Burma Ram Feh Dan Ding Part 47

Nitin Thuthang Ca Kan Tuah A Tul (I)

Kan ram khal a  tha vivo thlang ih,kan dung te i a cozah ih an puan nak vek a si ah cun nakum isi cun nitin thuthangca (daily newspaper ) pawl tuah sian a si ding an ti.Tu tiang ah cun magazine pawl lawng sian hrih a si i,magazine pawl cu censor ( suah hlan ih  acozah i zohfelnak ) a tul nawn lo an ti.Nitin thuthang ca sin sin cu suah hlan i in zohsak ring ring  a tul ah cun a tikcu khel i suah thei a  si lo ding.Kawlca i suahmi pawl an suah thei i,censor a tul lo ah cun Taingzinta tong pawl khal cu an sian sak a tul ko ding.

Cuti cun kan nih khal Lai tong ih nitin thuthangca suah  thei a si ah cun kan suah teng teng a tul ding.Ziang tik khal ah Lairam ih tlangtong hrang ah kan zuamaw thluh kovi,hi nitin thuthangca hi kan nih kan tong ticak tu tum zet a si ding.

Himi ding ah hin sum tam zet cem a tul ko.England ram ih politic lam ih thupi zet London Times daily khi kan dung kum 15 hrawng ah cun sum le pai ah an hlawk lo ruang ah a  thi zik zik theu ih,a neitu an thleng aw zawk rero.A neta bik ah Australia mi media mogul Rupert Murdoh in sum tampi cem in a tinung fam teh.Sum $ million 200-300 lai cem in  a neih isi kum 3 hnu hrawng lawng  ah a nung ngah ta a si.

Kei Aizawl i ka um lai ih Zoeng ka tuah hnu Hnehtu daily ka tuah dan le ka tan dan mal te in ngan bang seh la.Kan suah hmasa bik ni kha May ni 8,1990 a si.Copy 2000 in kan thawk phawt in,thla 2 sung lai cu copy 1000 lai cu a lak in kan zem ring ring ti nak a si.Hnehtu hlan ah Vanglaini paper kha zing ah an zem theu vi,a si nan an daithlang ih,kei cun taima zet i ka run ti tikah Hnehtu copy cu a thla a thla in a tam vivo mai.Cuti cing in kei khal in thla 2 sung lai cu zingtin in Chaltlang,Zemabawk le Durtalng pawl ah copy 500 lai scooter in phur in a zemtu ding ih  ka rak hawl cia mi pawl hnen ah ka va pe theu.Cui pawl cun an run zem thei ring ring lo nan a rang bik in Aizawl khawpi ah Hnehtu thuthang ca cu ka ti hmin nei tir man.

Cuvek tho tho in Rangoon i sin nitin suak thuthangca thar kan tuah ding i,cumi hrang ah sum tampi kan tul ding.Kan milian pawl 10 lai ih tanlak tlang a tul ke.Kei kha Aizawl ah thla 2 sung cu hloh zuam in (Rs.20,000 lai ka sung lawk ) ka tuah i,thla 4-5 nak hrawng i sin cun ka run miat ko.

Milian pawl nan tang tlang ding ka ti  nan a press tla cu Rangoon ih press tum bik pawl man nei ih kan hman,kan san lawk a tul ding.Cuvek press pawl cu Kalemyo ah a um lo ding.Rangoon ih kan thuthangca kan sut nak hmun ah editorial staff pawl cu zantin nazi 11 tiang hrawng kan um ding ih,a thai zing ah a zan lai nazi 4 hrawng i sin motor in vanzam tumnak ah kan phur ding ih,cumi ni nazi 9 hrawng ah  Kelemyo a thleng ding.

( Suak leh ah peh leh ding a si .)

%d bloggers like this: