Burma Ram Feh Dan Ding Part 108

Mizorm ih Ka Hnatuan te te Malte Lai

1983 ihsin Mizorama ah Zoeng kartin magazine ka run tuah thei ih,hihnu cun ka sum lakluh khal malte lai a zia um deuh ruang ah kan Lai mipi hrang khal ah malte lai cu hna ka run tuan thei.sum tamnei lo,thuneihnak ( power ) nei lo le MP le MLA si lo na na na cu ka hna tuan mi pawl cu ziang pipa cu a si lo fam teh.
BibleTlawngta le Kei
Kan hna tuanmi pawl lak ah Bible tlawngta pawl hrang ih ka rak tuan mi mal te lai ngan seh la.1990 ah Pathian ah rundam nak ka hmu.Himi hlan khal ah Bible tlawngta pawl ka inn ih thleng pawl cu Laimi rak bomnak vek ah ruat in tha ten theih tawk cu ka rak zoh ko.Cule Bible tlawngta pawl an tlawngkai nak ih ka cawmmi ka ti thei mi pawl cu mi 4 te an si ding.An hmin cu kan ngan lo ke,an 4 ah mi 2 cu India sum in Rs.32,000 tlun ve ve ka cem ih,a dang 1 cu Rs.17,000 le pakhat cu Rs.12,000 lai ka cem.Ka sum bommi hin kum 4 kum 5 tlawng an kai nak ah an daihaw thluh ka ti lo,A si nan an tlaw=
ngkai nak ding ih an rin bik cu ka si ko.Cule Bible tlawngta dang mi 25 lai hnen ah pakhat ciar ah amal bik Rs.100 ih sin Rs.6000 tiang lai ka rak  bom dah.
Ka car ah mitthi ruak phurh ka rak duh lo.
Aizawl ah khan Maruti Suzuki car sen te ka kawl ve ih,a tir ah cun damlo cu ka phur ding
nan mithi ruak cu ka phur lo ding tiin ka thinlung ten ka rak ti theu.Vawi khat cu Relsing mi Nu Run timi mibang lo Aizawlih um cu a dam lo thu le a lung a leng ih tlun a duh thu mi in in sim.Damlo cu ka motor in Champhai ah ka phur ke cu ka ti aw aw.A si nan Nu Run hi Aizawl khawlai Mizo pawl theih ah kan hmu aw pang ding ti ka phang zet.Ziang ah ti le kan tong in ring zet in mi in auh theu ruang ah.A dam lo a besia ti ka theih cun Chhinga veng ih a um nak inn ah va hawl ka tum.Ka feh lai ah ka tlunglung a thleng aw thluh.1998 kum a si ih Mother Teresa a thih pek te a si.Mother Teresa khan Vai kutdawh ,a cang le phar pawl thi zik pawl tla a tham ih a tuamhlawm ngam si khawh ,ziang ah saw kan Laimi nunau damlo mangbang ka tham ngam lo ding ka ti aw aw ih ka va hmuh cun a sam pawl tla ka zut ngam.Kei khaLCF president ka si ih,LCF in petrol man Rs.1000 in tumsak.Taxi dang cu Rs.2500 lai a tul,cuti cun kan khaw Cerhmun nu Thawng Man cu motor dunglam ah Nu Run cu tuamhlawm dingin Champhai ah ka thlah.Champhai thlen zik Tipi va ah Nu Run cu a thi.Nu Thawng cun driver pawl sim duhlovin mithi ruak cu Champhai tiang a pom.Camphai ah Laimi hrek khat in an rak hmuak ih khui saw nan mi-na cu an ti ih a nih mithi ruak motor ihsin ansuahpi fam teh.A rak hmuak tu pakhat cun hi motor hi Pu Run ih motor a si lo,Laimi motor a si hi a ti phah.Himi hnu cun mithi phurh hi ka hreh lo law law.Kei mah rori in Ngo Ngo ( Phun Za Ngo ) tu ih Australia um ih nau thih tumah Aizawl civil hospital ih sin a ruak cu Canmari ih an inn
tiang ka phur.Cule Pu Khaw Ling ih nupi ih nau ( Cherry Zahau ih pu ) thih tum ah a ruak civil hospital in Chhinga veng ih an inn san mi tiang keimah in ka phur.Haka lam mi naute kum 2 mi thi,district quarters an chuh awk ruang ih Khawzawl pawl ih Champhai lam feh motor pawl an siatsuah tum,taxi feh ngam an hmuh lo lai ah naute ruak phur ding in petrol tum uh la ka  motor in kan lo thlah ko ding.Khawzawl ah an rak tisiat a si le a sia a si ko ke cu ka ti ka driver pawl ka thlah tir..Khawzawl ah naute ruak phur na na na cu police pawl ih kil nak in Champhai ah an feh thei.
Aizawl ah cun Chin Christian Relief Committee ( CCRC ) kan ti ih,Chin hmuah hmuah harsa tuk pawl bom nak pawl fate kan rak din ih kei kha chairman ah in hril theu.Aizawl ih Lai Christian Fellowship (LCF ) khawmnak ka rak din thu le
LCF biakinn run remnak ding ih mi sum tampi ka cawi ih kum 6 lai ka harsat  phah kha cu ka ngan zo.Vawi khat cu tui Delhi ih um Rev.Kap Thuan Thang thawn Thakthing tlang ah Haka unau dam lo an um ti in sim ih,ka motor in kan va la ih,a dam lo sawn cun sizung kan rek hnu ni 3 ah maw si in thih san sapbai.
(Visited 47 times, 1 visits today)
%d bloggers like this: