Burma Ram Feh Dan Ding Part 04

Kum 7 sung Suu Kyi house arrest i a um lai ah ziang pawl a cang ti ka ngan hlan ah kan zohthim ding mi ram pakhat thu ka ngan hmaisa ke.Kan ram a feh dan ding thu kan ngan peh vivo ding i,cumi rual rual in kan ram khal i kan zoh thim thei ding mi pawl tla kan tarlang phah ding.Leitlun i ram ka uar bik mi pakhat cu Singapore ram hi a si i,1971 hrawng ah khan a si hmang Singapore in  kum khat ah senhri par an zuar nak in $800,000 lai an ngah an ti i,cumi tla cu ka mang a mang in ka daw nasa.Siangapore ram cu a fate tuk.Falam township,Kale township pawl hi square miles 1000 lai in an kau i,Singapore cu sq.ml 250 lawng a si.Peng 15 a sau i,peng 12 lawng a kau.Minung million 6 lai an um.

Singapore i tidai an lak dan pawl

Ram fate tuk si minung tam tuk si cu khui tawk i tidai an la ti hi ka thei duh zet.A ram a fate tuk i tiva tum pi tla cu a um thei lo ti a fiang.Tlang ti tlak a um lovi,hmunsang i si hmun niam ah tidai an luang lo ding ti khal a theih theih.2009 i Singapore ka feh tik ah khan kan makpa Aalian ( Van Thawng Lian ) in Singapore ram i tidai an khawl nak tili pakhat i zoh tir.A kiang ah motor pawl feh tir an siang lovi peng 1 lai maw si ke in kan feh.Tili mawi zet a si i,lawng hlau zawk rero pawl an um.A kap ah hmun pawn/hmun sang te te an um i,thing tum pi pi in an khat.cule hmun khat ah hmun sang i si hmun niam i tidai luang/put ka hmu i ka lung a kim zet.

(1) Cu ti cun Singapore i tidai an lak nak pawl cu a hmaa bik ah Malaysia i sin an lei mi a si.Malaysia ram in tlangpar i tidai tha zet cu pipe tumpi in peng tampi hlatnak in Singapore tikulah an an la.Hi hi Singapore i tidai a lak nak bik a si.Malaysia i tidai pawl i lak thei si lo bang seh la!

(2)A tlun i kan sim zo vek in Malay tidai hi zing ruang ah maw a um lo pang le tiin Singapore hin tidai khawl nak tili 4/5 lai a nei Malay tidai hi tuihnu kum 20 lai lawng lak ding in ca an ngan.

(3) Tidai an  lak dan a dang leh cu,Singapore ah hin ruah a sur tikah ruah tii pawl hi a lak in an luang hlo lo ti a si.Khuai tawk khuai tawk in maw an rak dawh thluh i,cu cu a tul nak nak ah an hmang.

(4)Tisia ( rawl suan nak ti,toilet ti,thilsawh nak tidai ) pawl khal a lak in an luang lo.A khawl nak ah an feh thluh i,cu tawk ah an rak thlit fim thluh.A fim zet.A si nan minung in ding em ah cun an hmang lo.Industrial use/air condition cet pi pawl ti daih nak vek ah an hmnag.

(5) Tipi thuanthum i tidai  al cu thlit fim i titha ah an cang tir.Himi tuah dan hi Singapore cun an thiam zet nan sum a cem tuk ruang ah tampi an hmang duh lo.

Singapore i um pawl cun leitlun living standard sang bik i um thei cing in nikhat ah cawhrual in tidai litre 150 hrawng an hmang an ti.Tidai liter 20 hi bucket pung 1 a si i,kei hin thil sawh nak ,rual suan nak le a dang pawl ah ni khat ah tidai liter 80 tluk ka hmang thei men.Singapore pawl thawi living standard bang aw zik USA i um pawl cun nikhat ah tidai liter 650 lai an hmang ti a si tlat.

 Kum 2003 i sin 2010 tiang i Suu Kyi um dan

Kan ngan zo vek in General Than Shwe khan Suu Kyi hi tuanpi a rak duh lo law law.Lei tlun i an biakawk tir khal ah a duh lo nasa.Than Shwe hi a lal sung kum 19 lai ah Suu Kyi thawn hin vawi 2 fang maw si an hmu aw aw.Than Shwe i biography ngan tu Benerd Rogers cun Than Shwe hi a mah hnak i ca thiam tuk,lei tlun i ngaihsan mi Suu Kyi thawi an ton awk ah hian naum a ti lo  nsas a ti.Rogers tho tho cun leng lam i kan rak rin hnak in Than Shwe hi English a rak thiam a ti.

2003 May thla i Depeyin i Suu Kyi  thah an tum hnu tui kan rel mi kum 7 sung hi Suu Kyi hrang ah cun can hrehum  bik pawl a si men ding.A pasal thi zik hman kha an hmuh tir lo a si kha.Michael Aris cu Rangoon ah ra hlah seh,na duh le London ah va feh aw an ti men a si kha.Suu Kyi in le London i a va feh cun Burma ah an kir thei nawn lo ding ti a thei fiang tuk fawn.Himi tum ah hin a fapa 2 pawl khal a tong thei nawn lo.cutin cun a fapa 2 khal cu pa in thihsan,nu in ram hrang i a pek awk ruang ah thawng tlak san in an thanglian a si.

Himi kum 7 sung ah hin Insein thawng inn i thla 2 lai maw si thawng an tlak tum a um.Suu Kyi na na na cu Insein jail khal ah hmun tha deuh ah an um tir.Himi kum 7 sung ah Suu Kyi tawng thei ding i an sen sak mi pawl mal te lawng an um.UN lam pawl i sin a si deuh.Vawi khat tla cu Indonesia President pa rori Burma ah a ra i,Suu Kyi ton a dil nan an sen lo.

Tum khat tla cu thla 3/4 lai zo hman in an tong thei lovi,cumi lai tla ah cun  aa ding in sii tla an pe pang ke maw aw ti in ka phan sak nasa.

( Suak leh zah Sui Kyi hin inn sung ah hi kum 7 hi ziang tin a hmang ti run ngan a si ding.)

%d bloggers like this: