Burma Ram Feh Dan Ding Part 77

Chin State ih District Pawl Then Dan Ding


Kan theih cio vek in kan ram ih 2008 Danpi cu democracy ngai ngai a si lovi,democracy ngai ngai leh kan ram hi federal union si ding ih kan zuam cio a tul a si.Cu nah cun kan state sung ih district pawl  then dan ding a tha ti ih ka ruah mi tu ah ka run ngan.

Khua hlan timai seh la,cu nah cun Chin State kau zet ah district 2 lawng a rak um.cule district ka ti tik ah A le B um nawn lovi bangaw mi district pawl ti nak a si ding.Tu hlan ih a rak um mi cu Falam district le Mindat district ti lawng an rak si.Square miles 13,900 ih kau Chin state ah district 2 lawng an um lai ah square miles 8000 lawng ih kau Mizoram ah district 3 an rak um theu.Cui pawl cu Aizawl,Lunglei leh Chhimtuipui an rak ti.Cule hi pawl hi 1998 ah khan district 8 ah an rungcang.cucu Aizawl,Champhai,Kolosib,Serchhip,Mamit,Lunglei,Lawngtlai leh Saiha district pawl an si.

San Thar Chin state thungah

Nikum lam khan Falam district then phel in Haka leh Thlantlang kom in Haka district ti in a rung um.Cu a si le tu ah cun Falam,Haka,Midat tiin 3 in maw si an um ding.Teddim pawl cun Teddim district neih tum in rawl ul ih sandahpiahnak tla an nei.Kan mawh tluk lo nasa.A si nan kan nih Falam khal cun Teddim le Tonzang,Cikha pawl cu Falam district ih um tir kan zuam ve ding a si mai.Democracy a si mai ih,Falam in Falam a thupitnak cu kan tuah ding a si mai.Cule San Thar District pawl ah cun Falam,Haka,Maindat leh Paletwa tiin 4 in um sehla.Paletwa cu an umnak a  hla si,an thangso si lo,district dang tei an um a tul ko.

   Falam in ziang kan tuah ding?

State capital Haka ih a thawn hnu,Falam cu Haka leh Thlangtlang thawi Falam district khat ih an um lai,Mizoram ih ka um lai kan dung kum 12 hrawng khal ah ni khat khat ah cun Haka pawl hi district dang ah an um leh ding ih,Falam district ih an um lai ah ttan kan lak ih office building tha tha pawl kan rak sak ciamco a tul ka rak ti theu.Tu khal cun Falam district ah Falam,Teddim leh Tonzang township pawl lawng an tang ih,Teddim pawl hi tui hnu lam kum 15 tiang tal cu Falam district ah an um lai ding tiin ruat phawt seh la,Falam ih district hqrs. kan si nak hi advantage la ta hat in Falam ti thupit kan tum a tul ko.Tui Falam district a tangmi hman hi Lai ram district pawl ah a  tum bik le minung tamnak bik a si lai ding,Palestwa a dang tei a um cun.Cule Falam leh Teddim,Tonzang pawl kar lak ah motor zin tha zet kan tuah ding ih,tui zin um mi tuah that hman in Falam leh Teddin hi peng  80 lawng a si ding ih,zin a that tla cun motor in nazi 4 sung ah an ra thleng thei ding.

Cule democracy ngai ngai kan si ih district council pawl mipi vote ih hril  a si can ah Falam leh Teddim,Tonzang pawl in district council pakhat kan tuah tlang ding ih,thuthimnak ah ZNC pawl tla ih vote an ngah tam bik ah cun Falam khua ah cui pawl cu to in district a cozah an tuah ke.Falam khua ih an to duh ih Falam district si an duh ah cun ziang saw a poi lem ding.

Kan nih pawl ih kan ti thei mi cu tui ih sin Falam khua le Falam peng a zam rang bik in tithanso hi a si ding.

%d bloggers like this: