Burma Ram Feh Dan Ding Part 112

Delhi Ah Kum 11Tlun Ka Um Ta Riai !
Ka ngan dah zo vek in Delhi ah hin thla 4 maw thla 5 maw lawng um ih Hindi zir ka tum mi kha tu cu kum 11 tlun ka um ah a cang.Kan ca ngan tawp nak lam ah Delhi ah ziang pawl ka rak tuan ti tawi te in ngan seh la.
2002 ih ka thlen kum ah  Canada ih ra Victor Biak Lian cun Hastal ih ka inn ah ra in nangmah rori in sum ka kil ding  na ti thei ah cun Delhi ih UN card ngah lo mi 200 tlun hrang ah sum ka hawl ding ih bomnak nan rak pe ding i ti.Si seh ka ti in sum Rs.200,000 lai a run kuat ih hotu pawl thawn kan zem.
Kum 2002 tho tho ah Switzerland ih um Pu Thawm Hlei Mang,USA ih Pu Ni Lilian le  Pu Biak Hre Luai pawl in Falam Union revolving fund hrang ah $ 400 lai,Rs.20,000 lai in run kuat ih himi hi Falam pawl lak ah a thang um lo tluk in an cawi ih,an rul theu.Kum 1 le a hrek hrawng hlawh tling zet ih ka tawl rel hnu ah sum cawh a harsa tuk aw ka ti ih Pa Thawm le cun FUD in tul nan ti ti ah hmang uh in ti.
DBCf kum 10 kim magazine ah editor ah in ret ih magazine kan tuah suak.
2003 ah DBCf chairman ah in hril.DBCF hlabu Lai tong in kan tuah suak.Falam Union vice president ah in hril ih,UNHCR ih sandapiah ruang ih thawngtla pawl Tihar jail ah tum 4 lai ka veh phah.
2004 ah FUD president ah in hril ih,CRC fundraising committee chairman ah in hril.Sum Rs.20000 lai ka dilsak man.
2005 ah Alagagpa university in MA Indian history in ka pass.Burma Charity Fund ( BCF ) sayama Van Zing,Airawn Ceu leh San Awi ( Thawng Hlei Kio ) pawl thawn kan din .
Hastal ah kan Laimi pawl thla 2 sung a lak in English ka zirh.
2006 ah BCF hrang ah Australia in $ 3000 kan ngah.Charity Fund hi kum 8 sung ah Delhi ih Burmese group pawl ah cun sum le saw ih mi harsa,tlawngta  bom tam bik ah kan rung cang.Rs.200 in Rs 1000 ciar lai kan bom fing fing.
Himi kum ah M.Phil. degree ka theh.
2007 ah Bangalore ih Bible tlawng ihsin India church history thesis ngan in doctor degree ka ngah.Himi kum ah USA ih Chin pawl pi le Lailun Foundation pawl in Zohthimtlakbik Lawmman in pe.Himi kum ah Saya Fai ih camping hrang ah Mizoram ah fund ka hung hawl ih Rs.50,000 lai ka hmu.
2008 ah tuan ka duh nawn lo cing in Delhi ih Falam Laimi pawl in Falam Union president in tuan tir sal.DBCF in a vawei 2 nak ah Lai tong in hlabu kan tuah leh.
2009 ah tling lo tlak lo cing in Pathian thu simnak crusade ka tuah ve.Pathian in i um pi nasa.Himi hnuah Saya Lal Nei Thang thawn Mizoram ah kan tlung ih,himi kum DBCF Saya Van Ram Uk camping hrang ah sum ka hung khawng la la.
2010 ah Prospect Burma tlawng coordinator hna ka ngah.Leh hnu ah principal a rung cang ih tu tiang ka tuan.
2011 ah Canada Calgary ih Laimi pawl in Tikhing Awnmawi lawmman in pe ih Rs.10,000 a keng tel..Himi kum tawp ah DBCF in hlabu kan tuah la la.
2009 ihsin 2011 tiang kum 3 sung ah Delhi ih Laimi damlo 10 lai hrang ah ramdang ih um Laimi pawl hnenah sum ka dil sak ih nan rak zangfah ih nan run bom.A tambik le a tul bik hrang ah Rs.50,000 lai hmundang dang ihsin nan run kuat ih a mal bik hrang ah dollar 100 nan run kuat.
2011 ah hin dil ka tum nawn lo cing in kha lai ih CRC president Ral Kap Tlung ih simnak in UNHCR card ka dil ih ka ngah.May thla ah interview in tuah ih ” Kan ram ah ka tlung ngam lo” ka ti.August thla ni 8 ah khan maw si President Thein Sein in rung tlung thluh uh in ti ih,President pa thu sim hnu ih interview ding cu siseh la,UN interview hi ka dil lo ding.
2011 le 2012 sung ah Pu Tial Khal ih thuanthu ca uk ka buaipi ciam co.Tluanga tla in i bawm nasa.Ottwa,Calgary le Pu Tuan Ling ih nau tei sum bomnak in kan tuah suak.
2012 ah DBCF in sunglawi zet in kohhran kum 20 kimnak jubilee  kan lawm.2003 insin 2013 tiang ah hin DBCF ah kum tin DBCF chairman ka run tuan ring ring.Kum 2004 ah khan C.Lian Khuma in thla 4 sung,kum 2008 ah Pu Hlei Sum in thla 5 sung chairman an run tuan ih cu lo cu keimah tho tho in tuan tir.
%d bloggers like this: