Burma Ram Feh Dan Ding Part 68

Congthu Khua  Leh Falam  Peng Mipi Titam Dan Ding


Tulai cu kan group mail ah hotu pawl sawisel awk nak hmuh ding a um nawn lovi siar a nuam nasa.Cui tlun ah lungawi um zet mi cu Surbungtlang vanzam tum nak tuah a si ding thu leh Congthu khua din sal a si ding thu ah a si.Thlancing pawl khal in an khaw din tum sal seh la.

Tunai te ah Congthu khawmi leh sa pawl cun an khaw hlun ah an vai sal ding ti a si ih,cutawk ah tidai laknak ih sum a tul thu tla an than.A tulmi sum cu Rangoon ih Pastor Caleb Lal Tin Hrem in a hawl sak  ding ti a si ih.lungawi nak sin sin a si.

Ram thanso nak ding ah hin milai a tawk a mawi ih um a tul.India ,Nigeria,Pakistan leh Bangladesh tivek cu mi an tam tuk ih thanso a har lam.Leh lam ah Japan leh Russia tivek ah an nunau pawl in naute neih an paih lovi,cui tlun ah nupi pasal neiaw an mal ruang ah an economci in a tuar sawn,

Kan Falam ram thanso nak ah tuhnu lam kum 10 hrawng ah Falam township ah mi 60,000 um in Falam khua ah 15000 um thei seh la ti ka ngan zo.Tu-ah cun an zaten 45,000 lai lawng an um ding.Lairawn ah 60,000 hrawng an um lai ka ring.Culai ah  Congthu khua ah inn 30, milai 120-150 lai an um sal  ding an ti hi thuthangtha ah a cang.Tuhlanah apple tla an rak nei tha thei ih,a si nan a phurh a theih lo ruang ah an hlawk cuang lo.Tuhnu kum 5 hrawng ah cun Congthu ah jeep road tal a lut ding ruang ah an apple khal Rangoon ah Surbung airport ihsin an kuat thei ding a si.

Kum 10 sung ih mipi  kan karh nak ding ah nau neih ruang ah kum khat ah 2% thang seh la,kum 10 ah 10,000 lai maw an thang ding ih Lairawn ih sin hung vai sal pawl thawn kum 10 ah cun 60,000 kan ti thei ding.

Surbung vanzam tumnak tuahnak ding ah hin tui kum sung  ah  mi 300-400 an tul mai ding.Leh hu cun himi airport tuah nak ah direct and indirect worker 600-700 lai an um ding ih himi tlun ah kan peng ah an sung khaw pawl thawn cun mi 2000 lai an karh ding.Cule hna tuan tu ziang maw zat cu hmundang hnam dang tla an si ding ih a si nan an sum 50 % hrawng tla cu Falam khua ih rawl leh thil lei nak ih an hmang ding ruangah kan hlawk tho tho ding Kan ram a that vivo ruang ah Mizoram ih feh khal kan mal thleng ding.

.Vanzam tumnak ih tikcu le sum le pai cem ih rak buaipi tu Pu Hrang Lawm leh hotu dang pawl,nan tlun ah lungawi thu ka sim a si

Keimah ka khua Cerhmun tla tu ah inn 40 lai lawng an tang ih,kum 10 sung ih 80 ih karh tir dan si ka ruat zawk rero..

%d bloggers like this: