Burma Ram Feh Dan Ding Part 25

Democracy Khui Ram ah a kim bik?

Lai Khawte lam thanso a tul

Tunai te ah Saya Hlawn Cen Thang le Saya No Kap pawl in in sim i,cu cu Haka cu rel lo,Thlan Tlang hman Falam hnak in an thangso tuk thlang an ti.2009 kha maw si Saya Zalawr i Delhi i crusade a neih nak ah tu hlan i Falam i si ziang hman kan rak siar lomi Thlan   Tlang khua hman tu ah cun kan tluk nawn lo a ti.

Falam thanso  nak ding khal a phun phun kan ngan leh ding i,tui tum i tawi te i ngan ka tuh mi cu Lai khawte pawl an than lo cun Falam khal a  thang thei lo ding ti hi a si ding.Falam district  i Lai khawte pawl i ah ei le bar duh tawk i an ngah thei a si i tlun ah hmun dang  i zuar ding mi a tawr a tawr i a um lawng ah Falam khua khal an tipi thei ding.

Hrek khat cun Falam Falam nan ti rero,Tahan lam ah kan thangso i a tawk a si si tla nan ti ding,a si nan kan nih Falam peng thlah pawl hrang ah cun kan khawpi ziang a si ti in suh le Falam kan ti ring ring ding.Thanso nak pawl cu nidang ah kan peh leh ding.

Democracy khuai ram ah a kim bik?

Kum 20 lai a rei  hmang i,Time magazine i ka siar a si i,khui ram ah democracy a tha bik,a sang bik in an hmang an ti nak ah Findland,Sweden le Switzerland lam hi a sang bik an si ta tlat.Lei tlun i ram lian bik,democracy hmang nasa USA le UK pawl a sang bik ah an tello.USA tla kha cu 85% democracy an pe hmang.

India teh ti seh la,kha lai ah cun 78% hrawng a si hmang.Cumi cing in India cu federal ram a si tho tho.India khal ah a cozah thunei tu pawl ah executive branch,legislative le judiciary branch ti in an um.1975-77 tum i India PM Indira Gandhi i emergency a puan tum tla ah cun democracy a rak hlo nasa.Executive ( Prime Minister ) a rak thupi tuk i,legislature ( parliament le judiciary ( court le supreme court  pawl cu Prime Minister duh dan in an um thluh a ti theih.

1989 tiang hrawng hman ah khan India central   i majority la i a cozah tuah tu pawlin state pawl ah an mai lam i a cozah tuah  lo nak pawl cu an thiat mai i,hrilawk nak an tuah tir i,cu nah an mai lam an cak tir theu,An mai lam party i seat malte i an cak lo a si le opposition lam seat pawl cu minister si nak le contract pek nak vek in an lei i,cutin state pawl khal an mai lam ah an um tir theu,
India ram khal ah tu nai kum 15 sung hrawng ah cun democracy a um tha sin sin i,supreme court khal a thupi tuk.Dan kalh deuh i executive ( Prime Minister ) i a ti mi pawl cu court in a thiah sak cing cing.Cuti lawng si lo vin legislature khal a rung thupi tuk i,tu lai tla ah cun Congress party hruai United Progressive Alliance (UPA ) hin eptu pawl cu rel hlah, a mai lam tang party dang pawl hman hi a tlawn that ring ring a tul thlang a si.

India ram a that sin sin nak cu Election Commision tha zet a nei.Hihi constitution i a tuah sak mi a si i,EC commsiion member 3 pawl hi ruling party in an hril theu nan election a rung um tik ah ruling lam an tan ciamco lo.Ram le mipi hrang ah tiin a dik bik in an feh.2000 kum i USA i hrilawk nak ah India vek i Election Commission an neih lo ruang ah Al Gore le George Bush le kha a tling an puang lawk thei lo ti kha kan cing lai ding ka zum.

Burma ah democracy tha zet kan neih thei nak ding ah cun judiciary tha zet,thunei thei kan neih a tul.Tu ah cun cu vek kan nei hrih lo.Cule election commission tha nasa kan neih a tul.

%d bloggers like this: