Burma Ram Feh Dan Ding Part 15

General Aung San I Thuan Thu

Letlet/ Lo le Thlai Chin Dan

November 2010 i Pi Suu Kyi an suah ah khan a mah lawmpi tu pawl i hnen ah kan hmuhawk lo nak khal a rei tuk i,thu lo sim ding tla ka nei tam tuk a ti.Cu ti vek tho tho in ngan ding hi a tam tuk,Rohinja pawl thu hla,Suu Kyi i Thailand feh thu ti vek tla.A si nan a sang sang ten kan ngan tho tho ke.

Laimi pawl,tlang par i um siseh,hmunrawn i um siseh kan van a that zet nak pakhat a um tho tho.Cu cu ei hawl nak i thlai cin nak ah lei ram kan neih tam lai hi a si.Ramdang ram hrek khat pawl i ram an harsat zia ngan hrih seh la.
1995 hrawng i Time magazine i ka siar a si i,China ram i khaw pakhat thu a  si.China ram cu ram kau tuk,ram tha rawn rawn khal tam tuk,a si nan minung an tam tuk ruang ah ram tha co lo mi million tam zet um nak ram a si.Cumi lak ah khawte pakhat  i an ram lei lung kan ta an ti thei mi um sun cu hmun rawn cu a si nan leitha tam lovin lung thenel tam nak ram a si.Cucu sung kua pakhat in thingthei cin nak ah acre ziang maw zat an co ve.Lei a that lo tuk ruang ah vawi leh khat i thing thei cin thei nak a si lo.Cui ruang ah nupa pakhat cu an ram ah feet 4 thuk,feet 4 kau in  khur an lai i,an laih mi lei pawl cu an hlon.Cumi ai ah peng 1 lai i hla  i um lei tha cu an mah rori in an phur i cui khur ah cun an silh.A bang thlak zet.Himi tei nupa hin an pum cawm nak ah hna dang le an tuan kop a tul si,kum 1 ah khur 10 hrawng lawng an lai thei i,an laih theih i leitha an silh mi pawl ah cun thing thei an cing cing cing.Time ka siar kha an thawh pek i si kum 5 nak hrawng ah a si  a hmaisa kum 2 lai i thing thei an cin mi pawl tla cun rah an rah thlang i,hlawh an neih thok thlang.An nih  nupa in le khur thar kum tin an lai cing cing.Midang pawl cun kum 1 hman an ti suak paih lo.
Kan Li mi pawl hrang ah cun ol ten thingthei, fang,thei thlai cin a theih nasa lai ti cu kan thei cio ko ding.

Aung San Chin an ti.
Burma ram i hnampa bik Geeral Aung San hi 1915 ah Magoi Tiang Natmauk khua ah a suak.Hi khua ram hrawng ah Asho Chin an um hnuai hni i,hrek khat cun Aung San pa hi Asho Chin a si an ti.A nu lawng te Kawl rori,cui tlun ah a nui i pu tla cu 1885 hrawng i Brisith pawl i Mandalay an lak tum ah khan British pawl rak do tu hotu pakhat a si.
Aung San hi Rangoon university ah tlawng a kai i,a tlawngkai lai khal ah Burma ram ti zalen ding lawng lawng a ruat i,cauk tam zet a siar.Fala,zu tivek khal a ngaihsak man lo.University student union ah general sccy.a tuan i,cui hnu Leitlun Ralpi II a ra thlen tik ah khan Thirty Comrade din i Japan pawl i ukmi Hainan thliarkar ( tulai China ram ) ah ral do an va zir.Japan pawl thawn Burma ah lut in British pawl an dawi.Kum 3 sung lai cu Japan  hnuai Burma cozah ah Dr.Ba maw cu prime minister,Aung San cu major general sinak in defence minister,U Nu cu foreign minister tiin an tuan.Aung San hi defense minister a tuan pek ah kum 27 lawng a si.

Aung San i ho Burma Independence Army (BIA) hin Japan pawl ring nawn lo vin a thup ten British pawl tanpi in March 27,1945 ah Burma ram pumpi ah Japan cu an kap leh.Himi ni hi tujtiang Revolutionary Day an rak ti i,tu lai ah cun Armed Forces Day an run ti.British 14th. Army cu Burma ah an rung lut.An commander Field Marshal Sir William Slim cun Japan ral reh hlan te ah Aung San cu Mekthila ah a ko vi an tong aw,Slim cun Aung San cu “A cozah do thu ah ka lo kai tir thei i,na tih lo maw ” a ti.Aung San cu British pawl cu nan thu ah an ding i,i kai ding in i ko lovi,cui ruang ah i kaih ding ti ka tih lo a ti.

Ral a rung reh tik ah William Slim hnak i sang sawn South East Asia British supreme commander Lord Mountbatten cun  Aung San cu Ceylon ( tulai Sri Lakna )ah a kovi,Aung San cu ” hril aw,Churchil ( politician ) si maw,Wellington ( ralbawi hminthang Napolion nehtu ) si ha na duh,British army i na um duh a si le brigadier ka lo pe ding ” a ti.Aung San hi hi tawk lai ah kum 30 lawng a si i,British army ah Kawl le Kala cu rel hlah British   (Mirang )hman kum 30 i brigadier si an rak um lo.Aung San cu Churchil vek i politician si ka duh a ti.Leh hnu ah Aung San cun Kawl hotu pawl thu a sim nak ah ka duh ah cun nuam zet in British army ah ka run um thei ho khaw a ti phah.

%d bloggers like this: