Burma Ram Feh Dan Ding Part 56

Pi Suu Kyi In Kawl Kala pawl Tlung Sal Ding In A Sawm
Kan dung ka ngan zo vek in Pi Suu Kyi cu ke mai tuan nak tlawng Prospect Burma,Delhi Janakpuri ih um  ih a rat hmaisak hnu ah minute 17 hrawng lawng um in Vikaspuri ih um Oxford Senior Secondary tlawng ah a feh.Kei khal cu ka tlawng ih ka staff pawl tuan ding pawl ka sim ta ih Dr.Tint Swe ih motor in Pi Suu tei convoy cu kan thlun.An convoy ih tel man lo cun kan tlai nasa ding.
Cutin Oxford school field ah cun  tohkham to ding in mi 1000 lai cun Pi Suu Kyi cu an rak hmuak.Oxford school hi Kawl Kala pa,a Kawl hmin U Maw Tiri ih din a si ih,tu ah cun a thi zo.Lasho khua ih suak a si ih,Kawl tong a thiam law law.Delhi ih sin Burma ram democracy hrang ah hna rak tuan ve in Kawl tong in cauk tampi a suah.Kei tla na thuanthu kan suah ke cu i ti nan kha laiah cun ka rak duh lo.Tu ah hi school hi a fapa Indian army captain bang in a ho a si.
Pi Suu Kyi in hi school khal ah minute 15 hrawng lawng thu a sim.Kei le Dr.Tint Swe kan luh cun an rak khat thluh.A hmailam ah ka feh tho tho ih,nunau pakhat in tonak ih kian ih,ka lung a awi zet.
Pi Suu Kyi cun mipi hnen ih thu a sim nak ah Burma ram ih suak,India mi kua le ti la zo pawl khal nan ra tlun duh a si le tha te le  him tei khawsak thei ding ih tlung thei ding in kan rak tuah ding ih nan ra tlung ding ho khaw a ti.
Gen.Ne Win khan 1962-64 le khai hnu khal thawn India ram mi 400,000 lai India ram ah Burma ihsin a rak dawi.Himi pawl lak ih sin a mal bik ah a hrek cu an thi zo ding.A hret tang lai mi khal ah Burma ram tha hman seh la ra kir duh cu 5000 hman an um ka ring lo.A si nan Pi Suu cun thu dik le thu tha a tong tho tho in ka thei.Ziang ah ti le mi 4000 lawng ra kir hman hai seh la hi pawl hi ca thiam le sum nei an si ding ih Burma ram cun a hlawk pi ding a si.Cui tlun ah Pi Suu Ih tong kam tha ih sin hi pawl hi an kir duh lo hman ah Burma ih um an sung khak le an rualpi pawl cu NLD tan ding in anti teng teng ding.
Cule Kawlram mi pawl in thusuhnak an nei ih,2008 danpi tihdanglamnak ding ah Pin Long conference tivek Pi Suu Ih hruai nak in tuah tum nak a um maw an ti ih,Pi Suu Kyi cun a duh hman ah a mah pakhat lawng le an mai party lawng ih tuah thei ding mi a si lo,Burma cu democracy ngai ngai a si hrih lo vek in kan tan tlang thluh a tul a ti.Burma ram thu tla run theih tum ringring uh a ti.
Himi 16-11-12 tlai ah Pi Suu hi Burma ih IT tlawng din nak ding zir ding ah Banglaore a feh ih a thai sun 17-11-12 ah Andera Pradsh state ah feh in nunau pawl hna tuan tlan dan a va zoh vi,cui tlun ah rural development programe pawl a zoh.19-1-12 in Rangoon ah President Barrack Obama tong ding in 18-1-12 ah India a suah san.
(Visited 26 times, 1 visits today)
%d bloggers like this: