Burma Ram Feh Dan Ding Part 54

Pi Suu Kyi Thawi Kan Tonawk Dan

Tui tum  Burma ram ih National League for Democracy (NLD) hotunu Pi Aung San Suu Kyi hi USA ih a um lai ah India ram a tlawng ding thu an puang ih,cui hnu ah India ram ih a rat ding can tiang in kan run thei leh.A rat hlan thla khat duh hrawng 18-10-12 ni ah Chief of Protocol, Govt. of India, Ms Ruchira in i run phone ih,Pi Suu Kyi na tlawng Prospect Burma ah a ra ding tiin i ti.Zohman sim hrih aw hlah i ti fawn.Himi hlan ni 3 hrawng ah an officer pakhat in in run phone zo.

Cule 30-10-12 ni ah Ruchira tho tho cun Pi Suu Kyi rat ding thu ah ka office ah ra leng aw,thai sun 10-30 AM ah i ti ih,a thai sun cu Delhi Central Secretariat South Block, Ministry of External Affairs ah ka va feh. Hi kiang kap cu ka thleng dah nan South Block sung ih ka luh a vawi khat nak a si.Cunah cun Ruchira cun kan tlawng a rat dan ding leh nazi 1 ( 60 minutes )sung a um ding thu leh cui sung cu ziang tin ha tlawng ih nan rak dawn dan ding ti email in kim ten in sim aw i ti.
Cumi hnu cun kei khal in London ih Prospect Burma office ih kan director Fraser Wilson hnen ah mail ka kuat mai.Very exciting a si i ti.Kan tlawng khal ah staff 8 kan um ih midang 2 lawng ka sim hrih.Cumi pawl thawn a tul mimi kan tawlrel.

Himi hnu ah Dr.Tint Swe,1990 election ih Pale khua ihsi MP tling,kan school council chairman cun Pu Suu Kyi rat ding thu ah ziang ha nan theih i ti ih,ziang hman ka sim mai lo.Cule kan school council member ,Pi Suu Kyi ih rualpi thazet nu,India mi Malavika cu kan director ih a  sim ruang ah Malavika cun school council member dang pawl  teh na sim hrih maw I ti.Himi hnuah kan director pa hnen ah ka mail ih,rak sim aw i ti ruang ah Dr.Tint Swe lawng cu ka sim hrih ih,himi hnu lawng ah Pi Suu rat dan ding a thei fiang.

Hmun 2 ih rak hmuah ding thu kan rel

Hiti a si hrih nan COP Ruchira in nan tlawng ah community hotu pawl Suu Kyi in hmuh a  duh a ti ruang ah kan tlawng le a fate si hotu 20 lai kan hril lawk.7-11-12 ni ah Dr.Tint Swe le Kim le Yin Naing pawl kan tlawng ah an ra ih Burma mi a tam bik ih rak hmuah thei nak ding ah Oxford tlawng,Vikas Puri  khalah rak hmuah siseh kan titlang ih,kei in Chief of Protocol hnen ah phone sal in ka tlawng ah thai sun rori ah palai run thlah uh ka ti.Officer 2 an ra.An mah thawn hmun 2 ah rak hmuah siseh la,kan ti ih Oxford school ka va zoh.Oxford school hi Burma ih suak Vai U Maw Thiri,( a thi zo ) ih tlawng a si ruang ah a a sung khat pawl cun Suu Kyi rak hmuah an cak zet.
Himi zan ah COP office cun hmun 2 in rak hmuah an lungkim thu in sim.10-11-12 ni ah kan tlawng ah community hotu pawl kan tong khawm aw ih cunah committee thar tla kan din.Kei cu kan tlawng hrang ih ka tul tuk ruang ah cui committee ah ka tel lo.

14-11-12 zing ah Police Security pawl ih in dil vek in motor 1 sang in kan tlawng ih rak um ding pawl ih list ka va pe.Himi zan ah Jawaharlah Nehru  Memorial lecture ih  Pi Suu Kyi ih thusim kan va ngai.Himi zan hi Pi Suu Kyi ka hmuh hmaisa bik tum a si ih,himi zan ah nazi 11-30 ah ka it nan ka ihthat thei mai lovi,zing lam nazi 2 hrawng lawng ah ka it hmang.

Ratu  khua ih ka mang ka thei sal

Himi zan ah thu tampi ka ruat ih,tu hlan kum 36 lai  1976 ih Ratu high school,Mizoram ih hna ka rak tuan lai ih zan khat ih ka mang tla ka ruat sal nasa.Ka mang cu hitin a si.Kei kha kha lai ah Ratu khua ih milian bik Pu Lal Zela tei inn ah rawl man kuan in ka um ,zing khat cu lakphak kan in lai ah Pu Zela leh  an inn um pakhat Pu Sangliana,Zemabawk mi,Social Education Organizer pawl thawn kan to khawm ih,kei cun mizan ih ka mang ah kha lai ih West Germany Prime Minister Helmut Schmidt pawl thawn thu kan rak rel tlang tiin thildang pipa ruat lem lovin ka sim.Pu Sang Lian cu a hni ciam co ih,a va mak ve aw,Inn  khat ah kan um tlang ih nang in hivek  mang na man i ti.Cui ka mang cu ka nghilh men ih,1985 in international level leader,India Prime Minister Rajiv Gandhi kha Mizoram press mi pawl thawi kan ton khal ah hi mang hi ka thei sal lem lo.Cui tum ah cun Rajiv ton thei nak ding ah kei ih poimawh nak khal ziang hman a um cuang lo.Tui tum ih Pi Suu Kyi ton nak ding ah cun Burma mi pawl lak ah India a cozah in in run contact hmasai bik i,cui tlun ah Pi Suu Kyi rak naih rei bik,rak be tam bik khal ka run si  leh tikah,ka mang cu kan ton hlan i si khal in ka thei sal nasa fam teh.

( Suak leh ah Pi Suu Kyi I thusim lai cawl ding ih ka kham  dan!)

%d bloggers like this: