Burma Ram Feh Dan Ding Part 24

Federal State le Confederation

Laitlang ah tidai a tha zet

Mizoram thuhla ah kan dung May thla ah khan a si hmang,India i English newspaper pakhat in Aizawl i tidai a har natsat zia thu a ngan.Aizawl i kum 23 tlun rak um ka si ruang ah ka thei zet i,tu lai tla cu kan dung lam kum 25 lai thawi thim cun tidai an ngah tha zet.Cuti cing in Mizoram cu ziang tik lai khal ah tidai an harsa ring ring ding.Ziang ah tile tidai hi so lak i an lak a tul ruang ah a si.Mizoram i khua pawl 90% cu tlang zik ah an um thluh i,an tlang pawl le Laitlang thawi thim cun an niam thluh fawn.

Mizoram ah Public Health Engineering(PHE) an ti i an tuan mi bik cu mipi tidai pek a si.Hi dept. hi an acozah Dept. a tum bik 6 nak hrawng a si.Sim duh mi cu Mizoram ah cun tidai tawlrel nak rori ah acozah budget i sum 15%  hnak i tam hman a tul.Cet hmang i diseal le petrol thawi tidai lak so thluh a tul ruang ah a si.Laitlang ah cun tidai pawl cu tlang sang i si pipe maw tler maw hmang i luan thlak tir a theih.Budget 5% hrawng hmang in Falam vek tla khi tidai ol ten kan la thei ding.Ram rung tha phawt seh la,tidai na na na cu Mizoram hnak in kan nei tha thei a si.

Federal Hnak i Sang Confederation Rak Hlawh Tlin Nak Pawl

November 2005 i Chiangmai Thailand i seminar kan kai nak ah Kawl pa pakhat cu thinheng deuh in “A cang le federal nan ti i,a cang le confederation nan ti,ziang so kan thlun sawn ding “ti in a kaitu Chin,Kachin le Karen pawl a sut.Cu pa tithing heng lo nak ding ah federal ho khaw kan duh bik tiin midang pawl in an ti.
Confederation cu federal hnak in a sang law law i,tu lai ah cun leitlun ah a um lo.Confederation i kum 50 lai rak feh thei ram pakhat lawng ka thei i,cu cu Austria-Hungary empire a si i,1860-1917 hrawng tiang i um thei a si.Himi ram sung ah hin siangpahrang cu pakht lawng an nei nan parliament 2 an nei i,official tong 2 an nei.Prime Minister 2 an nei.Austria pawl in Hungary pawl i ukawk nak ah ziang hman an hnai hawk lo.Hungary pawl in le an lung a kim i,an hnuai sin i um Serbia tivek ram pawl ah an duh lo cing in Hungary tong an hman tir.Himi confederation hlawh tling ding in a kaikhawm tu ah army pakhat lawng an nei i,zo vek khal i hotu le ralkap an tuan khal le Austria tong a si mi German tong an hmang thluh.First World War ah himi confederation cu a tawp.

Kum zabi 21 nak i reilo te sung confederation hlawhtlin cu Serbia and Montenegro (former Yugoslavia ) ram hi a si ding.Motenegro ram cu a fate sawn a si i,tangka a dang dang in an hmang thei i,president khal a dang dang in an nei.A tawp a tawp ah cun Montenegro ram i mipi ruahdan lak nak ah 55% tlun i a dang tei independence si an duh ruang ah himi confederation khal a ruang tawp a si.

Sri Lanka tualsung do awk nak ah khan 2002 hrawng i si cun LTTE lam khan federal maw confederation maw lungkim zik zik vek in an run um nan do awk nak i May 2009 i LTTE pawl an sun ruang ah an thurel mi pawl a rung tawp.

Burma ah tuikum January thla ah khan Chiangmai ah Kachin hotu a phun phun pawl an tong aw i,Kachin ram in federal tal a ngah lo a si ah cun independence law law tiang tum siseh tiin an rel thlu.1947 i democracy danpi kha a tha thaw khat nan unitary a si ruang ah federal tum uh sih tiin taingzinta hotu pawl in Shan ram Taunggyi ah an tong khawm aw i,cumi cu duh lovin General Ne Win ho ralkap in a cozah sinak a run la i,cuti cun Burma ram cu kum 50 sung democracy nei lovin a rung um ta a si.

Sual leh ah federal thu run ngan a si ding.

(Visited 44 times, 1 visits today)
%d bloggers like this: