Burma Ram Feh Dan Ding Part 113

Kan Ram Ih Tlun Ka Rak Tum Dah  Dan

Kan ram Burma cu ralkap in kum 50 lai an rak uk ih,a tawp nak lam kum 22 lai khal cu ralkap tho tho in khauh zet in an run uk.Hi ti vek a si tik ah democracy duhtu pawl, a hleice in tlangpar mi ramdang ih rak um lak lawh pawl cun democracy a si hlan cu kan ram ih kir hi kan rak duh lem lo.
Kei khal himi kum 20 sung ah hin kan ram ih democracy a ngah nak ding ih ka rak tuanmi pawl hi a tam ciamco lo nan ralkap pawl ih an uk lai ah cun tlung ngam lo le tlung thei lo,tlung duh lo  dinhmun ih rak telve ah cun ka ruat aw ve ko.2001 ihsi cun Mizoram ah thuthangca suah bet ih pum cawm ka hrang ah a rung harsa thlang.Kan rualpi press mi pawl cun an news paper ah circulation 400 hranwg lawng an tuah khal le cu cu an nunnak bik a si ta lo vi,an nih Mizoram India mi na na na cun bank loan,construction contract,business supply contract pawl an run ngah thei.Kei India mi si nak dil duh lo le sum tuahthiam lo hrang ah cun ka paper siar lo cu sum ngahnak ka nei lo.Cutih ah ka Hnehtu tla cu circulation copy 2500 lai tal cu a  si ring ring nan pumcawm nak a  tlak nawn lo.Cui tlun ah kum 18 tlun,kum 19 zik zik nitin tang ring ring ih news ka tuah mi cu ka ning tuk.Cui ruang ah cun ka news business cu titawp a tul ta.Cuti cing in Burma ih kir cu ka tum lo law law.Cui ruang ah dah a si ke cu news ka tuah thei lo khal le vawk tla vulh sehla ti ih Aizawl Zuangtui veng ih hmuan le vawk inn vek tla ka rak neih nak.
Cuti cu Delhi ah 2002 kum tir ah thla 4/5 fang um ih Hindi zir ding in ka ra ih,a si nan cutawk ah ka nau Tha Nei Luai in UNHCR card dil ta aw i ti ruang ah ka rung tang ta riai.UN dilnak ah Burma ka suahsan lai ah buainak ka nei lo ka ti mi ah card in pe duh ta lo.Hiti cing in kan ram ih kir cu ka tum cuang lo.Ka kir duh lo nak khal,khalai ih dictataship lai ah ka tlun cun ka surender a tul ding ih,ngaihdam ka dil a tul ding ih,democracy hrang ih hna tuan lai pawl tla ka hek a tul men ding ti ka thei.
Kum 2007 ah Germany ih um ka rualpa Kip Kho Lian ( Salai Kip ) ih Delhi a ra  tlawn ah   nang cu hung tlung aw la ralkap pawl hung tlawn aw la cu na thu pi tuk ding nan ziang ah saw tar zawng ih hmin siat na duh ding i ti.Hiti cing in Delhi ih nun har tuk na na na cu 2008 kum tawp ah tlun ka rak tum lawk dah.Hihi pakhat ah cun ka nu a dam lai ih,ka nu ka ngai ruang ah a si.Ka tlun khal le ralkap pawl cu ka pawl lo ding ka ti tho tho.Tlun ding ah cun ngahdam dil ih sureender cu a tul ding ko.Ka theih tawk in Tahan hrawng ah English tuition pe sehla ti ka rak tum.Ka nau le hrek khat in in lungkim pi ih hrek khat in in lungkim pi lo.
Cule 2009 ih ka nu ka ton tum ah khan ka nu kha a rak dam ding beisei in 2010 ih Burma ram hrilawk hnuah ka ra tlung ding,hrilawk hlan ah cun ralkap pawl ih lam ka tan lo ih politic ka rel cun jail ah in ret  tho tho tho ding ka ti.A si nan ka nu khal March 2010 ah in thihsan.Cuti cun August 2011 ih President Thein Sein ih ra tlung thluh uh law ti in koh can a rung thleng.President Thein Sein tlun ah lungawi thu ka si duh.
Delhi ka um lai ah kan DBCF kohhran upa Lang Khan Kap in “Pu Run,ka uar em em na che a chhan palkhat cu Mizoram i awm lai a India rammi nihna i lo lak lo kha a ni “i ti.A si ko.Tih phang cing in keimai Burma ram tlun ah rinumnak ka rak pek duh ruang ah India mi sinak ka rak la lo.
Tuisun ih ka lungkim le ka lungawi bik mi 2 cu,ralkap a cozah can lai ih surender lo ih ka um thei suak le India ram mi si nak ka rak lak lo hi a si.Hmai lam thu cu Pathian thu thu a si ko,Tui kum cem lam ah kan ram ah tlung in theih tawk ih kan ram le kan Christian kohhran hrang ih hna tuan ding ka si mai.
%d bloggers like this: