Burma Ram Feh Dan Ding Part 20

Burma Danpi 1947,1974 ,2008  Pawl Tthimnak

Tui tum Pi Suu Kyi i Thailand leh Europe i a tlawn nak ah 2008 i Burma danpi cu thleng a tul ti a sim ring ring ti kan ngan zo.Cu a si le hi danpi pawl hi ziang vek an si i,ziang ha an bang awk lo nak ti tui tum ah kan ngan ding.

1947 Constitution


A hamaisa bik ah kei hi Dr.Andrew Ngun Cung Lian vek i constitution expert ka si lo ti ka lo sim a tul hmaisa.A si na in Mizoram i newspaper ka rak kilkhawi i a tak i ka theih mi pawl,tui Delhi ka um i ca ka siar ring ring mi pawl le 1974 danpi tla cu an tuah hlan i si an tuah  theh tiang i Burma ram i um i rak thei ring ring tu ka si ruang ah mal te lai cu ka thei ve ah a cang ding.

1947 danpi kha General Aung San in U Chan Htun a ngan tir mi a si kan ti thei ding.Himi dan pi hi democracy ngai ngai cu a si ko.Kum 1 sung hrawng i ngan thluh mi a si.Democracy a si nan unitary ( central thu neih nak )a si.Shan state minister ti vek,Chin affairs minister ti vek an um nan Prime minister i ret mi an si.State i si hril mi an si lo.Cui tlun ah state level i hrilawk nak a um lo.State level i assembly a um lovi,district le township pawl cu government official pawl i uk thluh an si.Village level ah hrilawk a um i,village ziang maw zat kom khawm in circle an ti i,khaw 5/6 uk tu cu circal chairman an ti.Chin in Chin hrang ah a dang ten hna a tuan thei ciamco lo.

1974 Constitution


1974 danpi cu Socialist san a si tho vi,one party system constitution a si law law.A si nan Burmese Way to Socialist Program  Party (BSPP) party cun dung lam i sin thu a nei aw tit nan hemi can 1974-1988 sung ah hin ralkap pawl cun mipi uk nak ah ziang hman an rawlh aw lo.Party kha village level,state level le central level ah a thupi sawn.Himi danpi tuah nak hi kum 2 lai a rei i,himi ding ah hin Rangoon i minister pawl rori i hovin state le division pawl ah an feh i,danpi ding hi an sim fiang.State le division i sin township ah,cu tawk ah mi thenaw in khaw tin ah danpi sim nak an nei,Cutawk ah cun an lungkim lo mi pawl an rak sim i,cu cu a tul dan i zir in Rangoon lam ah an rak thlen.Cu le vawi hnih nak,vawi thum nak tiin khawte pawl ah an feh leh.Mipi cu an rawn nasa.A si nan one party dictatorship danpi a si tho tho.

2008 Constitution

2008 danpi hi 1994 i national convention an thawh i si an ti thok mi a si ruang ah kum 14 lai an rei.Hihi cu ziang dang si lovin ralkap pawl hin uniform hruh cing in a rei thei tawp i ram uk an duh ti nak a si mai.2007 ah khan phungki pawl i hovin sandahpiah nak tumpi kha um lo seh la cu 2008 hman ah hian an theh tir ke maw aw ti a si.

Hidan hi a hmin cun multi party democracy constitution ti a si nan a tak tak ah cun military dominated unitary centralization dictatorship danpi a si mai.Party dang dang a um thei an ti nan an mai duh zawng lawg um tir an duh.An mai duh mi pawl lawng hrilawk i tel thei siseh ti nak a si.State le division pawl khal ah thu neih nak an neih mal cu thudang,ralkap pawl  thu an neih tir duh ruang ah central parliament khal ah siseh state le division pawl khal ah siseh seat hmuah hmuah i 25% cu ralkap pawl an um ding ti a si.Pi Suu Kyi khal in democracy a si lo a ti i,Taizingta pawl i an rak duh lo mi 1947 dan tluk hman in a tha lo.District le township pawl tla cu govt. official pawl in an uk ding an ti sin sin i,a um dan cu state le division i a cozah pawl ah ralkap 25% an tel zo tik ah district le township pawl uk tu official pawl khal cu ralkap duh zawng,central duhzawng,Kawl pawl duh zawng an si mai.State le Divisiopn i prime minister hmuah hmuah khal ralkap hlun an si thluh i sin tu kan rak feh dan cu democracy a si lo nasa ti cu a lang a si.

%d bloggers like this: