Burma Ram Feh Dan Ding Part 16

Rajiv Gandhi Khan 1988 ah Suu Kyi A Rak Tan?

Kan lo/leilet kan thar suah tam  tir a tul

Leitlun ram ah heavy industry nei si lo,lo neih nak le tilva zuat  i ram lian bik lak i tel ban cu Denmark le New Zealand ram 2 hi an si.Switzerland khi cu a phun dang deuh.

Kan Laitlang in siseh,Kawl rawn in siseh kan economic dinhmu tihsan ding cun kan tilva vulh le,kan leilet’ lo i buh le bal pawl kan thar ti  tam thei a tul ding.Kan dung Burma Feh Dan Ding Part XV ah khan China vek thawi thim cun kan nih cu lei ram kan nei tam tuk lai ti kan ngan.
Kan dung lam kum 40 lai i ka rak siar mi a si i,Burma ah fang (paddy) acre 1 ah tang (basket )50 a suak an ti.Culei fang ah Japan ah cun acre 1 ah tang 180 an thar tir thei ta ria.Tu lai fang ah China in India hi economic field tampi ah a hleih i,cu tawk ah farming khal ah China in India a hleih nasa.Buh bal thar nak ah acre khat cio cio ah China cun India hnak in let hnih le a hrek tluk in an thar tam tir thei.

Kan Laimi hi 70% hrawng cu tilva zuat le lo le leilet i hna tuan kan si ding i,kan nuntu khawsak dan kan tihsan duh cun kan thlai thar pawl kan thar suah tir tam thei a tul ah a cang.

Rajiv Gandhi le Aung San Suu Kyi

Rajiv hi 1944 ah a suak i,Suu Kyi hnak in kum 1 in a upa.Suu Kyi nu Khin May Kyi hi Burma a cozah in 1960 ah ram palai ambassador sinak pe in 1960 ah India i New Delhi ah an um tir,Cunah cun Suu Kyi cu kum 15 mi lawng a si.Suu Kyi hi Delhi i high school tha bik pakhat Jesus and Mary ( Catholic school ) ah le India i college thabik pakhat Lady Sri Ram college ah a kai.1964 ah England i Oxford ah college kai ding in a feh.

1964 hlan ah hin Suu Kyi le Rajiv hi an tongaw maw ka thei lo.Tu nai te ah Suu Kyi i thuanthu bu 2 an suah nan ka hmu hrih lo.Nehru tunu le Aung San fanu cu diplomatic function vek ah rak tongaw awm tak.A si nan ka zum dan cun Rajiv le Suu Kyi tha tei an theih awk cu Suu Kyi le Michael Aris an neih awk hnu i,Rajiv i pu Nehru a thih hnu,Rajiv nu Indiara Gandhi i Prime Minister a tuan lai,Suu Kyi tei nupa Bhutan lal pa i adviser an tuan lai hrawng ah a si ding.

Kan dun ah kan ngan zo vi,Rajiv Gandhi kha India PM sinak in November 1987 ah Burma ah a tlawng.Cumi hnu thla 9 thla 10 ah Burma ram mipi cun democracy run duh in ralkap a cozah an run do.Himi tum ah Rajiv i ho India cun Burma i democracy duh tlawngta le mipi pawl kha theih tawk in a rak bom a si.Hmar Mizo pakhat  ca ngam thiam  L Keibom cu 1988 ah Rangoon i Indian embassy ah 2nd. secy. sinak in mawsi officer pakhat a rak tuan i,leh hnu i a rel an ti ka theih mi ah cun India embassy i sin democracy duh tu mipi pawl cu an theih tawk in an rak bom a ti.Khati lai na na na au cun All India Radio cu BBC le VOA hnak hman in Burma mipi tan in ralkap a cozah a rak kap na theu a si.Delhi i All India Radio i si ralkap pawl rak thua theu tu pakhat,a pawimawh bik cu Burma Prime Minister hlun U Nu i fanu Than Than Nu  a si.

1988 lai i Burma democracy lamtang pawl raktantu India kha khami hnu kum 4/5 ah,,Rajiv Gandhio thihy hnu ah cun ralkap a cozah a run tan ta em em a si.A hlan i Burma democracy an rak tan nak san khan Nehru Gandhi tei sung le Aung San tei sung rualthat duhdawt awk nak ruang ah a si a ti theih lo ding maw?

%d bloggers like this: