Burma Ram Feh Dan Ding Part 28

Pi Suu Kyi InTiangyinta  hamthatnak a rel

Ni 25-7-12 ah khan Naypidaw i Burma parliament ah NLD hotunu Pi Aung San Suu Kyi cun Tiangyinta pawl um nak ah thanso nak tampi tuah a tul a ti i,cui tlun ah Burma ram cu a dikmi ramkulh (union ) democracy i cantir a tul a ti.

Himi tong kam hrim hrim hi nikum August thla i Pi Suu Kyi le President Thei Sein an biakawk hlan ah cun hi vek i mi tam pi theih i tong ngam ding pawl a si lo.Ziang ah tile ralkap le General Than Shwe pawl i duhdanah cun 2008 dan i sin Burma ram cu democracy ngai ngai a si zo an rak ti kha a si.Cui ruang ah kha lai ah cun tu Suu Kyi i tong tla cu thawng tlak thei khawp i sual a si.

Mizoram ah feh leh lawk seh la.

Mizoram ah cun tu hlan mirang pawl i um lai i sin leng lam i vai pawl duh duh i an luh thei lo nak ding ah tiin Mizo pawl an phun a hloh an phan sak ruang ah Chin Hills regulation act timi an rak tuah sak.Siannak lak ta lo cun zokhal Mizoram ah an lut thei lo.India i vai hotu tampi in hi dan hi siat an duh theu nan an siat thei lo.Hihi Mizoram federal a si nak pakhat cu a si.

Cule Mizoram ah hin law and order hi Mizoram state canvo a si ruang ah Mizoram Armed Police cu Mizoram a cozah kut ah a um.Hitawk i promotion pawl khal Mizoram a cozah kut ah a um thluh.
Nagaland ah cun Mizoram hnak i an san deuh nak pakhat cu leihnuai thil suak pawl thuhla ah Mizoram hnak in thu an nei deuh.
Kannih Chin State khal  ah cun lawi (teak )thing pawl tumpipi tam zet a um theu vi,cui pawl cu ralkap a cozah milai pawl in an duh duh in an hau vi,Laimi pi cu rel hlah Chin state acozah kut khal ah Ks.fangkhat hman a lut lo ti kan thei thluh ding.

Pi Suu Kyi i timi a dikmi democracy a ti mi ah Burma cu democracy ngai ngai a si hrih lo a ti nak a si i,kan thei thluh ko.Cui tlun ah a dik mi “union “ram a si a tul a ti mi kha federal a ti duh lo nan federal tinak a si mai.Democracy ngai ngai khal ah “Union “ngai ngai si lo a um thei ruang ah “Union ” ngai ngai neih hi a tul a si.

1962 i sin Burma ram ah cun Kawl pawl lak ah thluak sawp (brain wash )an rak tuah tuk zo vi,khalai i Ne Win ralkap á cozah khan tlangparmi tiangyinta pawl kha zohtha zet vek in an bum aw aw.
Kei kha 1969 kum tir ah khan Institute of Economic college aiawh in university  luyechun ( outstanding student ) i hril ka si i,cumi tum i Shan ram in feh pi lai ah Kawl mino pakhat thawn kan el aw aw.Cupa cun a cozah in tlangparmi pawl a zoh tha tuk tiin a tang.Kei le luyechun ka ngah nak hman kha ka ca thiam nak hnak in ka theih kau nak “knowledge” ruang ah a si ruang ah a cozah hin tlangpar mi pawl in zoh tha lo tuk ticu awl ten ka sim thei.A thin a heng tuk i kum 10  hnak i upa pawl hi cu thi thluh seh la,nau hak thinlung tha nei pawl in ram hi run hruai seh la a ti i,cu cun kei khal cun ka el nawn lo.Cuti cun tlangparmi pawl hrang i tang cu misual ah in rak ruat theu.

India ram cu ka ngan zo maw ka thei lovi,Jammu and Kashmir tilo cu Indian Union ah an lung a kim thluh.Cui ruang ah Burma khal ah mipi 33% a si mi tlangparmi pawl i lungkimnak ram kan din hlan lo cu ram siava,ram rethei,ram hrehum kan si ring ring ko ding.’

%d bloggers like this: