Burma Ram Feh Dan Ding Part 62

Falam Harhdamnak Hrang  Tanlaknak Ding Pawl


Tu fang ah kan Laimi thanso nak ding ah ziang si tuah hmaisak a tul tiin sut aw seh la,kan sim dan a dang dang men ding.Kei cun harhdamnak le zirnak ka ti ding.Eiin hawlnak pawl lamzin ti thatnak pawl tla a thupi ko nan tuvek te ih Lailam ih lo kan thlawh khal le  rawl thaw thaw cu ka ti lo,ei ding na na na cu kan ngah ko ka ti ding.Lamzin khal a tha lo zet nan kan fehthei hrih ko ka ti ding.A si nan damthat nak ding le zir nak ding ah kan zamran a tul tiin ka thei.

Kan dung ah tuihnulam kum 10-12 ah Falam peng ah sizung te um hrih lo nak hmun 6-7 lai ah kan mah te sum le pai hawl in MBBS doctor pawl kan re ding ka ti zo.Cule kum 2025 ah Falam peng ah mi 60,000,Falam khua ah 15000 um tir kan tum ding ti tla ka ti zo.Ziang tin mi kan tikarh  ding ti cu kan ngan leh ding.Australia tivek ramlian,ram thangso ah cun mi 350-400 hrang ah sibawi pakhat an nei ti tla ka ngan zo.

Kan nih 2025 ah Falam peng ah sibawi 20 um bang seh le,Falam khua ah specialist pawl thawn 8 lai an um a tul ding ih,cu lo 12 lai cu tui sibawi um zo nak le um hrih lo nak pawl ah then an si ding ih.Cuti a si cun mi 60,000 hrang ih sibawi 20 ti cu mi 3000 ah sibawi pakhat kan co fang fang ding.Tulai hnak cun kan ziaum nasa ke.Cuti cing in Lai ral tlang tivek ih khawpi naih lo hrang ah cun mi 1500 ( khaw 9 ) hrang ah doctor pakhat ret ding ah a cang ding.

Cule Khuangli tivek le Tlauhmun tivek hi cu khawpi an si nan Falam thawn an naih awk ruang ah Falam ih sizung an ring ding ih.Falam sizung pi khal ah khaw te lam ihsi Falam ih hruai hlan ih first aid pe tu ding ah doctor ngai ngai a si lo khal ah health assistant ti vek pawl maw cu motor cycle thawn 24 hours duty in an um ding,.Cutikah cun phone system tla a tha zet ding tiin ruat seh la.

Cule khawte ih sibawi pawl cu kum khat tluan suak ih an umnak ih um ring ring cu a theih cuang lo ding ih,kum khat ah thla 9 cu an um kei,thla 3 cu Falam ah maw an khua an ram ah maw an um ding ti si bang seh la,an um lo lai ih damlo poimawh rak zoh tu ding ah nurse 2 tal a theih ah cun ret ding a si ding.

Leh hnu ah khawte lam thanso nak pawl ah mi zohtimtlak pawl ih thu tla kan run ngan leh ding ih,cui zohthimtlak pakhat ah cun Pu Hrang Tin Lal,Rangoon ih um si an khua Lotharawn thanso nak ding ih an khua in thla 3 lai hung um,cui hnu ah a hnatuan pawl kilkhawi tu ding ih a fapa tanta tu ih thu tla kan ngan leh ding.Hivek ih zohthim tlak pawl nan theih a si le kei mah bul pak tla ih mail in in run sim uh la,ka lung a awi zet ding.

Suak leh ah zirnak lam ih tan kan lak dan ding  run ngan a si ding.

%d bloggers like this: