Burma Ram Feh Dan Ding Part 22

India le Burma
Lairawn thanson nak ah
Burma Ram Feh Dan Ding ka ngan mi hi mi ziang maw zat in in rak siar sak theu i,nan tlun ah lungawi thu ka sim.Kei hi New Delhi Prospect Burma school ah principal ka tuan i,Pathian hmai ah tling lo cing te in Delhi Burmese Christian Fellowship ah chairman ka tuan hi tui kum in ka kum 10 nak a si.Kan ram ah tlun ka duh zet nan ziang tik ah ka tlung thei ding ti ka thei lo.Cui ruang ah hi Burma Ram Feh Dan Ding ka ti mi hi kan ram le miphun hrang i ka tuan thei hrih mi ah in rak pom sak uh tiin zang fah ka lo dil hmaisa.
Lairawn kan ti mi Kaley phairuam  thanso nak ah a phun phun in zoh a theih ding i,tu hi zir nak lam in zoh hmasa phawt seh la.Burma ram ka feh san hnu kum 36 lai a rei zo vi,cu nah cun zir nak lam khal ah ziangmaw zat a rak thangso ti ka thei.A si nan duh vek a si cuang lo.Cui tlun ah quality hnak in quantity a si deuh.
Thuthim nak ah Burma i BA ong pawl cu a tlangpi thu in Delhi an rat tik ah  kei mai Prospect Burma tlawng ah a hrek  cu Pre intermediat in an thok a tul i,a hrek cu intermediate ah an lut thei fang fang.Hiti a si  quality kan tul vek in quantity khal kan tul tho tho.Quantity zawng khal in duh vek i a rak cak lo dan  ka run ngan ke.Ka ni te um nak khua Hmun Tha ( Zuatit ) ah 1976 lai khal ah inn 300 zik zik an um thlang.Cu lai ah Laitlang i Khuangli ah affiliated middle school an din i,Zuatit pawl cun Tahan kan nai pam an ti i,an nei duh lo.Cule kum 20 hnu 1994 hrawng ah affiliated middle school an run nei.Tahan cu peng 2 hman a hla lo,a dik ko.A si nan cumi peng 2 te feh thei lo le feh paih lo pawl kum 20 sung ah tampi an um i,cui pawl cun hiamnak sang an nei ta lo a si mai.Cui tlun ah Tahan i khan ( room ) pakhat i tlawngta 50 tlun to vi ca tha tei zir thei lo hnak cun Zuatit ah room pakhat ah tlawngta 20 hrawng in ca rak zirh seh la nau hak pawl an thiam thei zet ding.Inn 280 lai hrawng ah saya 3 lai cawm cu a har lo,Khuangli hman i inn 100 lai i saya 3 an rak cawm si.
Cuti vek in tu lai khal ah Min Hla (Tithim ) khal ah affiliated high school a um hrih lo hmang,inn 400 lai an si cing i,Kan zuam natsat a tul.
India le Burma
Khuahlan lai kum 2000 tlun lai i sin India le Burma cu an rak peh tlaih aw zo.Buddhist biaknak khal hi Burma ah India i sin a lut.A kar lak ah Chin hills,Mizoram Tripura,Chhittagong hills ti vek  tlang sang pipi a rak um ruang ah India lam khal in kum 2000 sung ah Burma hi an run uk thei ce lo.British pawl kha British India hmin in India le Burma rak kom tu hmasa bik an si.
Cule Burma ram cu ram tha a rak si i,minung an mal tuk ruang ah British pawl in India kuli tampi an la i,1920 hrawng tla ah cun Rangoon khawpi ah Kawl hnak in India mi an tam sawn.India mi tam zet hi Japan ral i Japan pawl i Burma an uk tum ah India ah an tlung.
India le Burma independence an ngah tik ah khan Prime Minister ve ve Jawaharlal Nehru le U Nu pawl kha an kawmaw ngaih tuk ruang ah ram 2 khal an thurual i,Burma ram Karen le Communist pawl i ral an tho tum ah khan India cun  Burma hnen ah rifle 5000 tla an rak pe
dah.
1962 i Burma i Ne Win ralkap a cozah an rung kai tik ah khan Burma ah India mi an tam tuk an ti i,India mi 600,000 lai India ah an tlung tir.Himi i sin Burma le India pehtlaih awk nak cu a run se thok.An dihmun a rak that lo zia cu,1964 hrawng i Pu Ral Hmung,Pu Hrang Nawl pawl i Burma do ding i ral an thok tik ah khan an nih Lai MP pawl khan Delhi ah India PM Nehru rori an rak tong thei a si.
%d bloggers like this: