Burma Ram Feh Dan Ding Part 114

Siartu pawl Tlun Ih Lungawi Thusimnak
 
Unau pawl,tui ka ngan mi hi Burma Ram Feh Dan Ding cahram pawl ih a neta bik a si ding.Himi hi kum 1 le thla 2 sung lai ka ngan ih,tu ah cun kan titawp thlang kei,ca-uk sawn in Rangoon ih Pastor Calab Lal Tin Hrem in in tuah sak ding.Saya Cabeb tlun ah lungwi thu ka sim duh.
 
Cule ka ngan lai ih a rak siar tu hmuah hmuah tlun khal ah lungawi thu ka sim leh.A siar tu hi ziang zat nan si ti lo theih thei nak a um lo.A si nan hiti zawng in ka ruat.Himi vawi 110 tlun ka ngan lai ah hin a mail bik tum khat tal ka siar dah titu hi mi 700 hrawng cu nan um ding.Cule a za te-ih ( Part kim tei ) siar,a cang ah cun le siar thluh deuh te lo khal  um ding nan a siar kim ti theih hi 25 lai nan um ka ring.
 
A cang a cang ah cun ka ruat theu ih,kei in le vawi khat ngan nak ah nazi 1 lai can ka heu si, mi 25-30 te lawng ih siar ding tla ah cun ka tikcu le ka cem ral hi a pamhmai lo maw si ka ti nan leh lam ah cun mi 2 maw 3 te hnen khal ah kan ram thanso nak ding ah cun ka sim paih tho tho a sisi, cui ruang ah ka ngan hi a man a si ka ti aw theu.
 
Cule ka nganmi pawl pom theih lo cang khal nan nei ding ih,duh lo law law nak khal nan neih cang a um ko ding.Cu vek khal ah i sawisel siang lo te in nan um i,cui pawl tlun khal ah lungawi thu ka lo sim.Vawi 110 lai ah tum khat lawng te,cu cu Pi Suu Kyi thusim ka rak kham ka ti tum ah zo in maw si midang hmin in in sawisel dah.Lei tlun dan a si ko.Zokhal duh tu za rep,duh lo tu za rep an ti si.Kei mah khal in siseh ka nau le pawl khal in siseh ka ngan a hmuah hmuah  in run sim that cun kan lung  a awi theu ih,cumi rual rual in in sawisel ding ti phang cing  in kan um ring ring  a si, a si nan ka laklawh ih ngan vivo a tul si.Ka nau pakhat tla cun cumi Part 60 hrawng ih sawisel ka ton tum ah kan thin a har ring ring,tawp thlang aw la a tha lo maw i run ti phah.
 
Tu Rangoon ihsi ca-uk ih kan suah tik ah internet ih a siar thei lo pawl le a za tei siar man lo siar duh sal pawl hrang ah kan tuah ding ih cunah cun spelling tisualmi pawl khal kan rem thluh ding.Cule kan nau Salai DL Sen Ling ih a online library hrang ih in dil mi khal pek thei kan tum ding
 
Ca uk kan tuah tikah Burma lenglam ih sin a cah duh cun uk 1 lawng cu a mal tuk ih a ca-uk kuat le sum kuat a harsat ding ruang ah uk 5 tal cah aw in $ 100 Rangoon ah nan kuat kei.Cumi cu a ca-uk man le a kuatnak man a si ding.Cule tlawmngai in nan rak zuar sin ke..
 
Kan ram le kan miphun hrang ah theih tawk in tuan tlang uh sih.Nan zate tlun ah ka lung a awi.
%d bloggers like this: