Burma Ram Feh Dan Ding Part 17

Burma ti in maw Myanmar tiin so kan ti ding?

Himi cahram pawl ka ngan pek Part I ah khan kei cun Burma ti hi ka run hmang ding tiin ka ti zo.Kawl tong i ka tong ah cun Myanmar ti in ka hmang ko ding.A si nan English i ka tong ah maw Lai tong i ka tong lai ah maw cun Myanmar ti hmang lovin Burma ti ka hmang ding.

Burma ti hman teng teng ka duh ruang ah  tui a cozah pawl an ngeh them them lai ah cun harsatnak ka tong ding ti khal ka thei.Thutthimnak ah,tu ah NGO fate zet Burma Charity Fund ti ka nei.Tu fang ah Rangoon ah cun tlung seh la,Burma ti hmin hmang cun ka NGO registration ka tuah thei lo ding ti ka thei ko.

Leitlun ah dan zawh kim thei ti hi kan um lo ding.Pi Suu Kyi khal tui tum i Europe a tlawn nak ah 2008 danpi a pah bal theu nak a um ta ria.Cucu English i a tong nak ah Myanmar ti hmang duh lo vin Burma ti a hman theu mi hi a si.Kei cu ka lung a awi law law fam teh.2008 danpi ah cun Englsih i an ngan nak khal ah The name of our country i Myanmar an ti ding.Cucu Suu Kyi cun a pom ta ria lo.Pi Suu Kyi vek in kan nih pawl khal in ka pom lo.Pi Suu Kyi si lo,MP dng pawl cu siseh la cun an ban rori ding.

2008 i thlipi Nagris a hran ruang i Burma i mi thawng sawm tel an thih tum i Burma sung i Burma bom nak ramdang hotu pawl thawi an tawlrel nak ah British palai in Burma ti a hmang i cu cu Kawl hotu pa in a don i,British pa cun Burma ram sung na na na ah cun Myanmar tiin a thleng leh.

1989 hrawng ah khan a si i,tui ralkap  cozah in Mirang tong i kan tong khal ah Burma ti kan hmang nawn lo ding,Myanmar ti kan hmang ding an ti i,Rangoon kan ti nawn lo ding i,Yangon kan ti ding an ti.

Himi thu ah Pi Suu Kyi cun kan ram democracy a si ngai ngai tik ah mipi aiawh pawl thawn tha ten kan rel tlang ding i,ziang tin kan hmang ding ti cu kan ngaihtuah leh ding a ti.Ka lun a kim nasa.Tui tum i MP a si hlan khal ah,Rangoon i um cing in Mirang pawl i interview an tuah nak ah Burma ti hi a hmang ring ring.

USA,British a cozah pawl khal in Myanmar ti hi an hmang duh lovi,Burma ti hi an hmang tho tho.Ralbawi pawl i duhzawng an thlun duh ce lo.Cu vek tho tho in Britain ram i newspapers pawl,USA i Time,Newsweek ti vek pawl,BBC radio ti vek pawl khal in Burma ti hi an hmang sawn rero a si.Kei khal hi ka theih tawp in Burma ti hman lam ah ka tang ring ring ding.

Ram hmin hi a thupi tuk.Russia ram kha 1917 i Communist ram an run din tikah khan Russia si lo miphun an ram sung i um pawl lung kim nak ah tiin Russia ti tel lo law law Union of the Soviet Socialist Republic (USSR) tiin an ram hmin kha an run phuah a si.Soviet Union a keh siat hnu lawng ah Russia ti hi an run hmang sal men.

1966 ah khan a si i,Rangoon ah phun 10 ka zir.Cumi kum ah Burma cun football ah Asian champion an ngah.Footballer Rangoon i ra tlung pawl cu Kamayut Hletan i sin kan rak hmuak. A tir ah cun lungkim zet in ka rak hmuak ve i,a si nan Kawl pawl i doh Bamar kuah,an ti tam tuk tikah kei mah le kei mah Bama ah tel lovin ka hmu aw.Cumi tum i sin kan ram a that ngai ngai nak ding ah cun ram hmin khal thleng a tul a si hi ka ti thlang.

A si le ziang tin saw kan thleng ding.Kei cun tu hlan kum 45 lai i sin hmin ka duh mi cu Pyithongsuh ti seh la ti hi a si.Himi hi Kawl tong cu a si ko.Cule dictionary ah Pyitongsuh ti hin meaning 2 a nei ding.Pakhatah cun this is the name of a country formally known as Burma ( Myanmar) an ti ding.A dang leh ah cun Pyitongsuh means the joining together of states or provinces within a country an ti ding.

Kan ram hmin  thleng duh hi kan Laimi hotu pawl ah cun ka thei ciamco lem lo.A si nan,Karen pawl cing cing,2005 i seminar pakhat i Chiangmai,Thailand ka feh nak ah KNU hotu ralbawi tum pipi pawl,kei hnak i kum 2 /3 i upa pawl,Rangoon university that lai i LLB tivek rak ngah man pawl in an nih khal in Myanmar ti le Burma ti khal an rak duh cuang lovi,Shwe Ngiangngan ( golden land )tiin maw culo le Irrawaddy ti khal in maw ti seh la kan rak ti ve tiin in sim.Ka thinlung te cun Karen pawl cing cing nan tawk a si hi ka ti.

Tu rori ah cun Kawl tong i ka tong ah cun Myanmar tihi ka pom i,Lai tong le Mirang tong i ka tong ah cun Burma tihi ka pom bik mi a si e.

%d bloggers like this: