Burma Ram Feh Dan Ding Part 32

Hnamtenau Pawl le State Budget  II

Leilugtlun ah hin ram pakhat le pakhat khal sum le pai cuhaw i buai a si theu i,cuti vek in ram pakhat sung khal ah state pakhat le pakhat maw,state acozah le central a cozah maw khal cu sum cuh aw i buai ring ring a si.

Kan nih Burma ram sawh cu kan theih tlang vek in centralization ram a rak si i tlun ah ethnic Burman (Kawl ) pawl i duhtawk i in hruai nak ram a si i,Tiangyinta pawl (hnamtenau ) pawl cu thuneih nak khal kan nei mal i,budget sum khal kan co mal theu.

A cang le Tlangpar mi kan ti aw i,kan nih pawl  mipi hi 33 percent kan si i, kan ram kauh zawng ah cun 50 percent tlun kan si.Cutizat in kan  um nak a kau in mi khal kan  tam ko nan central i si kan comi kan budget cu amal nasa ke.Ziang zat kan co ti cu ka thei cek ci lo.Thei thei ding in kha lai i central a cozah pawl khan an tuah duh lo.

1969 i Institute of Economic college ,Rangoon i ka kai lai ah vawi khat cu khalai i Institute of Education i rector ( chancellor ) pa,a cozah party lam ah central committee member si ban in college luyechun ( out standing student ) si zo pawl kha meeting ah in ko.Cutawk ah cun kei in Taingyinta pawl hi minung khal ah 33% lai kan si nan budget ah cun 10% hman kan co ka ring lo ka ti.Anih in i san ngaihnak cu a thei cuang lovi,mithiam pawl ka rawn kei ka lo sim leh ding tiin meeting ah cun i tiam.I sim leh cuang ta lo.

Ram pakhat sung ah miphun phun khat lawng an um khal le,phun dang dang an um khal le an cuhawk bik cu political power le economic power a si theu.Tui tum ah economic power thu kan ngan i,himi thu ah India in ziang tin ha a tuah ti run ngan bang seh la.

India ram hi Burma hnak cun per capita income zawng khal in a lian tuk nan leitlun level ah cun ram farah ah a tel lai.Cuti cing in India cun hnamte nau pawl a ngaihsak nasa.

Mizoram i ka um lai a hmaia lam ah khan India central a cozah in Mizoram hi hi tivek in a bom tam thei ring ring lo ding an rak ti ve theu.A si  nan hotu pakhat thung cun ramri i um a si ruang ah a bom tam ring ring ding a ti.Cuti vek in Union Territory an si hnu kum 40 hnu le state an si hnu kum 27 hnu khal ah Mizoram cu sum tam zet zet in a vur theu.Mizoram lawng a si lo,Nagaland,Manipur,Arunachal Pradesh ,Sikkim le Jammu and Kashmir pawl hi mi pakhat ciar i sum an ngah dan ah India ram ah a sang bik an si theu.

Himi ka ngan nak ah Burma khal democracy ngai ngai kan si cun Chin state ( farah bik i ruat mi ) hi in duhsak cuang ding i,cutik ah cun Sagiang Tiang  Kalemyo disctrict i um Laimi hnak in Falam peng i um pawl in pakhat hrang ciar i siar in sum  kan ngah tam cuang ding ka rak ti.

Democracy ngai ngai kan si cun tlang parmi pawl i dinhmun a tha phah ding tiin beisei cio seh la.

%d bloggers like this: