Burma Ram Feh Dan Ding Part 37

Burma in Nuclear Bomb Tuah a Tum Nawn Lo!

Tui kum June ni 4 ah khan Singapore ram i defense minister pawl meeting nak ah Burma ram i khatilai i Defense Minister Lt.Gen. Hla Min cun Burma ram cun nuclear bomb tuah lam a tum nawn lo a ti.Hla Min cun Burma hin nuclear research lam cu a rak tuah nan cumi cu  electric power ngah nak ding lam lawng ah a si a ti.

Minister hin Burma in N. Bomb tuah a rak tum dah lo a ti nan Singapore i thu a sim i bomb tuah a thulh thluh a ti tik ah tum khat laiah cun tuah a rak tum dah ti cu a fiang a si.Thu thei kau lem lo pawl tla cun Burma in N. bomb 1 lai cu a nei ti tla an rak um.
Burma in N. bomb tuah a tum ding ti thu hi kum 2002 hrawng i sin a rak um zo vi,himi ah hin hrek khat tla cun ram cawisan nak ah hmang in ralkap a cozah tla kha titha an rak ti man a si.

Burma hin Russia ram ah engineer 1000 lai maw a rak thlah i,cui lak ah cun nuclear engineer 100 tlun an tel.Russia ram bom nak in megawatt 10 i cak nuclear reactor tla a rak tuah.Himi 10 MW cak kawl hi cu bomb tuah nak ah cun a fate tuk ti a si.

Himi thu a um lai ah kei cun Burma cun a tuah suak lo ding,a tuah ngai ngai ah cun USA in a nuai mit ding ka rak ti theu.1971 lai ah khan US Secy. of State Henry Kissinger cun Pakistan i bomb a tuah ding a duh lo tuk ah Pakistan hotu pawl hnen ah ” Don;t insult the intelligence of the USA “ti in a rak hro dah.Cuti cing i Pakistan i a rak tuah thei tho tho nak cun kan cahram ah cun ngan ding cu a si ta lo..
N. bomb tuah ding hin sum tampi a tul.Burma i 2010 i hrilawk nak hlan ah khan Burma minister pakhat cun Burma vek i ram rethei in ziang tin so N. bomb a tuah thei ding tiin a rak ti dah.

General Than Swe khan tum khat ah cun ziang ruang ah N.Bomb tuah a rak ruat dah tiin zoh tlang uh sih. A tlun lam i kan ngan zo vek in raklakap a cozah mipi i an duh lo tik ah cun hemi bomb nei thei ram i an can tir thei ah cun mi tampi in ralkap a cozah hi an ngaihsan phah ding ti a si.Cumi tlun ah,vawi khat lai i Australia ram i tlan Burma ralbawi 2 cun Burma ram i milian bik Tey Ya i tong an thei dah an ti.Tay Ya cun kan pu Than Swe hin hitin a ti an ti.Burma hin Thailand ram hi economic thanso nak lam ah kan ngam lovin,cui ruang ah N. Bomb kan neih hmaisak cun Thailand in in tih phah ding a ti ti a si.Cui tlun ah kan dung kum 2 hlan i Burma ram tlan san tu Burma army major pakhat cun Burma ram i missile rocket pawl tuah a tum dan pawl a phuang suak thluh.N.bomb tuah a tum a ti lo nan missile pawl hi N.bomb phur tu ding ah tiin a ruah theih a si.

Burma hin rak tuah tum ngai ngai seh la zawi bom nak i sin so a tuah ding ti suh nak a um la la thei.Russia hi cun Burma i bomb a neih tiang i bomb cu a duh lo ding.Ziang ruang ah Burma engineer pawl training a  pe ciam co ti le,pakhat nak ah sum a  duh ruang ah a si i,pahnih nak ah USA a phir sit duh ruang ah a si.China in teh a bom ding maw ti suh nak ah China le Burma cu Burma i ralkap a cozah san ah an naih aw zet nan Burma i N. bomb a neih ding cu China cun a duh lo ding ti cu a fiang la la.Cu a si ah cun North Korea lawng a tang .

N.Korea cun Burma i bomb a tuah ding hi a bom duh ding.A san 2 tal a um la la.Pakhat nak ah cun sum a  duh a si mai.Pahnih nak ah cun amah N.Korea vek i ram huatsuak dang an um ti hi tilang a duh ding.

Gen. Hla Min cun Singapore i thu a sim nak ah Burma hin tu hlana ah cun N.Korea hi a rak kawp nan tu ah cun democracy lam i kan feh ruang ah N.Korea thawn an kawp awk nak pawl cu a su cat thlang a si a ti.Tui President Thei Sen ho Burma hi cu ram huatsuak si cu a duh lo law law ti cu a fiang nasa a si hi.

%d bloggers like this: