Burma Ram Feh Dan Ding Part 59

Falamah Electric Khawl Tumpi Kan Din Ding !


Tulai ram le miphun thansonak ding ah electric (power )a tul tuk ti cu sim tul lovin kan thei cio.Power ngah nak dng ah hinoil,coal,hydro,wind,solar leh nuclear khawl pawl hi a tlangpi in an si ding.Ram thangso zo ram pawl khal ah solar leh wind power hi cu tha an ti nan sum a cem tam tuk hrih ruang ah cutluk in tha an pe hrih lo.Zinan leh lungmeihawl ih sin an hmang tam bik hrih ko.Electric power tha tawk tak Falam ih kan neih thei nak dng ah hitin hin run ngan seh la.

Cumi hlan ah hydro–electric ihsi nghah zo dan leh ngah thei dan pawl ngan hmaisa seh la.Var hydro-project kan nei ih fur ah cun a tha pam.A si nan thal ah cun tidai a mal tuk ruang ah tha a pe thei lo nasa.A pek thei khal le kilowatt 500 lawng a si.Anteng khaw kiang ihsin Runva dawl ih power lak dan ah feh sehla,himi an tum pek kan dung kum 5 lai ihsin kei cun ka rak zum lo.Ziang ah tile ralkap a cozah lai,kan ram a farah lai a si.Tu khal ah ziang pipa an tuah cuang lo ti cu kan thei thluh ko.Himi an tuah ngai ngai khal  le leh hnu kum 15-20 hrawng lawng ih ngah thei dingmi a si ding.Tithei ah cun a tha law law,a si nan ramdang bomnank ih tuah tulmi a si.Himi hi tih thei ah cun MW (mega watte)100 tlun a suak ding.

Falam peng sung ih tiva pawl khuap dan vun ruat seh la,a malbik 2015 ih si thok siseh la , cumi hnu ah kum 5 tal,tu ih si cun kum 8 lai nghah a tul ding.Laiva hydro khi KW 200 lai maw si ka thei lovi,Falam peng ta cu a si nan Haka khawpi hrang ah an hmang.Hihi cu ram a rung that hnu ah dan pawl kan zoh ding ih,kan long ding maw ,cu lo le electric an hamn man kan kuan tir ding maw a si ding.A buai thlak pam ke.


Falam ah diseal khal  tum bun a tul

Kei ka senlai ah Falam football field kiang ah electric khawl a rak um ih cu cu KW 60 a si tin ka thei.Tu cu khua khal a rung tum ih,cui tlun ah electric hman nak ding khal a phun phun a si ruang ah KW 500  diesel khawl kan neih a tul ding.Himi hi ziang zat man a si ding ti ka thei lo.Aizawl ka um lai ah watt 2000 ( KW ) 2 khawl pawl Rs.40,000 lai in kan rak lei in ka thei.Tulai ah KW 500 cu US $ hman in $ 60,000 lai a si ka ring.A si le cu cu ziang tn saw kan ngah ding.

Electric KHawl Man Kan Ngah Dan Ding

Kan dung kum 2 lai ah Falam ah college din bang seh la ziang zat na tiamaw thei ti tik ah $20,000 lai cu nan tiamaw in ka thei.Cutin kan mah,ram sung le ram leng ih um pawl in $20,000 lai cu kan Falam tleu pem pem ding ah cun kan thawh thei ding tiin ruat phawt seh la.Himi hnu ah World Vision ti vek ih NGO tum pawl kan ngen ding.Cule a cozah khalin ziangmaw zat cu an suah thei ding .Cule Rangoon khal ah embassy pawl hnen ah kut kan dawh ding.Kan tuan ngai ngai ti an theih ih a tuantu pawl khal cu sum le pai ih in zum ah cun embassy pakhat in $1000 ihsi 5000 tiang an thawh ding cu cu tluk a harsa lo ding.

Ziang tluk kan rei ding

Power lak nak dang pawl kha kum 5 hlan ih kan ngah thei ding mi a um lem lo kan ti zovi,himi diseal engine hi 2015 cem hlan ih theh teng teng kan tum a tul ding.Hiti power tha kan neih cun kan sizung pawl,ei hawl nak ding ih khawl pawl,kan rawlsuannak le kan tlawngkai pawl ih ca zohnak ding pawl,kan communication ( phone, computer  internet,radio,TV,printing press ),kan workshop pawl a tha thluh ding ih Surbungtlang ih airfield kan neih nak ding khal a bom nasa ding.

%d bloggers like this: