Burma Ram Feh Dan Ding Part 57

                   Tahan ah Local TV  Kan Bun Ding

Kan dung October thla cem ah Delhi ah Dr.Than Bil Luai le Laimi pawl Laica  calai zirh ding in an ra ih,cutawk ah cun Pu Than hnen ih ka theih mi,kei khal ih a dang tei ka rak ruah theu mi,kan ruahnak bangaw mi a um.Cucu Burma ram a cozah ih a sian ve ten Tahan ah Lai tong ih local TV neih/tuah ding ti  hi a si.Amah Dr.Than Bil Luai le khal in himi thu hi an rak ruat zet zovi,hmalak dan ding tla an rak nei zo.

 Mizoram ih an tuah dan

Hinah hin Mizoram ih an tuah dan pawl run ngan hmasa phawt seh la.Mizoram ah LPS tiin kum 20 lai a si zo,local channel hmingthang zet an rak nei zo.Himi hi Aizawl Zarkawt ih innsak thuamhna zuar tu Pu Lal  Sawma Pachuau tei sung ih ta a si

.Kei Aizawl ka um lai kum 2001 tiang ah khan cun himi LPS ( Lalsawma Pachuau Service ) hi a hmin thang in a la tu khal an tam bik law law.Kha lai ah kha Aizawl ah connection neiih a la tu hi 600 hrawng an si.Kha lai khal ah tui zan ih LPS ih a suahmi pawl hi video /cassette ah  thun in Lunglai leh khawpi dang in local TV nei pawl hnen ah an kaut.Cui pawl ihsin an hnen ih connection la tu pawl hnen ah an kuat ih Aizawl ih tuizan ih zohmi pawl cu khawdang ah thaizan ah an zoh theu tinak a si cu.
Kha tawk lai ih local TV dang pawl cu Zozam tivek pawl tla an si hmang.Cule tu ah cun LPS zuamtu tha tak a rung um.cucu ka rualpa Aizwl leh Mizoram ih thuthangca darhkaubik Vanglaini nei tu Pu Sapdang leh a rualpi pawl ih tuah mi ZONET hi a si.Mi tampi cun LPS hnak in ZONET hi an duh sawn ti a si.Cule ZONET ih mak nak pakhat cu,hihi mi pakhat bulpak ta a si lovi rualpi ziangmaw zat pawl tuah khawm ih hlawhtling zet mi an si.An rualpi pawl lak ah cangan thiam zet Vanneihtulanga tla a tel ih All India Radio Aizawl ih officer rak tuan theuh Pu Dinga tla a telo.Mizoram ah sungkat si lo midang dang business tuan tlang si hlawhtling hminthang um sun an si.

Tahan Ih Kan Tuah Dan Ding

Cule Tahan lamah cun kir leh seh la.Falam hnak ih local TV ah cun Tahan ka tinak a san tampi a um.Pakhat nak ah cun Laimi ( Falam ) pawl kan tam zet.Tahan khua ah ziang zat nan um ka thei lovi,a si nan hitin zoh seh la.Lairawn ah Falam pawl a malbik ah 70,000 kan um thlang ding.Cutawk ah cun Tahan ih si peng 10 hnak ih nai ih um mi 40,000 (sungkua 8000 ) lai kan um ding.Cumi pawl ah cun tuihnu kum 3-4 hrawng ah  TV neithei 1500 tal cu kan um ding.Cuitlun ah kan local TV cun Mizo tong hmang ,Teddim tong hmang,Haka Zo lam pawl ih duh zawng ih kan tuah thei ah cun.kan tong hmang tho tho si in, kan thok ihsin kum 2 hrawng ah cun a la tu 2500 cu kan um mai ding.Lairawn ih Falam mi pawl kan tambik nak hi kan sawr that thei a tul nasa ko.

Mizoram local TV pawl ah kat leh seh la.Tulaiah cun kei ka um lai kan dungkum 11 lai hnak in an tthangso tuk ih khawl a phun phun an nei thei ih,Aizawl leng lam khawpi Inn 300 tlun khua tampi ah cun LPS leh ZONET pawl ih Aizawl ih khawl direct ih lak thei nak an neih ruang ah Aizawl ah tuizan ih an thlahmi pawl cu Aizawl rual in an suah thei thlang fam teh.Thuttimnakah North Vanalaiphai khau ah inn 600 lai an um ih inn 100 in TV nei thei bang seh la,cucu business zawng ih khat lam khat lam hrang ih a that ah cun N.Vanlaiphai leh ZONET leh LPS pawl cu an pehaw mai fam teh.Cule Aizawl lenglam ih si Aizawl ih thu kuatnak tla an nei zo.Tiduh mi cu khawpi ( district hqrs. maw inn 1000 lai um nak pawl ) ah correspondents an ret ih an khaw kiang kap ih thupoimawh a um cun Aizawl ah khawl ( sattalite through ) hmang in an kuat ih,cui ruang ah Saiha lam ih thu khal zuk (photo ) thawn a ni la la ah an kuat thluh thei.Tu hlan ah cun radio leh wireless pawl  le kan dung kum 5/6 ihsin cun mobile ph. tla in an kuat ding.

Dr.Than Bik Luai le pawl ih thlitum hi a  thupi tuk ih,sum khal tampi a tul ding.Cumi tikah cun kan milian pawl ih sum le pai tla thawh ih himi local TV hi a zamrang bik ,miphundang pawl khelh teng teng ding ih tuah zang a tul a si hi..

%d bloggers like this: