Burma Ram Feh Dan Ding Part 29

RalKap San ah Khan Zo Pawl an Hlawk Bik?

World Almanac (Year Book 2009 ) ah khan Burma ram ah milai million 50 an um a ti i,cu nah cun ralkap (army,nave,air force ) 406000 an nei a ti.Burma i ralkap hi a hrek in 420,000 tla an ti i,ziang khal a si le 400,000 cu a si ko.South East Asia ram 10 sung ah cun Vietnam lawng in ralkap a nei tam sawn.

Ralkap san ah ralkap pawl in economic zawng in an hlawk pi bik ti kan ti theu vi,cu cu hun hawl hnik phawt seh la.Kan theih cio kovi,ralkap  men men lubawk pawl tla cu an harsa zet ti a si.Cui ruang ah ralkap sung ah officer bawi pawl cu an lian in an hlawkpi ding tih a theih ding.

Bawi pawl ziang zat an um ti theih hmaisak a tul ke.Kei ka pa kha army ah captain tiang in a rak tuan i,3rd,Chin Battalion ah a si i,ka pai hnatuan a tawp nak cu Pakokku khua ah a si.Ka pa kha B.company hotu a si i,ralkap 140 lai a ho.Khatawk lai ah cun battalion pakhat ah ralkap 650 lai an um.Tu lai ah cun battalion pakhat ah ralkap 200 lai lawng an um.Cui ruang ah tui lai ah cun ralkap 50 ah captain 1 um bang seh la,ralkap 406000 ah cun captain 8100 lai an um ding.Captain hnuai ah second lieutenant le lieutenant 10000 lai an um ke.Ka pa lei san ah cun ralkap 650 ah major 2 lawng an um i,tu lai ah cun ralkap 200 ah 1 um bang seh la,major 2000 lai an um ding.Cu le cuti vek in lieu. colonel le colonel hi ralkap 400 ah 1 um bang seh la,1000 lai an um ke.Colonel i cin cun officer sang tak an si.

Officer sang bik pawl brigadier general,major general,leu.general le general pawl hi 200 lai maw cu an um ding.Cu tik ah cun ralkap uk i lennak pawl a rak sawr tu pawl hi officer 21000 hrawng an si ding i,cucu Burma ram armed forces strength i 5% lawng an si ding.Hi officer pawl lak ah corrupt lem lo pawl cu an um ko ding nan ralkap men men hnak cun an canvo a tha law law ti cu a fiang ko.

A tangmi ralkap pawl,rifleman i sin sergent pawl 380,000 pawl lak khal ah ralkap uk rak sawr thei i mai tawk i rak lian cu ziang maw zat an um nan kan theih cio vek in officer si lo pawl cu an harsa zet ve a si.Cuti cing khal in ralkap hmuah hmuah cu ralkap uk ah sum le pai in an tha thluh ti in rak ti bang hnik seh la,hi pawl hi ziang zat ha an si ti vun zoh hnik kung.

Ralkap pawl 406000 khan a tlang pi thu in family an nei thluh ding i,an family pawl thawn mi 15,00,000 ( one and a half million ) an si ding i,kha ti lai i Burma ram i um mipi 50,000,000 ah ralkap family cu 3% lawng an si ta ria.Cui ruang ah ralkap  uk kha mi 100 ah 3 lawng in hlawk nak an rak co ti nak a si.

Mipi Civil mi lak ah teh ?

Aizawl i um milian Pu C.Sang Ci khi kan um lai ah Zarkawt i a inn khi Rs.ting 500 man tluk ah kan rel.Kha tawk lai ah Bara Bazar inn hmun tha sawn i Vai tei inn,Pu sang chi inn hnak i fate,a si nan a hmun tha sawn kha Mizo pawl in Rs.ting 300 in an rak lei.Cui ruang ah tu ah cun Pu sang i thil le ri hi Rs.ting 1500 man tal a si ding i,cu cu US $ cun 3 millions a si ding.Pu Sang hi USA khal ah um seh la millionaire cu a si hrim hrim.Burma ah millionaire zing zat an um ke le.Cucu Burma tu lai i sum thleng cun Ks.ting 8500 lai a si ding.Million 1 dollar i nei hi Burma ah cun 1000 cu an um ko ding.Very rich pawl kan ti ke cu.Burma standard i super rich pawl $ million 10-50 tiang nei hi 20-30 cu an um ding.Ziang khal le millionaire and above hi 1000 hrawng an um ding i,cu cu Burma population i .01% a si ding.Point one percent si lovin point zero one percent  hrawng lawng an si ding.Hi pawl hi cu an lian law law i,a dang very rich khal mipi i 1% cu an um ko ding.Hi very rich pawl hi brick building khal pahnih thum nei,motor car khal duh duh thleng thei ring ring pawl an si kei.Hi very rich pawl ah ralkap sawr thei cu 10% hman an um ke maw,a dang pawl cu mah te sum dawng,dawr nei,factory nei,smuggling tuah thei pawl an si ding.

Mipi 99% pawl hi teh.Tah nak a phun phun ah mi farah below poverty line (BPL ) hi Burma i um i 33%,then thum then i then khat an ti theu.Himi BPL khal ah then hnih then thum in kan then thei ding Kei ka khua Cerhmun i um pawl cu BPL an si thluh mai i,a si nan a niam bik le a sang deuh i um ti vek cu an um ke cu.

A tangmi 65% hi middle income group (MIG) pawl an si i,himi khal ah lower le upper tiin then a theih ke.Lower pawl hi 33% tho tho si bang seh la,lower pawl hi cu zarh khat hna tuan ding an neih lo cun  in le ei ding ah an khaw ruah a har nasa man ke.Upper MIG pawl khal ah a sang bik pawl hi cun brick building 2 /3 nei an si ding i,a si nan a niam lam hi cu inn 1 tal cu nei,fale khal tlawng tha  ngai ah cun re thei lo pawl an si ding.

Thailand i below poverty line pawl le Burma i MIG niam pawl cu an bang aw hrawng ding.

Civil mi pawl hin ralkap a cozah kha kan rak sawr ve maw ti hi zoh seh la.A sawr kan mal nasa.Sang zet i sawr pawl,U Te Za vek pawl kha mi 50 lai lawng an um ding.Cule disctrict ,township,state and division capital hrawng i rak sawr khal an um ve ko nan a si nan hi pawl hi cu an mal zet ding.State,district le township hrawng khal ah len nak cu ral bawi pawl in an mai thluh ti cu kan thei thluh ko.

Cu ruang ah ralkap a cozah i kum 20 lai in rak uk kha cu economic an thanso tir thei lo i tlun ah ralbawi corruption a rak natsat tuk ruang ah kan ram cun a rak tuar nasa a si kha.

%d bloggers like this: