Burma Ram Feh Dan Ding Part 03

Pi Suu Kyi kum  7 ( 2003-2010 ) sung sir i hnawl a si
Pi Suu Kyi cu 1989 ah house arrest i kaih a si i,thawng a tla cing in a party NLD pawl cun 1990 i hrilawk ah seat 80% am hmu.A sinan ralkap a cozah cun thuneih nak an pe duh cuang lo.Pi Suu hi 1991 ah Nobel Peace Prize an pe.1994 ah an suah nan an kai thul,thawng an thla leh thul in an ret.
1999 i a pasal London i um Michael Aris cancer i a thih zik ah khan Michael kha Rangoon i an nu hnen i feh tir an siang lovi,Suu Kyi thung cu London ah na feh thei an ti.Suu cun Burma leng a suah cun a kir thei nawn lo ding ti a thei i,cutin cun a duh bik mi a pasal cu kum 6 lai an hmuhawk nawn lo hnu ah hmu thei cuang lovin a thihsan.Cule  2002 ah Suu Kyi cu an suah leh.1989 i sin ralkap a cozah i a duh bik mi cu Suu Kyi hin Burma suahsan seh la ti a si.
 
Ralkap  uk ram thangso pawl
 
Kan dung ah Burma ralkap a cozah pawl cun socialist system kan hlawn i free market i kan feh cun kan thangso ve ko ding tiin an ruat ding nan kum 22 hnu khal ah Burma ram cu a thangso cuang lo ti kan ngan zo.Hi ram thangso pawl hi ziang ruang ah ti tu kan zoh ding.
 
South Korea ah 1961 ah kum 44 mi army general Park Chung Hee cun a cozah sinak  a run la.Korea ram hi Japan ral an tuar hnu ah cumi hnak i nasa sawn Korean War (1950-1953 )an run tuar.Hi tawk ah North le South Korea ralkap  thawng za tampi tlun ah Chian ralkap 10,00,000 le American ralkap 250,000 an do aw i American 45,000 lai an thi.Cu tluk i an doawk ruang ah S.Korea khawpi Seoul tla cu a bal sek sek thluh.Cu ti cing cun Park Chung Hee hnuai ah S.Korea cu a thangso tuk i,1991 i Rangoon i college ka kai lai ah S.Korea embassy hmai i an thanso nak zuk pawl an tar mi cu ka rak daw nasa.
 
Taiwan ram khal Asian 4 tigers ah an telh ring ring.China President Chiang Kai Sheik kha China civil war i Mao Tse Tung pawl a neh nawn lo hnu ah Taiwan ah a ralkap 200,000 le milai million 2 thawn  1949 ah an tlan.Formasa ( Taiwan ) tikulh ah tan an la i,hna an tuan tha ciam co.An ram a thangso tuk i,Taiwan cun 1965 khan fahrah bom nak kan hai nawn lo an ti thei.Tu ah Taiwan le S.Korea,Singapore pawl cu Western European level an si.
 
Indonesia hi cu himi Asian Tigers pawl vek in a thang so lo i,President Suharto i a cozah kha a corrupt ve ko nan,zinan a suah i tlun ah hna an tuan tha i,Burma hnak cun hlan khal ah tu khal ah thangzo tak an si.
 
Europe le Amerca pawl cu an thangso tuk zo vi,growth rate percentage ti tam ciam co a theih nawn lo.Kum khat i 3% hrawng thang i an theih cun thangsos tuk ah an ruat aw aw.India cu 1990 tiang hrawng ah kum khat ah 4% hrawng a rak thng i,cu cu Hindu growth of rate tiin hnihsuak ah an run rel.Tu ah cun India cu 7% tal a thang theu i,2009 tla ah cu 9% hman a thleng.China ram sawh cu a thang law law i kum 20 sung lai cu kum tin 10% tlun in a thang.
 
Kum 40 sung kum tin 6 % hnak i tam an than cun economic growth tha law law an si i,cuti vek cu ram 6 an um.South Korea,Taiwan,Hong Kong,Thailand ,Malaysia le Singapore pawl hi kum 40 sung 6 % hnak i tam an thang ring ring i,cui ruang ah tu khal ah ram thangso tuk ah an cang.Cui pawl lak ah S.Korea le Taiwan pawl cu kum 50 sung (since 1961 ) kum tin 6% tlun an thang ring ring.Burma teh le.Kan dung kum 5 lai ah khan Burma khal cu 5/6 % in a thang an ti.A si ko ding.Asi nan mi na bese tuk thih zik rori a dam leh khal le thla tam pi a kum i rei a dam that nak ding a duh vek i Burma ram se tuk law mam tha ding cu kum rei tuk a tul ta ria.
 
Pi Suu Kyi Burma ram sung ah a tlawng.
 
Pi Suu cu 2002 i an suah khan a party  tuah tha ding in ram sung hmun kip ah a tlawng i,Chin state tiang hman a feh a si kha.Hmun kip ah mipi a thawng a thawng in an rak hmuak theu.Gen.Than Shwe i ho a cozah pawl cun Pi Suu i cang dan cu an duh lo nasa.A nun ring ring cun an hrang ah a poi ding a si si ti khal an thei.Cu le 2003 May thla cem ah Monywa khawpi kiang i Depeyin khaw kiang ah ralkap a cozah i hmanmi misual thawngtla an suah hrim mi pawl in ralkap pawl thupek in Pi Suu Kyi cu thah tum in an rak thua i,NLD mi 70 lai an thi i,Pi Suu cu a motor to mi in a tlan thei suak nan hriamhma tuar cing in an kai leh i,cui hnu thla thum li lai tla cu Pi Suu hi a dam maw a thi ti khal theih lovin a um a si.
 

( Suak leh ah kum 7 sung Pi Suu i um dan )

(Visited 55 times, 1 visits today)
%d bloggers like this: