Burma Ram Feh Dan Ding Part 61

Falam Target 2025


Burma Ram Feh Dan Ding hi Part 80 tiang ngan ka tum ih,cumi hnu ah Rangoon ih Pastor Caleb Lal Tin Hrem in cauk in i suah sak ding.Cui ruang ah part 20 lai lawng ka nei thlang ih,national ( Burma level ) lam cu ka ngan nawn lo kei,Chin le Falam level lawng in ka run nan thlang ding.

Kum 2004 hrawng ah khan India President Abdul Kalam cun India ram cu kum 2020 ah developed ram ( tulai ih Europe le USA vek ) ih thlen tir siseh la tiin a sunmang mipi theih ah a rak sim dah.Kum 16 khel in a sim.Cuvek in kan ram feh dan ding pawl kan hmuh lawk thei vivo nak ding ah Falam Target 2025 ka run ti a si hi.Kum 12-13 lai a rei lai ding ih kei khal Pathian zangfah nak ih ka nu le ka pa te bang ih ka dam ah cun cu tawk tiang khal kan ram le kan miphun hrang ah hna ka tuan thei lai ding.

Cuti a si ruang ah ka run ngan ding mi pawl hi kum hnih khat ih theh ding tinak khal a si lovi,a hrek kum 3,a hrek kum 5,a hrek kum 10 tla kan rei ding.Kan dung ah Falam ih dieseal khawl hmang ih electric kilowatt  500 pek thei nak khawl neih thei kan tum tlang ding ti ka ngan tum ah khan Aizawl ihsin ka nau Sui Thawn in “ka u.kum 2015 cem hlan ( 3 year plan )ah kan nei ding na ti ih ti thei lo pang ah na hmin a siat lak ding i ti.A si ve ko.Leh lamah cun elecric khawl tha neih hi a tul tuk ih,cui ruang ah kan Laimi hmuah hmuah tangtlang in kan tuah ding ih,kan tangtlang cing hman in thla 6 tlai ti vek tla cu leilungtlun ih feh dan pang ngai a si si tiin ka sang.

$35,000 in ziang si a tuan thei ding?

Tui kum sung ah khan ram dang dan ihsin Rih Falam zin laihnak ah tiin sum nan run thawh cio ih,cumi tling khawm cu $35000 lai a  si in ka thei.Nan ti tha zet.Hivek in kan Falam mi tang tlang bang seh la,himi sum  hin ziang ziang kan tuan tlang thei ding ti pawl ka run ngan hrih ke.

Cui hlan ah kum 2025 ih Falam peng ih  mipum kan um zat ding pawl ka run ngan hrih ke.Kum 1973 kha ka graduate hnu te a si ih cumi kum January ah khan Burma ram pumpi ah mipum siar pi an nei.Tu hi kum 2014 ah neih leh an tum hmang.1973 ah cun tangka duh ruangkhal ah si lo in,kan Falam peng thu hla thei ka duh ruang ah 1973 siar pi hrang ih Falam myo ih secretary te thla khat ah hlawh Ks.150 ( kha lai ih LDC clerk hlawh ) in thla 2 ka rak tuan.Cumi tumah cun Falam pengah khan khua 212 lai an um ih,uksuh 90 lai an um.Uksuh 90 lai ih  hmin khal ka by heart thluh ih,cui tlunah uksuh pakhat ih um mi khua pawl kha Falam pengih khua 212 lai ah 3 lai ti lo cu ka by heart thluh.Cumi tumah cun Falam peng ah mi 47,000 lai kan rak um ih Falam khua ah mi 6000-7000 lai kan um.Cui hlan kum 20 lai khal ah Falam peng ah mi 47,000 lai tho tho an rak um ih,tu lai khal ah ka zum dan in Falam peng ah mipum 45000-47000 lai tho tho an um ding.Ziang ruang ah an thang thei lo ti le Kawl ah kum tin an vai ih.Mizoram khal ah thawng tampi an vai.

Kan ram kan tithanso tir duh ah cun Falam peng leh Falam khua ah mi kan um tam a tul.Himi ah Col. Kap Cung Nung.Lairam hrang ih hna tuan tha zet mi ih vaih thluh ding a ti mi ka el a si lo.cumi lam cu nidang ah kan rel tlang leh ding.Cuti cun kum 2025 ah Falam peng ah mi 60,000 um seh la,cule Falam khua ah mi 15,000 um seh la,cu cun thanso nak tampi kan tuah thei ding.

Kan dung ah Falam sizungpi thanso nak ding ka ngan zovi,ngan leh ah Falam peng sung harhdam nak ding ah doctor umnak hmun tampi ziang tin ken nei bet ding ti ka run nan ding.Australia vek cu ramthangso,ramlian an si ih,cawhrual in mi 350  hrangah doctor pakhat an nei thei.Kan nih pehtlaih awknak harnak Lairal tlang khaw 9,inn 300  le mi 1500 um nak ah thuthimnak ah an zatei hman ding sizung te Singai tla ah ziang tin kan tuah ding,ramdang ihsin $35,000 tla run kuat thei bang uh la. Singai lawng si lovin Saihmun,Bualkhua,Tlawrzan,Rallawn leh Ramthlo ti vek tla ah ziang tin MBBS doctor um nak sizung te pawl kan din thei ding ti ka run ngan ding.

(Visited 40 times, 1 visits today)
%d bloggers like this: