Burma Ram Feh Dan Ding Part 79

Tlangpar Lo Le Hmuan Tuah Cing  In Thanso A Theih Maw?


Burma Ram Feh Dan Ding hi Part 80 ah kan titawp dingih,Rangoon ih Pastor Lal Tin Hrem in ca uk in tuahsak ding kan rak ti nan kan theh lam lam lovi,Part 100 tal cu kan thlen a tul ding a si hi.

Laimi hi a peh peh in kum 600-700 lai cu tlangpar ah kan rak um zo ding ih,tu khal ah tam zet kan um lai.Phairawn ih vaih fial aw zawk rero khal sehla ziangtik hman ih vai lo ding thawng tampi an um ring ring.Hi vek a si ruang ah tlangpar ih um cing in thanso nak,a hlei ce in lo le hmuan tuah cing in a  um thei ke maw ti hi kum tam zet ka rak ruah zawk rero mi a si.

American scientist pakhat,a hmin ka nghilh zo,cu missionary khal a si ih Philippines ah kum rei zet  a rak um.Philippines ih mipi pawl bom a duh ruang ah tlangpar lo neihdan thar a hmu suak.Hi hi a tawi zawng in SALT Agriculture an ti maw si,cu cu slope agriculture ti vek a si.Himi hi tlangpar ih terrace (cangdawl ) lo neih dan thawn a bangaw deuh lo.Himi ah cun tlangpar ah a phei zawng in thingkung leh thlai cin a si.Thuah khat nak ah banhla/hnahcang tla cing seh la a tlun lam thuah ahthurban/banthur tla a tluan ih cin a si ding hi cui tlun thuah ah vainim tla a si ding.Himi ih a  that nak cu ruah a sur tikih tlun lam ih si luang thla dawm pawl kha a hnuai lam thuah ih thlai pawl in an rak dang ih,dawm cu a lak in a laung lo.Cui tlun ah nai te te ih thlai le thei kung a phun phun cin a si tik ah thli ihsi tla in an dawm pawl an hlawm aw aw.Cu le cangdawl lo vek in laih a tul l ih,cang cim tla a um thei lo.

Ka theih dan vek a si ah cun himi thiamnak hi Saya Thang Tin Sum in Philippines ah a va zir ih a hnen ih sin Saya Tial Dum in zir in a tak in Lungpi ah  cun a tuah.Himi mithiam pa hi Mizoram chief minister Pu Lal Than Hawl khan 1997 lai ah khan maw si Mizoram ah a cah ih a mah thawn press mi pawl kan kawm maw aw.Cunah ka suh mi cu leitlun ram tampi na hmu zo vi,lo /hmuan nei cio cio tlangpar um pawl  cu hmunrawn um hnak in an lian sawn ti na thei dah maw ka ti ih,minute 2 hrawng a ruat aw ih thei lo a ti.Ka lung a kim nasa ko.A si nan kan nih cun tlangpar ih um lai kan Laimi pawl hi thanso nak,len tir nak kan ruah tho tho a tul ko.Himi ka ngan nak ah hin himi lo neih dan ka duh bik ka ti nak a si lovi,a phun phun tidan kan hawl a tul tinak a  si sawn ding.

India ram ih ca ka siar nak ah vawi khat ka siar mi cu ka lung a  kim law law.Cucu India ram  rural ( khawte )lam ih lo/hmuan neih ih lian bik khua 3 cu Himachal Pradesh tlangram ih apple cing khua 3 pawl an si a ti tlat.Hmunrawn ih leilet nei pawl an si a ti ta ria lo.himi hin ruah nak tampi i pe a si.

Cui ruang ah kan nih khal in tlangpar Lairam ih um pawl hrang ih lo leh hmuan nei cing ih nunnak sang ( high living standard ) an neih thei nak ding  kan ruah sak a tul nasa ding.

%d bloggers like this: