Burma Ram Feh Dan Ding Part 76

Ka Tlawn Ram

February 21,2013 zan ah khan Aizawl mi Pu C.Lai Zawna thawn Ganges tivapi kap ih khawpi pawl ih tlawng ding in Delhi train in kan suahsan.Pu Zawna hi Zoeng leh Hnehtu thuthangca pawl ka tuah lai ih in bomtu a si ih,thuanthu ngan thiam si in a thuanthu 2 cu Mizoram ih Book of the Year hmu ve ve an si.Hmangaihzuali tla ah cun Burma ram thuhla tla tam pi a tel.A thai zing ah Allahabad khawpi ah kan thleng.Hi khua a hmin a than nak cu tiva pi 3,Ganges ,Yamuna leh Saraswati pawl tonkhawmnak a si ruang ah a si.Yamuna hi Delhi khaw kiang ih luang a si ih.,Alalhabad ah Ganges tiva pi a va fin.Cule a tiva 3 nak Sarawasti cu milai mit ih hmuh theih loh ti a si.

Tui tum hi Hindu pawl ih Kumb Mele ti puai a si ih,himi hi kum 12 ah vawi khat a thleng Cule January thla tawp lam ihsin hi puai hi ni 55 lai a  rei ih.March thla tir tiang a  daih.Himi tum hi hitawk tivapi 3 ton khawmnak ih tibual  Hindu pawl ih sual thlahnak ti a si ih an bual duh zet.Tui tum ah tibual hmuah hmuah hi mi million 120 ding ah an thei ih,ni khat tla cu million 30 lai an si ding an ti.Himi tum hi biaknak lam thu ih leitlun ih mi tonkhawmawknak tambik tum a si.

Cule himi tlai la la ah Varanasi (Banaras ) Kawl tong ih Bayanati kan timi khuaah kan feh.Mizo Evangelical Mission ih missionary pa Pu Rinzauva inn ah kan thleng.Amah in car a nei ih,kan nih in petrol thun in a thai sun cu Banara khua Ganges tiva ih mithi ruak an ur nak ah kan va feh.Himi hnu ah hi kua ih Hindu biakin hminthang zet Viwanath mandir ah kan feh.Cule a thai sun cu Sunday  a si vek in missionary pawl ih Christian an can tir mi Vai pawl umnak ah kan feh ih,a khawm cu mipa 1 le nunau 9 an si.,Pu Rinzauva cun Pathian thu a sim.Kei khal in Mizo tong in malte ka sim ih Pu Zauva in i let sak. A thaisun Monday ah  Banara ihsin Sarnath khua ah kan feh.Sarnath hi Bhudda ih a pathian thu simnak hmaisa bik kua a si.A sim thawhnak an timi ah temple a um.Kawl hrek khat tla ka hmu.

25th.tlai lam ah Sarnath ihsi kan ra kir hnu ah Banaras in train in Bihar state khawpi Patna ah kan feh.26th ni ah Pu Zawna thawn Bodh Gaya kan pan.Train in kan feh nan a cawl rei tuk ih sunlawng ah Gaya kan thleng ih cui sin Bodh Gaya ah kan feh.Hitawk hmun hi Gautama Bhudda dinhmunsannak a hmuhnak ti a si ih,thingkung pi hnuai ih a tonnaknah hminsinnak a  um.Hitawk ah thing tumpi a um ih cui thing cu Bhuda ih rak tonnak thing kung hmun ih a pali nak hmawng kung pi a si an ti.Original thing kungpi cu Buddhist lal Asoka ih nupi ih a hau thluk an ti ih,cucu BC 300 lai ah a  si.Cule AD 400 lai ah maw si Hindu lal pakhat in a vawi hnihnak a keuhmi thing kungpi cu a hau leh.A pathumnak cu a mah ten a thi an ti.Kan hmuhmi thing pi hi a palinak an ti.Kawl mi pawl tla ka hmu.

27th. Feb. ah Vaisali feh kan tum nan motor pakhat in mi a pah ih cumi thubuai ah motor 100 lai kan tang ih kan hotel lam ah kan kir.Himi tlai ah kan dung lam kum 2000 lai ih Maurayn empire ih an khawpi ih hmun khat Pattilarputra ah kan feh.A thaisun 28th.ah Ayaodaya ah kan feh.Hitawk hi Hindu pawl ih pathian pakhat Ram suahnak hmun a si ih,hitawk ih Muslim pawl ih biakin Babri Majid an timi cu Hindu pawl in 1992 khan an tisiat.India politic ah a hmin a thang zet.Hi tawk ah kan train kha minute 75 laiin kan tlai ih,hitawk ih zan riah maw,a zan a zan ih Lucknow ih feh maw ti aungbali Zawna ih a pawt ih,kan train ticket leicia mi in riah lo ah a  tla ih cui ruang ah Babari Majgid hmun cu kan zohman ta lo.Zan ah Uttar Pradesh khawpi Lucknow kan pan.

Lucknow ah zan a si ih hotel kan hawl.Double room kha Rs.1300 an ti lawk.Patna ah khan Rs.500 ( $10 ) man pawl ah kan riak.Lucknow ah cun hotel man cu Rs.800 ah kan nep ih,room lawng na na na cu in sian sak.A thai sun ah an state chief minister hlun Mayawati ih rak tuah mi Baba Ambedkar park ah kan feh.India ram hi phunniam pawl ih pa Ambedkar nghilh lo nak ih tuah mi a si ih,acre 100 ih kau ah a si.Hmuh a man hla zet.Himi hnu ah Mizoram Presbytrian mission fieldsecy.Rev.F.Lalhmingthanga kan phone ih Zawna ih theih thiam a rak si ih,an mission motor in Muslim siangpahrang pakhat ih inn pi kan va zoh.

Mizoram Presbyterian hin Vai ram ah field 8 hrawng ah mission an thlah hi Lucknow hi Uttar Pradesh ( India ram ih minung tamnak bik million 125 lai um nak )ah a si ih hi tawk ih mission  in UP ih district 77 lai ih district 7 ah hna an tuan.pastor bial 7 le pastor 7an nei.Cule Mizo evangelist 10 lai leh Vai Pathian hna tuan 20 lai an nei.Hindu pawl Chrisitan ih lak an har zet ih zumtu an neih mi cu 360 lai lawng a si.An kum khat budget cu Rupees in ting 40 lai a si.An field secretary umnak cu office khal ah an hmang ih Church of North India pawl ih an bishop umnak ih an sak mi a si.Thuah khat lawng a si nan room 12 lai nei in toilet 4 an nei.
1st.March zan ah Lucknow suahsan in Delhi kan pan ih Delhi ah 2nd.March zing nazi 6 ah kan thleng. ..

(Visited 111 times, 1 visits today)
%d bloggers like this: