Burma Ram Feh Dan Ding Part 43

President Thein Sein in Pi Suu Kyi Ka Lungkim Pi Thei Ding a Ti

Tui tum ah Pi Suu Kyi cu American Congress ( Parliament ) i pek  theimi i sang bik Congressional Gold Medal la ding le thu dang dang ti ding in USA ah zarh 2 lai rei in a tlawng i,himi fang ah Burma President Thein Sein khal cun UN General Assembly hmang ding in a feh ve.UN office um nak New York hi cu ram pakhat president a si vek in a feh thei nan hmundang cu USA a cozah in feh thei nak pe lo sela cu feh thei lo ding a si.Burma ram ralkap uk an si lai i ralkap hotu pawl i umdan tha lo duh lo nak ti lang nak ah President Thei Sein le hotu hrek khat  pawl cu USA le Europe i tlawng thei lo ding i cui ram a cozah pawl i rak ti mi a si.Thein Sein cu tu i si USA i a  duh nak nak hmun ah feh thei ding in USA a cozah cun siannak a  pezo.Hotu hlun Gen.Than Shwe lawng te tlawng thei ding a si hrih lo ding.

President Thein Sein i UN i thu a sim  nak ah Burma ram reform a tuah mi cu dung lam ah a sip nawn lo ding a ti i,Pi Sui Kyi khal cu hna kan tuan tlang ring ring a si a ti.Himi hnu ni 2 nak ah BBC thawi interview an tuah nak ah Thei Sein cun 2015 i hrilawk nak i mipi i Suu Kyi an hril a  si ah cun a pom pi thei ding thu a sim.Hihi Pu Thein Sein i hiti vek i Suu Kyi i thu a sim a vawi khat nak a si.A sim bet nak ah tui danpi vek cun Suu Kyi hi ziang tluk i mipi an duh hman ah President a si thei lo ding i,cumi danpi thelng nak ding lawng ah a mah pakhat i thu a si cuang lo a ti Himi danpi a ti mi hi President le Vice Presaident si ding cun an sung khat nai ramdang mi an si lo ding ti a tel.Hihi ziang tik hman i Suu Kyi i rampi hotu lu a si thei lo nak ding i an rak timi a si.Himi ah hin an mah le an mah tla an awk aw zo.Kan dung lai i si nak i si a bang mi Vice President Tin Aung Myint Oo ai ah khan Gen Than Shwe khal i a duh zet mi Rangoon chief minister Myint Shwe cu ret an duh nan Myint Whwe i fa pa maw fanu si maw khan ramdang mi pasa/nupil ah a rak nei zo vi,ramdang ah an um i cui ruang ah Myint Shwe cu Vice President ah an re thei ta lo a si..Pu Thein Sein cun 2015 hnu ah zing vek i ram a thleng awk khal le ralkap pawl cu Burma ah an thupi tho tho ding a ti.

Pu Thein Sein hin a mai thu an suh nak ah a mah sawh cun 2015 cun politic bansan a duh nan mipi i tuan bet ding i an ti ah cun a tuan bet ding thu a sim.BBC cun ralkap uk lai ah khan Burma ralkap pawl in taingyinta nunau pawl an kai i,mipa pawl an that timi thu pawl an suh nak ah President pa cun Burma army cu dan tha zet thlun mi an si i,cu vek i thil tha lo an ti lo a ti.

Burma army hi nunau thawng tampi an pawngsual i mi tam pi tul lo cing in an that ti cu leitlun theih a si nan President pa hrang ah cun hiti a sim a tul ti cu kan theih thluh ah a cang fam teh.Army pawl hi ziang tluk in an rak sual ti cu democracy ngai ngai kan si tik ah cun kan thei leh thluh ko ding.

BBC hi ralkap a cozah san lai ah cun a cozah i an rak huatmi bik pawl ah a tel.BBC hi English in le Kawl in thu an than theu.Kawl i thu an than mi hi Burma ram sung ah cun mi thawngsawm in an rak ngai ring ring a si.Ralkap a cozah i a rakhuat mi bik BBC ah President Thei Sein cun a thiamthu a sim phah i,himi hrim hrim khal hi democracy lam ah kan feh deuh ti nak ah a cang a si hi.

%d bloggers like this: