Burma Ram Feh Dan Ding Part 65

Falam Ah Agriculture College Din A Tul


Falam peng leh zirnak lam kan ngan lai ah Lungpi ih Agriculture college din a tul nak leh din theih a si nak ding ngan bet mai seh la.Kan theih thluh cia vek in Lungpi ah Agriculture high school a rak um lawk nan tu ah cun a um nawn lo.Culai ihsin hi tawk hi hmun tha a si ti an rak thei zo,Burma ram pumpi ah tu ah cun diploma pek nak Agriculture school pawl lawng a um ih,a si nan Lungpi ih ta cun himi ding ah an khai sang lovi,a tawp ah a cang.Hihi a cang thei tawp ih Lungpi ih diploma pek nak Agri. tlawng a zamrang lam ih tuah sal dan kan hotu pawl ih an ruah a tul ding.Leh hnu ah cun diploma lawng si lo Agriculture college maw,cu hnak ih sang Agri.university tiang ih tuah thei nak ding a si,

Lungpi ih a that nak cu hmun rawn a tam.cule tidai a tha tuk.A cozah ih ram a lei vivo tla cun Lungpi ih sin Laizo tlangkulh Hmunpi khua tiang hman ah  kauh vivo a theih ding ih,cui tlun ah Lungpi ih sin Hmunpi hnuai lam tiang tla cu nikhua ( climate ) a phunphun um nak a  si ih,thlai,thing thei,buhbal a phun phun cin theih in tlawngta pawl hrang ih a phun phun zir nak a um thei  ding a si.Lungpi ih Agri. diploma maw college maw kan neih thei ah cun Chin state pumpi lawng hman silovin Kalemyo,Mongya tiang in tlawngta pawl an rung kai ding.Mizoram ah Selesih ah Veterinary college a um thlang,cu vek in Chin state pumpi ih Agri. college ding cu Lungpi a rem bik ding.Haka lam cu khua tla a sik tuk,cui tlunah hmun rawn um nak hmun ah tidai tla an nei tha lemlo men ding.

Falam college ding cu tu ih Canmari ih high school building khi ring in kan tuah hmaisa ding ka ti zo vi,cui tlun ah Falam ah high school 3 kan neih a tul ding.Cu cu tui Cinmual lam ih ta khi pakhat a si ding ih,ka ngan zo vek in Canmari ih high school building ah college leh high school an kawp ding.Cui tlun ah tui bualrawnpi  ih middle school khi ziang tin simaw building kan sak bet ding ih,high school pakhat neih bet kan tum  ding.Cu ti ih high school 3 kan neih thei cun leh hnu kum 10-15 tiang khalah kan tlawng ta pawl ih high school awl ten an kai thei nak  kan neih phah ding.

Cule college ngai ngai a cozah pom kan neih thei tik ah cun Lungpi lam tla ah college thar pi cu kan sak leh ding.Kan nih pawl kan nau hak lai ih kan rak kai nak,kha lai ah cun mirang tlawng kan ti ih tu ah cun Kawl tlawng maw si,OPD thlang ih tlawng inn hmun tla ah building tha kan sak leh ding ih,duh le cin Mual high scholl cu a nai sawn cutawk ah kan thawn kei,tui Cinmual high school cu industrial high school ah maw zirnak hmun pakhat khat tla ah kan hmang leh ding.

%d bloggers like this: