Burma Ram Feh Dan Ding Part 78

Falam Ah Inn Unit (Flats) 100 Kan Sak Ding


Minung kan si cun umnak ding inn hi a thupi tuk ti hi kan thei thluh ko.Israel pawl in an mai Juda mi pawl West Bank ih lut thei ding in ahmaisa bik ah inn leh a tual/hmuan pawl an sak ta theu.Tui tum neta bik khalah Israel Prime Minister Benjamin Netayahu cun  inn ( unit ) 3000 West Bank lamJ erusalam ihsi nisuahnak lam ah kan sak ding a ti a si kha.

Kan dung thla tawp ih Ganges tiva pi kap ih khual ka tlawn tum ah Bihar khawpi Patna ih kan um lai ah Bihar ih Chief Minister Nitis Kumar  acozah cak zet cun 2015 cem hlan ah inn ( unit ) 35,000 kan sak ding a ti ti Times of India daily ah ka siar.Kum 3 ah inn (unit thirty five thousand )rori sak an tum a  si cu.

Kan nih Laimi hman ah Falam sinsin cu kan khua le kan mipum khal kan mal tho ih,cuiruangah kei cun kum 12 sung ( Target Falam 2025 ) ah inn khan 100 te tal tang tlang in sak tlang seh la ka ti fang a si hi.Himi hi state leh district a cozah feh tlang in,cooperative pawl ,bulpak milian pawl leh kohhran pawl feh tlang ih sak ding a si ding.

Cule tui ih inn unit le flat kan timi cu kan theih vek in kei mai khua Cerhmun ih  inn dang dang vek pawl silovi a hrek cu thuah hnih,a hrek cu thuah 5 ih sang tla an si ding ih,thuah hnih hman ah sung kua 4 um thei nak tla ih kan sak a tul ding.

Aizawl ka um lai kan dunglam kum12 tlun lamih sin ka rak rel theu mi pakhat cu Falam town hall ihsi dawrthar lam,motor zinpi  tlun ih Pidawta inn 2 ( family 4 umnak ) tla kan bal ding ih,a sak lam ah kham kan dawl ding ih,inn hmun kan ti kau ding.Cutawkah  cun 32 feet by 32 in maw,40 feet by 32 in maw building pi pakhat thuah 5 in  kan sak ding Ground floor ah 16 by 16 feet ih kau unit ( sungkua ) pakhat um nak a um ding.Hihi USA standard cun fate tuk nan ti men ding ih Delhi ah cun Laimi 16 by 16 feet ih kau luah thei kan um lo tluk a si.Himi 1 unit ah 8 by 8 feet bedroom a um ding ih,sitting room leh kitchen cu hmun khat si in bathroom a dang ten a um ding.Himi tia hi ground floor ah inn ( unit ) 4 a um ding.Hi building pi hi 4 th. floor ( thuah 5 ) tiang a um  ah cun himi building ah sung kua 20 an um thei ding.Zawlte khua hnak cun a tum law law a si mai.Electric vek a that lo ring ring ding ruang ah step kailawn hi feh nuam in kan tuah ding.Thuah 5 nak cu a sang tuk lo maw nan ti men ding ih,Laizo zin bualrawl pi ih si Lamzung ra kai hnak cun hitawk ih um cu kan duh thluh ding.

Himi inn vek in hmundang ah hi hnakih te deuh maw a hrek cu thuah 2 le thuah 3 tla kan sak ding.Hiti a si cun kum 12 sung ah Falam ah umnak inn 100 cu  kan sak thei ding.A luah daan ding ah cun a hrek cu bulpak ih sum thawh tu pawlin kan sak theh ve ten an co ding ih,a hrek cu thla tin luahman kuan in an um ding..Inn hrekkhat  cu sak theh hnu ah bulpak tla in an lei ding.

Kum 12 sung ih inn 100 te hi a hrek cun a mal tuk lo maw tla nan ti men ding ih,a si nan a cozah zawng in kan dung kum 35 sung ih Falam ih mipi luah thei ding  inn pakhat hman sak a si lo thawi tthim cun a tawk zet ko ding.

%d bloggers like this: