Burma Ram Feh Dan Ding Part 74

Falam Ah Mission Compound Kan Neih A Tul

Chin ram thansonak ding ah kan kohhran pawl an that a tul ti kan nganzo.Tui Falam khua ah leh hnu pi tiang ih thiltha um ding in Baptist kohhran in mission veng ti kan neih a  tul thu ka run ngan ding.Falam Baptist Association hin Cinmual lam ah ram a nei lai ih,himi hi hmang in Baptist Area ah kan tuah a tul ding.Cinmual ah hin ka thei fiang lovi,acre 2/3 lai cu kohhran ram a si men ding.Hinah hin ziang pawl kan tuah ding ti kan ngan ding.

FBA Office
Kum 2025 ah cun,Pathian ih leilungtlun a zuah lai  le Falam peng ah mi 60,000 kan um ding kan ti zo.Tu vek in Baptist pawl hi 40% kan si lai ding tiin ruat phawt seh la.Cunah cun Baptist cu 25000 hrawng kan um ke.FBA tuhlan ih member zat an tar mi,Rev.Sa Tin Thio ih i sim dah mi ah 19,000 an rak um.Himi hrang ih FBA office ah Dept. dang dang a um a tul ding ih,kan thangso fawn ding.Cunah cun press dept. literature dept.mission dept.relief dept. health dept. finance dept. ti vek in a um ding in a office khal cu thuah 3 si in,30 feet by 30 feet hrawng a tul  ding.

FBA Conference Hall
Himi hi a hnuai bik cu hall a  si ding ih,meeting vek tla tuah thei nak a  si ding.60 by 30 feet tal a  si a tul ding.himi khal hi thuah 3 tho tho a si ding ih,a dang thauh 2 cu mikhual thlen nak tla ah kan hmang ding.Mikhual kan timi cu pastor pawl tla an si bik ding.Cule hmundang ih si Christian hotu tivek tla an si ding.Rooom 26 lai maw tla a um ding .

Press building le sizung te
Hi khal hi a dang tei a um a  tul ih,printing press umnak le cauk tuah nak pawl a si ding.Hitawk ah regular publication pawl tla tuah cih a si ding.Mahte meicet tla neih a tul ding ih,cumi hrang cu a dang tei tuah a tul ke.

 

FBA ih tul kan ti a si le sizung fate 16 bedded tla kan nei tho tho ding.Full time doctor 1 kan nei ding ih,a dang cu Vankau sizungpi tla kan va pan tir ding.

Camping centre

Hihi mission compound ah um si,a dang tei um tir tul mi pawl a si ding.Vawi khat ah mi 120 tal luh thei nak camping tuah thei nak a  si ding ih,a tuah tu pawl in man an kuan ding.A thuah khat nak ah camping hall a si ding ih,a tlun ah cun riahnak pawl a si ke.Rawl suannak cu a dang ten a  si ding.

FBA office hlun
Tui FBA office cu kan neih bet thei le cauk zuar nak tla ah kan hmang ding ih,cu lo le mdiang man nei ih san tir ding a si.Mission compound ih building pawl saknak ih sum kan tul a si le kan zuar a si ke cu.

Himi kan kohhran project pawl hi Pathian hnen ih thla cam cing le member le hotu pawl ih dik zet le taima zet ih hna tuan cing ih tuah leh ding pawl a si ding.Ramdang in kan Laimi, zum tu kan Laimi Baptist pawl le mirang pawl hnen ih si sum tla dil a tul ding.

(Visited 48 times, 1 visits today)
%d bloggers like this: