Burma Ram Feh Dan Ding Part 48

Nitin Thuthangca Kan Tuah A Tul  ( II)

 

Thuthangca Thehdarh Dan Ding Ah

Business ah management kan ti khal le a dik ding ih,hmun tampi ah cun distribution kan ti khal le a dik tho tho ding.Cuti vek in newspaper business khal ah distribution hi a thupi zet.Ziang tluk ih press tha khal ah su in ziang ti vek khal in a news pawl tha in thla zuk vek khal tha khal seh la distribution a that lo ah cun a copy a darh kau ding vek in a kau thei lo ding.

Aizawl i Vanglaini thuthangca thawn tah tthim la la bang seh la.Tu hi offset press tumpi ih  an sut a kum 11 nak hrawng a si thlang.A copy khal 30,000 hrawng a si.A tam zet ko.A si nan American standard cu a ban lo nasa.USA ih Alaska state khi kau zet a si ih,Burma hnak ih tum Taxas hnak khal in a kau.A si nan mi an mal zet.Tu ah tak ka thei lo ih,mi 700,000 hnak cun an tam lemlo men ding.Mizoram ah cun mi 1,000,000 an um zo.Alaska i thuthangca tumpi pakhat cun ni kht ah copy 60,000 lai an print.Mizoram le Vanglaini hnak in a tam sawn law law.Alaska ah distribution an tuah tha tuk ti nak a  si mai.An Lian ih a lei thei tu an tam cu thudang.

Tu ah Vanglaini pawl cun kan dung kum 3 lai ih sin motor 2 lai an lei thar ih,cui motor pawl cun zan nazi 9 lai ah Vanglaini press ih sut hmasa pawl cu Lunglei lam ah an phur.Lamzin tluan ih khua hmuah hmuah ah Vanglaini cu an pe.Lungeli ah zing nazi 5 lai ah an thleng ih,Lunglei mi pawl in Aizawl mi pawl vek in zing nazi 7 hrawng ahVanglaini an siar thei.A si nan himi ah  that lo nak pakhat a um.cucu zan nazi 9 ih Lunglei lam phur man ding in an tuan ruang ah news thar zan nazi 7 tiang hrawng lawng an nghak thei,Zan tin nazi 7 hnu lam ah news thupi zet zet a thelng thei ih,cui pawl cu an telh man nawn lo.

.Prime Minister hlun Rajiv Gandhi tla kha zan nazi 10:30 hrawng ah a si an kah that.Cunah cun tui an ti dan  vek ah cun Vanglaini cun late news a telh thei lo ding a si mai.Kan nih cun ka ngan zovi,zan nazi 10 tiang tal news  kan nghak theu ding.

Cule a thai zing ah vanzam in kan newspaper  pawl cu Rangool ih sin Kaleymyo ah a phur ding ih,Kale ah nazi 9-10 hrawng ah thleng bang seh la,motor cycle 5 lai in an rak ngahk ding ih,a then Anteng lam,a then Cekan Sadaw lam,a then Letpanchhawng Min Hla lam ah an phur ding ih,a sun nazi 12-1 hrawng ah mai inn ciar ah an siar thei ding.

Mortor 1 in Falam lam ah a phur ding ih,Falam ih sin Haka tla ah an kuat sawng sin ding.Falam ih thleng pawl khal milai in Falam peng hmun 5 hrawng ah thenaw in an phru ding.Falam peng Lai khaw te ah cun a ciopy a tam thei lo ding ruang ah zarh khat ah vawi 2 lawng maw tla an ngah ding.Falam khawpi ah cun vanzam tum zan ah an siar thei ding.

Kalemyo ah circulation manager pakhat,cu le Falam ah pakhat kan nei ding.Ral ring zet in kan tuan  cing in thla 6 sung tla cu a man kan ngah ding hi 30% kan ngah cun a tawk tuk ding.2007 ah khan Vanglaini editor Pu K.Sapdanga Delhi ah a ra tlawng ih,cu nah cun “Pu Sap,Mizoram thuthangca pawl ah lo zuam tu an um nawn lo sikhawh,a man nan ngah ding ih 75% cu nan ngah lo ding maw ” tiin ka sut.Minute 3 lai a ruahawk hnu ah 65% hrawng  kan ngah ding a ti.Daily paper pawl ih a man ngah kim hman ah a hlawk nak a um thei hrih lo.Advertisement (Faknak ) a tel lo cun.Hi pawl hi ni dang ah kan ngan leh ding.

%d bloggers like this: