Burma Ram Feh Dan Ding Part 73

Hindi Ka Zirso Dan


Ka ca ngan thu-ah BL Thang in siar a nuam zik fang le spelling a sual theu i run ti ih,a si ngai,a hlei ce in neta bik Part 72 nak tla kha cu a sual a tam cuang ding.Ka ngan hnu vawi 2 ka zoh sal cing hman in a sual cu a um tho tho ding na in kan dung kha cu ka ngan lai ah function pakhat, in sim cia mi in kan thok thlang ho khaw in run ti ruang ah vawi khat lawng ka zoh man.A siar tu pawl ka lo hmaisawng zet.Nan siar theu ruang ah lungawi thu ka lo sim,tuihnuah cun vawi hnih tal ka zoh sal teng teng ding.

Tuisun ih ka nganmi hi kum upat hnu khal ah zirnak hi ti a theih a si ti ka sim duh ih tlunah ram tithansonak ah zirnak hi a thupit tuk ruang ah a si.World level ih kum upa bik college degree ngah ka theih dah mi cu USA mi a  si ih,kum 92 a si nak ah college degree a ngah ti a si.Cumi hnak tla cun kei khal ka nau ta tuk lai.Mizoram ah kum 62 nakih phun 10 ong a um dah.

Ziang tin ka rak thok ?

Rangoon ih college kan kai lai ah ka rualpa Lian Khan Khai,tui Germany ih um Salai Kip Khaw Lian ih ucu Foreign Language Institute ah kai in French tong a zir.Cunah a hnen ah kei cu French tong hnak in Hindi thiam ka duh sawn tiin ka rak ti dah.
Cule Mizoram ah ka rung um ih,Ratu high school ih ka tuan lai ah Hindi thiam ka cak nasa.Cu tawk ka suahsan hnuah Rs.3000 (khalai ih high school saya thla 3 hlawh ) keng in 1978 ah Shillong ah Hindi zir ding in thla 3 sung ka um.Ka sum ka hmang thluh,ziang hman ka si lo.

Tuisun ka Pai Thih Cam (31-1-13)

1999 January thla ni 31 ah khan ka pa cu Aizawl ih ka inn  san nak ah cancer in a thi.A thih ve ten kei khal ka ruat aw aw ih,zirnak ah ka feh law law ding ka tiawaw.Hindi tla ka zir tak tak thlang ding ka ti.Cule Thakthing veng  ah Hindi tawng ka kai.Zing tin nazi 2 sung kan zir.Thla 6 hnu ah phun 6 cu 2 nd.div. in ka ong ih,kum khat nak  ah phun 8 khal 2nd. in  ka ong.Cule a hnakum 2000 ah thla  6 nak ah phun 10 cu ka kai ih,camibuai tuah can ah phun 10 tuah  ngam lovin phun 8 ka tuah sal,ka ong tho tho.Cule a leh pek khal phun 10 ah kai tho tho in phun 10 exam tuah ngam lovin phun 8 tho tho ka tuah ih,1st.div. in ka ong.Phun 8 vawi 3 ka ong tinak a si.A si nan ziang hman ka si cuang lo.Thakthing Hindi school ah vawi khat cu Mizo nu in i hmu ih,Pu Runa,kan van tluk lo ceu ve aw ,i ti.

Cule 2001 kum tawp lam ah thuthangca ka tuah thei nawn lovi,a hnakum ah Delhi ah thla 4-5 um in Hindi ka zir ding ka ti ih,Delhi ah ka feh ih,ka pai thih cam 31-1-2002 ah Delhi ka thleng.Delhi ka um hnuah USA ih um ka nau Tha Nei Luai in Delhi ah um aw la UN dil aw iti ih ka um ta.Cuti cu Delhi ih thal 4 lai lawng um ding cu tu ah kum 11 ka um ah a cang.

Delhi ih Hindi Ka Zir Dan

Kum 2011 kum tawp ih Dr.Za Hlei Thang Delhi ih a rat ah khan Hindi na thiam maw iti ih,thiam hlah ka ti.Himi hlan ah Hastal ih ka um lai ah Hindi tuition ka kai ih,thla khat ah Rs.2000 pe in.Thla 1 hnu ah ka saya nu le tlawng neitu pa hlawh thuhla ah an toaw ih,thal 2 nak hlawh ka pek hnu ah  zir lovin ka cawl.Cule Nihal Vihar ih ka um lai ah ka inn nei tu pai hnen ah thla 6 lai cu tuition ka kai .

Hiti cing khal in keimah te Hindi ka zir ring ring.Hindi Englsih ih zirnak cauk hmuah hmuah ka lei thluh.A si nan mahte zir a si ih cuti tak cun ka thangso lo,

2009 ah khan ka nu le ka nau le thawn Malaysia ah kan tongaw ih,cunah cun ka nau le in Malay ah UN dilaw in ti.Khami tum ah khan Malay ih UN ngah cu ka duh si, leh lam ah ka Hindi  zir a tawp ding si khaw,tuhlan ih ka Hindi zir hmuah hmuah  a lak thluh ding sikhaw ka ti i,Malay in UN ngah ding cu a leh lamah cun ka phang nasa.

Tulai Hindi ka zir dan

Tuah Asalatpur,Janakpuri ah ka um ih,kan ram le a tha vivo ih,Hindi ka thiam ta lo cun ka ti ih,kan inn neitu Vai pa ih fanu hnen ah Hindi thla 7 thla 1 ah Rs.2000 pe in  ka zir zo.Ka thiam hrih lo  nasa.Catholic school ih phun 5-6 ka kai lai ih ka English thiam vek tluk fang a si ding.A si nan ka zir vivo a tul ko.

Hindi ka zir hi zo khal in in duhsak lo.Ka nu khal in,ka nau le khal in.A si nan keicu ka laklawh zo.Tawkfang thiam ding tiang ih ka zir so vivo a tul ko.Tuah hin Hindi ka zir zo nak tikcu hi,ni khat ah nazi 8 in kum 3 zir tluk ka si ding Kum 1989 ihsin kum 13 sung ah kum 3 ka hmang tinak a  si cu..Saya tha le tlawng ngai ngai ih ka zir lo thawn.,cui tlun ah ka thluak a that lem lo thawn ka thiam  ding vek in ka thiam ta lo.Burma ih ka tlun hlan ah dictionary hmang cing tal in Hindi cauk pawl siar thei dinhmun tal si thei ka tum a si.Kawl ca le Mizo ka thiam vek cun ka thiam thei lo ding.Cuvek ih thiam ding cun college ih kum3 tal kai a tul fam teh.

%d bloggers like this: