl ihsin jam tha tha kan tuah ding ih,kan farthling  turpentine ihsi a tuah thei mi  thil phun 50 lai ah phun 20 hman standard sang zet ih kan tuah thei cun kan lian zet tho tho ding.Burma Ram 79 ah India tlangpar khua 3 kha apple cinnak in India khawte in khaw lian bik an si phah ka ti zo.

Thlanglam Laitlang ah mau rua a tha tuk ih paper tuahnak khawl tha tha tla kan bun leh ding.Chin state hmun dang kan rel cun a kau tuk pang ding,Falam peng lawng rel phawt seh la.Kan ram ah tidai le a tha tuk,Lairal tlang Selawn ram tivek tla cu awl tei ceh ih cangdawl leilet ram tuah thei ding a tam tuk,market ding ah le Mizoram an naih si.Hmakphek,khasuan rang,khasuan sen cin hman in Kawl ( Lairawn ) vaih tul lo khawp ih lennak a suak thei.

Cui ruang ah Laitlang khal ah thli dai hawp phah in,lo le thildang kan tuah nak ih si Kawlrawn vaih tul nawn lo ding in kan tuah thei a tul.Tu hi Congthu khua tla ah inn 17 lai um in khaw thar an din ti ka thei ih ka lung a awi tuk.
Mirang in Be Honest and Work Hard an ti a si lo sawm,kan rin um ding ih kan taima ding,cuti cu ram tha kan nei mai ko ding.

%d bloggers like this: