Burma Ram Feh Dan Ding Part 53

 Pi Suu Kyiin Democracy Kan Si Hrih Lo A Ti.

Mizansun  tlai lam (14-11-12 ) ih New Delhi Vgyian Bhavan ( Science Hall ) ih thu sim Burma ram ih National League for Democracy hotunu Pi Suu Kyi cun Burma hi democracy ngai ngai a si hrih lo ih cumi hrangah in bawm uh a ti.Himi  hall hi hall tum zet a si ih,mi 1400 lai tlem a si.Mi 1000 lai  cu kan si ding.Cunah Burma mi 150 lai kan tel.

Thu an sim hlan ah lawyer pu Thio Cin hnenah thu simtu pawl hin Burma ti maw Myanmar ti saw an hman ding, kan zoh hnik ding ka ti ih,Jawaharlal Nehru Memorial Fund ( Trust ) chairperson Pi Sonia Gandhi ih thu a sim  nak ah Burma ti a hmang  taria ih,ka lung a kim nasa.Cui hnu ah Pi Suu Kyi in ziang tin a hmang ding ti ka ngai ringring ih,a nih khal in Burma ti a hmang tho tho.India a cozah ah cun Burma ram ih ralkap pawl ih duhdan in Myanmar ti hi an hmang a si.Banner lawng ah te Suu Kyi cu Chairperson ,NLD,Myanmar tiin an ngan.

Sonia Gandhi cun hitivekih leitlun ih an ngaisan mi Pi Suu Kyi kan hnen ih a um thei hi lungawi a um nasa a ti.Nehru hi Sonia Gandhi ih pasal,Rajiv Gandhi ih nu,Indira Gandhi ih pa a si ih,1947-1964 karlakih India Prime Minister a si.Amai hmin ih an tuah mi award hi Suu Kyi hnen ah 1992 khan an pe ih,tangka Rs.10,00000 lai a keng tel.Hitawk lai ah hin Pi Suu Kyi hi house arrest ih a um lai a si ruang ah himi laksawng hi a la thei lovi,hi Nehru suah cam November ni 14 ah hin thu tla a rak sim thei lo.

Tui kum April thla ih India PM Man Mohan Singh Burma ih a feh tum ah Mohan Singh leh ruling Congress party president Sonia Gandhi cun Pi Suu Kyi hi India ram ih tlawng ding ah an rak sawm a si.Pi Suu hi 13-11-12 suh ah Delhi a ra thleng ih, PM Mohan Singh cu a tong zo.Mahatma Gandhi leh Nehru pawl ih ruak an ur nak ah pangpar tla a ret zo.Hindu pawl hi an thih tikah an ruak an ur theu. Lecture a pek nak ah hin Sonia Gandhi tlun ah mi pawimawh dang cu India Vice President Mohamed Hamid Hansari leh India cabinet minister hlun leh Nehru Fund ih Vice Chairman a simi Dr.Karan Singh tla an tel.

Himi zan ih thu sim hi 6 PM leh 7 PM karlak ih neih a si ih,hinah Suu Kyi hin minute 30 lai thu a sim.A sim nak ah Burma ram hi democracy ngai ngai a si hrih loih,cui ruang ah India mipi pawl khal in in bom lai  a  tul a ti.India ram tlun ah lungawi lonak na nei maw tiin in sut theu a ti phah in a cozah pawl cu an thleng aw theu ih,mipi le mipi kan duhdawt awk ding hi a thupi a ti.Pi Suu cun a pa Aung San le Nehru Pawl ih an rak tuan tlan dan pawl tla a sim.Burma ram ralkapih an uk lai ih India ih Burma democracy hrang tuan tu pawl a bom tawk lo lawng te ah a riah sia a si a ti

 

Pi Suu hi Delhi a thlen zan ah Sonia Gandhi in zanriah a  ei pi ih,14-11-12 zan ah India parliament speaker nu in zanriah a ei pi.Pi Suu Kyi hin  16-11-12 zing lam 9AM ah college a rak kai nak Lady Sri Ram college ah tlawngta pawl a tong ding ih,himi hnu ah Prospect Burma tlawng ah a feh ding ih,himi hnu ah Burma mipawl tong ding in Vikas Puri ih Oxford school ah a feh ding.himi tlai nazi 4 ah Bangalore ah vanzam in a zuang ding.

Pi Suu Kyi hi ram hotu vek in India khal in a rak zoh a si.Burma tlawngta pawl um nak Prospect Burma school ih a feh nak thu leh Oxford school ih Burma mi pawl a ton thu suak leh ah ngan a si ding.

%d bloggers like this: