Burma Ram Feh Dan Ding Part 26

India I State Pawl Ih Thu An Neih Dan

Rihli cei that a tul

Ram a that ngai ngai cun,Falam peng thanso nak ding i thupi zet cu Rihli cheithat i,tourist ( mikhual )lak luh i sum lak ding hi a si ding.Cutik ah cun acozah in Rihli kiang kap i lo pawl cu a leisak ding i,cumi cu pangpar cin nak ah mawi zet in a tuah ding.Cule Rihli i a thlang lam Tio tiva lam  kap ah motor zin in a kulh ding i,culo cu a thlang lam tili kap hmuah hmuah cu thing tha tha cing a si ding.Hotel pawl cu sak lam pi ah sak an si ding i,hotel i tisia pawl cu Rihli ah luang tir lovin Tio ah luan tir a si ding.

Hotel le thil dang hrang ah Tio i tidai khal lak so a si ding.Switzerland i tili le a kiang kap pawl vek i mawi zet i tuah a  si ah cun Mizoram i sin le Kawl ram lam  Mongwya lam i si khal in ni khat ah mi 200-300 an ra tlawng ciam co ding i, Mizo pawl cun Rih hi kan thihhnu i kan thlarau feh nak an ti i,an thupi tir zet.Falam peng hrang i sum lak luhnak tha tak pakhat a si ding.

State Pawl i Thu Neih Nak


Federal state timi pawl khal ah hin a ram i zir in an thuneih nak hi a bangaw lo thluh.USA tla ah cun immigration law ah,cu le death sentence pek nak ah,nunau i nau ti tlak siansak le siansak lo ah, cu le thli dang tampi khal ah state pawl in thuneihnak an nei i,Canada ah cun state pawl in economic thu ah direct i ramdang peh tlaihnak thupi zet an nei.

India ram ah state pawl hi an zalen zet.Central a cozah aiawh in state pawl ah hin governor pawl an ret theu.Governor pawl hi state pawl ah state a cozah tuah thei party an um sung cu an thupi lo zet.Governor pawl hi Central i ruling party pawl i milai pawl an si ruang ah central pawl i duhdan i an feh a tul theu.Central ah a cozah thleng aw bang khal seh la,state pakhat i governor kha sualnak vek a  neih lo ah cun a term a cem hlan ah  Central a cozah thar in a hlon mai mai thei lo.

Vawi khat cu Manipur governor pa kha Manipur i zo party hman i majority an neih lo lai ah central duh lo zawng in a mai duh zawng in state  a cozah a tuah tir i,a thil ti mi cu khui maw cin cu run pom a si nan cu pa cu central in thla khat hnu hrawng ah an run ban tir mai fam teh.

State pawl hi law and order ah cun thu an nei ngai ngai.Mizoram a cozah kha HPC timi Hmar miphun underground pawl an um lai ah khan state a cozah level in remnak vek a tuah  thei.Tu khal ah Tuikuk an timi Bru pawl cu Mizo pawl in  40,000 lai maw si Mizoram i sin Tripura ah an dawi i,cumi thu ah Central hin Mizoram a cozah duh lo zawng in ziang khal a run fial thei lo.

India ram cu federal an si tho i,tu ah India ram ah Kashmir tilo cu ram khat an si tlan nak ah an lungkim tlang a si tiin a ti theih.
Kan nih Burma ah cun federal khal a um lovi,Kawl pawl thuthu i um kan si ruang ah kan lung a kim lo nasa a si hi.Kan ngan zovi,Kachin hotu pawl tla cun federal kan si thei lo ding ah cun independence tiang in kan feh law law ding an ti a si kha.

Cule CNF hotu pawl in hitin an ti la la.Ralkap a cozah hin federal ti hi an hua tuk i,cui ruang ah federal ti hmin sal lovin federal vek i thuneih nak ngah ding in kan biakawk nak ah kan relpi ding an ti.Ralkap pawl hi an aa lo nasa i,federal kan sal maw sal lo maw Tiangzinta pawl thuneihnak pek hi an duh lo law law a si i,cui ruang ah CNFpawl i timi cu thil cang thei a si lo.

Cumi cing in nuam te tei kan Burma ram cu federal union ngai ngai si ding i kan zuam thluh cu a tul o.

%d bloggers like this: