Burma Ram Feh Dan Ding Part 51

Publication Board Kan Din A Tul


Kan ram tthanso kan duh cio ih,cumi ding ah cun calai ih si theihkaunak pek a tul ti khal kan thei thluh cio ko.Himi ding ah hin cauk tam pi kan tuah a tul.Cauk ngan lam ah cun ka tuan tam hrih lo nan cauk tam kan neih a tul ti cu kan thei cio ko ding.1992 hrawng ah khan a si hmang Aizawl ah zan khat cu ka Pu  Dr.Za Hlei Thang thawn thu kan rel tlang ih,cu tawk ah cun ka pu cun Haka pawl cun cauk an nei tam tuk zo i ti.Kei cun ziang zat ha an neih ka ti ih,a tong lovi,20 maw 30 maw 40 maw,ka ti.Cu zat hrawng a si ko,i ti.Cutik ah cun kei cun ram a that cun kan tuan tlang thluh ding ih,cu zat cu kan tuah ve mai ding ka ti.

Cumi hnu ah kei cun Aizawl ah press nei na na na cu Pu Tial Khal i cauk 2 le Pu No Than Kap ih Sadu Sandar Sing cauk pawl kha kei mai sum cem in ka print ih,a lak in mi ka zem tir.Cule cumi tikcu hrawng ah kan nau Van Nei Kam ( Saya Phun Kar i nau ) thawn thu kan rel ih,a nih cun Falam ah FBA in press tha tha kan nei i ti.Kei cun press tha nan nei nan ziang hman nan tuan cuang lo ding,Saya Sui Lian Mang pakhat tluk hman in cauk nan tuah lo ding ka ti.

2002 ah Atlanta ah Falam pawl mi 25 lai maw si in seminar nan nei ih,cunah cun kei tla paper siar ding in in ti.Ka paper cu “Mizo calai a thanso dan leh Laimi ih kan cawn thei dan “ti a si.Cumi hnu tawk fang ah Pu Thawm Hlei Mang in  Lailu Foundation letter head in ca i kuat ih,Falam Chin Acedemy of Letters din seh la,nang mah in in ho thei aw la i ti.Kei cun ka lung a kim ko,a si nan sum nan suah kei,cumi sum pawl cun kan Laicauk ngan pawl kan bom ding,cuti lo ah cun cauk kan nei mal tuk,ka ti.Cumi hnu cun ziang khal in sim bet nawn lo.

Tu ram a tha thlang ih,cunah cun cauk tuah nak publication board kan neih a tu lding.Himi hrang ah committee a um ding ih,cumi committee cun cui committee feh tlang ih cauk print ding pawl print tha a si le si lo a zoh fel ding.Hitawk ah hin Aw le O ah buai lo mai kung.A ngan tu ih a thiam dan dan in si mai seh.Cui pawl ta kan lei sak lo ding kan tia awk sung ah cun kan thangso thei lo ding.Cauk tuah tu pawl,committee ih a lungkim mi pawl cu cauk tuah duh tu in a mah ten print man a kuan ding ih,cule distribution le selling khal a mah te a tuah ding.Copy 1000 tal print thei a tum ding.Cumi ah committee ih mawhphurh nak cu cauk tuah tu pawl kha $200 maw 300 maw in  a bom ding.Hiti kan tia a si ah cun kan Falam Laicauk kum khat ah 30 lai cu a suak tent teng ding.Mzoram ah kum khat ah a thar bu 120 lai a suak theuh.Himi ding ah sum hnar sawh cu kan hawl tlan a tul ko fam teh.

Suak leh ah cauk bu khat suah a harsat zia kei mai hmuh ton nak in ka run ngan ding.

%d bloggers like this: