Burma Ram Feh Dan Ding Part 64

Laimi hrangih zirnak  tihthansonak ding ah


Kan dung ah Falam khua ih college din dan ding kan ngai zo.Zirnak ding ah kan Laimi pawl hrang ih thansonak ding  kan ruah natsat a tul ko.Himi thuah hin Burma ram a cozah cun Chin state cu in rak duhsak ring ring pam.Ziang ah tile Falam peng tla ah inn 30-40 khua zate deuh thaw in a cozah phnu 4 tlawng an um  thluh.Cuti vek cu Lairawn ah cun a si ta lo.

Falam peng tlang par ah a cozah in in duhsak kan ti nan tihthat ding a tampi lai ko.Ziang ah tile primary tlawng an timi pawl ah  phun hrek ihsin phun 4 tiang ah class 5 lai a umih cunah cun a cozah pek mi saya 2 lawng tla an um theu.Khaw hrek khat ah cun a khua in saya an lak bet ih saya 3 nei ah an cang.A si nan hi an lak bet mi pawl hi thiamnak sang lem lo tla a si thei ih,an rak thiam san hman ah lakkha mal tuk ih san mi pawl an si.Hiti a si tik ah hi saya pawl hin rei an daih theu lo.An suak cing cing.Cui ruang ah private saya tha deuh tlawngta pawl bom tu ding ih pek bet an tul ko.Cumi cu a khua in maw an ti ding, acozah in maw,maw kohhran zawng in ti tla ruah ding tampi a um ding.Theih sehla cu class 5 ah cun saya 4 tal cu um seh la.

Cule Englsih hi tulai ah tong thupi bik ah a cang ih,cui ruang ah nauhak pawl hi kum 5 kum 6 an si lai ih sin English tha tei zirh ding hi a thupi nasa ko.Himi a si tikah English thiam saya tampi kan tul ah a cang.Tulai Bible tlawng suak tla an um  vivo ih,primary tlawng saya ding ih pe aw thei tla an tam vivo cun a duhum zet ding.

Lairawn ah cun minung tla an tamih,cui tlun ah sum nei tla an tam tikah acozah ih saya le tlawng a pek thei lo khal le mahte affiliated ( tuaibet )ih tlawng din ding ti Burma Ram Feh Dan Ding ah kan ngan zo.

Kan ram kum 50 sung ralkap a cozaah ih a rak uk ruang ih kan tuarnat bik cu zirnak lam ah a si ding.Thil dang cu ,thuthimnak ah Mizoram tla khi,an mah vek rori kan si thei lo hmanah kum 10 ah cun living standard level vek  ah an mah daw lovi tuah  dan tla a um thei ko.A si nan zirnak ah cun kum 30 lai in inhleih.Sikhalsehla tui hnuah kan zuam cun kan zia um leh ko ding.

%d bloggers like this: