Burma Ram Feh Dan Ding Part 72

Ka Hrangih Ni Thupi Zet Ni 4 Pawl

Ram leh miphun tih thansonak ding ah kan nih Christian hrang ah cun Pathian thu ih tuluh ding,kohhran nget le tha neih ding,nauhak farah bom leh cawm nak ih han tuan ding leh media (print and electronic media) pawl hi a thupit tuk ruang ah kei mai hmuh ton mi pawl tui tum ah ka run ngan e.

Zoeng magazine ka  suah ni ( 17-3-83)

Mizoram ih ka um hnu kum 7 nak ah a si ih,Champhai ih um, ka rualtha zet Relsing suak Saya Tlei Thio cun Champai ih Chhawkhlei daily ih editor a tuan thu i sim.Ka thinlung in ka rual ih Champhai ih thuthangca a tuah thei cun Aizawl ah ka tuah thei ding a si mai ka ti aw aw.Cuti cun thala 7 lai sung ka zir aw leh ih,ka rualpa Dr.Sang Kung in le tha i pe si,17-3-83 ni ih zem suah ding cu Pu Sangkung inn ah kum 1983,March thla ni 16 zan ah Zoeng magazine cubiding kan tuah.17-3-83 ni ah Aizawl ah kan zems suak.Keimah rori in Chanmari ih sin Bazar Bungkawn lak ka zem.Hihi sum ka neih lo cu thukhat,mi in an duh le duh lo theih ka duh raung ah a si.
Cuti cun kum 19 sung Zoeng leh Hnehtu daily run tuah in Aizawl ha ka um ih,hihi ka hlawh tlin nak tum zet pakhat ah a rung cang.Journalist award 8 ka hmu ih,Mizoram ih hmu tam bik ah ka cang.

Pathian rundam nak ka theih ni (7-2-90 )

Ka nauhak lai ih sin sakhaw mitha tla cu ka rak si ban ring ring men ding nan painthar kan timi hrin tharnak ngai ngai ka rak nei lovi,ka nei lo ti khal ka thei.Aizawl ah Pu Hrang Nwl,Dr.Sangkung,Saya Cung Nung,Pu Hram Tlai pawl ih Haka tong ( Haka lammi an tam ruang ah ) ih khawmnaka  rak um zo.1989 kum tawp lam ah Burma ralkap ih rak tuan Biete khawsuak Evan.Lalhmingliana cu Bethel camp dan Mizoram ah a run la lut ih,mi a thanwg a thawng in camp ah an lut.Pu Laldeng leh minsiter dang pawl tla an lut.Saya Cung Nung le cun rundamnak ka ngah ding an duh tuk ih vawi khat cu, ” U Run,U Hram Tlai thawn Matupi  ihsin saklam Laitlang tla cu kan mah tawk in kan thei ih,ram hruaitu ding khal ah nangmah hluan lo kan hmu lem lo.A si nan Pathian ah rundamnak na ngah a tul kan lo ti ho khaw “i ti.Tui tum ah camp ah ka lut ding tiin ka sim.Cule South Hlimen ih Pu Hminga ih Elbethel camp thuahhnihnak ih lut cu ka tiaraw , .Saya Cug Nung le khal ih thla  in camsak zawk rero.Saya Cung Nung cun ka feh zik ah “U Run,ngaihtha zet in feh aw,ka mang ah na paingthar ti ka hmu” i ti.

5-2-90 ni ah ka scooter te thawn Aizawl suahsan in S.Hlimen lam cu ka feh.A tipsun 7–2-90 ah hramlak ah kan lut.Cu nah thla ka cam ciamco ih.Pathain,tui tum ah rundamnak ka duh ih ka sualnak thawn ka ra lut.I ngaidam hram aw,rem na ti cun ziangmaw tal in i thei tir aw “ka ti.Nazi 2 sung thla ka cam hnu ah aw ka thei ih,”Tui sun tiang ih tluang zet ih na um thei hi zangfahnak ruang ah ho khaw.”iti.Zoeng kum 7 ka tuah zo vi,India rammi sinak hman la duh lovi ka tluan tho thonak kha Pathian kilkhawi nak ruang ah a rak si.Cu le a vawi hnih nak ah ” I telh lo cing in ram le miphun hrang ah ka tuan ding na ti sapbai.Na ngam le i telh lo cing in feh leh hnik hen “tiin ka thei.Cumi laifang cu hmun hrap deuh ih tonak ding  mal te ka laih nak hmun ih hnahsawl ka phah cing in dingleh khukbil leh to cing ih thla ka cam nak ah a si ih,hi aw ka theih hi ka to ih ka khuk par ih ka lu ka suan tum ah a si.Ka rung harh ih minute 2 sung hrawng cu ka mitthli tal a tla ciam co,Cuti cun Pathian in i rak zahfah a si.Hihi 7-2-90  ni  ah a si.

Aizawl ah LCF kan din

Haka Thlantlang pawl thawn kan khawm aw ih,mi hrek khak ih Falam toang tla in din hmen uh in ti hman ah ka rak duh dah lo.A si nan Pu Sang Kung leh Hram Tlai pawl kha hmunkhat ah an um ih,Haka hotudang pawl pawl khat lam  ah.Cule Saya Cung Nung le kan ram ih tlun  a tum.Cumi an buai tak ah cun Falam tong hman nak khawm tuah a  tul,Kan meetingzawk rero ih.5-4-93 ( The first Sunday of April,1993) ah Pu Sang Ci inn ah LCF II hmin in khawm kan thawk.LCF I cu khalai ih Haka tong ih khawm pawl an si.
Himi ni  hi ka nu le ka pa an rung tlawn tum kher kher a si ih,ka nau le pawl thawn himi ni ah khawm mi 42 ah kan sung mi 10 kan um.Kan sung mi lak ah kha lai ih rak um tha lo,tui Tahan ih tlawngtha zet rung nei Saya Mang Lian Tlung tla a tel.Cu le Pu Kap Thio le Rev.Khaw Nei KHuai tei sung mi 8 an tel.Haka lam mi 12 in in khawm pi.Cuti cun tui sun tiang ih um LCF khawmnak cu Aizawl ah kan rak thok a si.

Nazareth Children Home hmin ka sak ni

LCF kan tuah hnu ah Pi Lian Kim a ra leng theu ih,farah zoh nak home tuah kung tiin i rung sawm ring ring.Ka duh dah lemlo nan i ti ring ring ih a tawp ah cun “A si le kan LCF Pastor Khaw Nei Khuai tla kan sawm ding ih kan rel khawm ding ho kahaw “ka ti.Cuti cun 28-11-94 ah Caanteen kual ih ka inn san mi ah Pi Lian Kim le Saya Khuai thawn rawl ei phah in thla kan cam ih home tuah kan rel cat ih,kei mah ih sakmi Nazareth Children Home ti cu kan lung a kim,,LCF committee ah kan pulut ih,a hnakum June (1995 )ah Saya Khuai cu Falam ah kan thlah ih,cuti cun tu tiang in Falam ah a rung um ta a si.

(Visited 67 times, 1 visits today)
%d bloggers like this: