Burma Ram Feh Dan Ding Part 35

Then Sein le  Suu Kyi An Biak Awk Hmaisa Bik Tum

Kan ngan zo vek in nikum August thla ah cun Burma ram cun a hmin in democracy vek ah a cang nan a hlan vek tho tho a si ti cu kan thei thluh ko ding.Pi Suu Kyi hi November 2010 ah khan house arrest in an suah i cumi hnu ah thuthangca pawl thawn an be aw thei.A si nan ziang hman politic zawng in a cang thei cuang lo.

Egypt ram ah an president Mubarak cu nikum February thla ah an thlak thei i,cumi tum in Sui Kyi i BBC radio le TV thawi an tonawk nak ah a nih cun Egypt cu kan daw nasa,ol te le reilo te ah democracy an ngah i a ti.A ti duh nak cu nikum February ah khan Burma kha democracy a si lam lam lo a ti nak a si.

Tui kum i Europe i ram 5 a tlawn tum ah khan Suu Kyi i Myanmar ti ai i Burma ti tongkam a hman thu ah khan Burma hotu pawl in an sawisel.Cutawk ah cun Suu Kyi cun ka duh duh ka tong ke cu,democracy kan si si a ti ta ria.

Hiti vek i Suu Kyi hman i ti thei ding i ram a thleng tu cu Suu Kyi le Thein Sein an kawp awk ruang ah a  si ta.Nikum August thla hlan ah Burma politic sung ah ziang a rak um ti hi tu ah cun kan thei tam thei hrih lo ding.Ni khat khat ah Suu Kyi in maw U Thein Sein in maw an thu hla cauk i an suah a si le kan thei leh ding.Siar a cak um nasa.A si nan himi hlan ah ziang a rak um ti cu ruah thei cu a si ko.

General Than Shwe khan lungkim zet in nikum April thla ni 1 ah khan Thei Sein hi President ah a hril cu a si ko.Hihi ziang ah ti le khalai i Burma ralkap i top 5 pawl lak ah Thei Sein hi reformer,liberal le hmin tha bik a si ruang ah a si.Than Swe hin a mah cun a hruai thei nawn lo ti cu a thei.A kum a upa tuk zo.Khalai ah 77 a si man.Kum 19 lai ram a hruaia i a hlawh tling lo ti a thei.Cule Gen.Maung Aye i ram hotu bik run tuan ding cu a duh lo law law.Midang pakhat um lai mi cu Gen.Shwe Mann a si i,a nih hnak khal in Thei Sein a tha ding ti cu a thei ko.Thei Sein i ram a hruai lo ah cun Burma cu a cem sin sin ti an thei a si.

Cuti cun U Thei Sein cu President a ruang si ta.April le August thla hrek lak  thla 4 le a hrek kar lak ah kan theih ban lo mi tam pi a um ding.Gen.Than Shwe cun Suu Kyi run thupit ding cu a duh lo law law ti hitawk ah vawi tampi kan ngan zo.A si nan Arab Spring ruang ah Tunisia,Egypt le Yemen pawl i tlun ah Syria,Moroco,Jordan le democracy ngai ngai lo ram pawl ah thleng awk nak a um rero ti Than Shwe le Thein Shen in an thei tuk.

Ram tithat nak ding ah cun ralkap pawl hin Suu Kyi hi an tuanpi a tul ti a fiang thlang.Than Shwe khal in Thei Sein i Suu Kyi tuanpi a tum hi a lungkim pi ti cu a fiang ko.A si nan ziang tiang in an tuanpi ding ti  thu ah cun an sung ah cun elawk nak cu a um ve ko ding.

%d bloggers like this: