Burma Ram Feh Dan Ding Part 30

CNF Dintu Pu Tial Khal I Thuanthu Bu Ca Uk

Kum khat lai a rei zo i,Delhi ah Pu Tial Khal hin a thuhla a ngan mi i hmuh i,cumi ka zoh cun suah tlak a si ti ka thei mai. Cule Laimi upa pawl kan ko khawmaw i,cauk cu tuah ding in kan rel cat.Cumi hnu i a tul mi cu tangka a si ta.

Internet i sin ka dil i,Ottawa,Canada i um Pu Ning Kee cun sum ka thawh ding a ti mai Amah pakhat lawng i sum cun a theih cuang lovi,cui ruang ah a rualpi pawl a sawm khawm.Cule Rihli i sin ka dil tho tho.Pu Tuan Ling in a naupa i sum $100 in run kuat.Cumi hnu ah Pu Tuan Hre Ling Calgary,Canada in a rualpi pawl thawn sum in run kuat.Azaten Rs.27000 lai a si.

Pu Tial i cauk ah a nau hak lai i Lian Duh khua kiang i Japan le Mirang kapawk nak,cule Falam i police a tuan thu,mi thawi an buanawk thu pawl a teli,cui hnu ah a nupi neih a ngan.Police meithal siat tuah a zir dan pawl a ngan.1960 hlan ah police i si a ban i MP cuh a tum thu a ngan.

Pu Tial hin kha lai i minister rak tuan zo Pu Za Hre Lian kha cuh a tum ti ka thei i,hi cauk sung ah cun Pu Hre cuh a tum ti cu a ngan lo.Amah ka sut i,Pu Hre rak cuh ka tum a si ko i ti.

MP cu a cuh thei lo  nan Ti Me party i general Secy.Falam district a rung tuan.1962 i Ne Win i a cozah a lak hnu i Falam party ho tu vek i Rangoon i vawi hnih vawi thum a tlawn dan pawl tla siar a nuam zet.

Ralkap a cozah cun lal ring ring an tum ti a theih tik ah Pu Tial cun acozah do tum in a pawk nan an kaih i Mongywa jail ah kum 3 lai a tang.

Cui hnu ah  MNF pawl i Falam an lak tum ah MNF pawl cu a thlun i,East Pakistan (tulai Bangladesh ) an thlen hlan i hramlak i Saya Thawm Luai pawl thawi an relh zawk rero dan pawl ngan a si.Bangladesh ah kum3 lai maw Pu Lal Deng i group pawl thawn an um i,cunah MNF pawl i Laimi an thleidan dan  pawl,India le Pakistan an doawk ruang i Laimi pawl cu a dang tei an tlan dan pawl,hram lak i pawpi le sai lak i an riah dan pawl le,cui hnu i Mizoram i si KIA bomnak lak tum i Kachin ram i an feh dan a ngan.

Kachin ram i an feh dan hi siar nuam ka ti bik men ding.Harsa zet i an feh hnu ah KIA hmunpi a phun phun an thleng i,cui hnu an tlun lam ah Kachin pawl in pistol 1,lung man khung malte le bing malte an ken.Pu Tial hi harsa zet tho tho in Sui Ling thawn Tamu lam an thleng leh.Harsa zet i Kachin ram an feh hnu khal ah  a tuan ding a hlawh tlin ta lo  Pu Tial hin ram a duhdwt tuk rual rual in leadership quality cu a nei sang lo  ti hi mi hin kan thei thei a si. .

A nupi neih dan pawl ah,vawi khat cu fala pakhat in nan inn ah ka ra um ding a ti i,cui ca cu a nupi in a rak siar i,cu nah a nupi thawn an thenaw.Bangladesh i a um lai ,Kachin ram i a feh zik i a thitmi a nupi thung cu tlangval pakhat in nan pa in ra seh a lo ti a ti i,zan tampi riah nak ah a tlun pi.Pu Tial cu a tlun leh hnu khal ah hi nu hi a duh nawn lo.

Chhawng U i a neih mi a nupi thung cu ,kutsih tu pastor pa in nan duh tik tik tiang nan nei aw kei,nan duh awk nawn lo tik ah nan then aw ding a ti.Cutin an thenaw leh.

 

Tui Burma Ram Feh Dan Ding i kan ngan hi cu mal te lawng a si i,a bu ngai ah nan rak siar a si ke cu.

(Visited 51 times, 1 visits today)
%d bloggers like this: