Burma Ram Feh Dan Ding Part 107

Zoeng in Lawmman Ka Ngah

A hmaisa ah Zoeng hi ziang ti nak ha,Hnehtu teh ti ih suhnak a um.1982 kum lai fang ihsin a kum cem lam ih thuthangca Mizoram ah ka tuah ding ka ti hnu ah khan vawi khat cu a hmin ziang ha kan sak ding ti thu ah Pu Sang Ci thawn Bungkawn veng lam ih um Pu Lalthangliana Phillips tei inn ah kan leng.Pu Thang Lian hi MNF pawl ih India a cozah an do lai ah khan BA degree rak ngah zo vin MNF aiawh ih China ram ih ambassador ah an hmang ih China ram tla ah a rak feh.MNF a suahsan hnu a upat hnu ah ca tla a zir bet sal ih kum 55 hnu lam ah Ph.D tla a ngah.Mi ngaihsan um zet a si.Van siat ah 1997 hrawng ah khan maw si kum 70 mi lai si in Aizawl Treasury sq. ih an khawmawknak ah zinpi ih motor tawlh in a nen that.Seventh Day kohhran mi a si.
Pu Sangci thawi Pu Thanglian kan lennak ah hin ka thuthangca ding hmin kan ruat tlang ciamco ih,Pu Thanglian cun Zoeng tiin a run sal ih vawi leh khat ah ka lung a kim mai..Zoeng ti  ih Zo ti cu tlangpar mi pawl tinak a si ding ih Eng cu tleu a si mai,tlangpar mi pawl ti tleu tu kan ti ke maw.
Cule ka newspaper dang pakhat Hnehtu hi 1990 May thla ni 8 ihsi ka suah thok a si.Hnehtu hi cu a hlan ah midang ta a si ih a hmin ( registration ) hi Rs.2000 in ka lei sak.Hnehtu ti cu kan tong ih Nehtu tinak a si mai.

Lawmman ka Ngah Dan

Zoeng hi March thla 1983 kum ah ka thok.Cule cuti lai ah Pu James Dokhuma ti mi tlawngkai sang tuk lo,ca ngan thiam zet ,a nganmi pakhat Thla Hleinga Zan timi tla cu siar nuam ka ti zet.Cui cauk cu college ih Mizo ca lai ding ah tlawngta pawl in an zir.Pu Dokhuma in 1984 ah  thuthangca pawl an thanso thei nak ding ah ti in James Dokhuma Lawmman shield 2 a suah ih,pakhat cu magazine tha bik hrilmi pek ding a si ih,a dang pakhat cu daily thabik pek ding a si.A hriltu pawl hi khalai ih Education minister Pu Dr.) H.Thansanga pawl an si.Cule Pu Dokhuma ih shield pawl hi tum 5 ( kum 5 ) tiang hrilawk ding a si ih,a tawpnak ih lak ta ding a si.Daily ah 1984 ah cun Mizo Arsi in a ngah in magzine ah Zoeng in hril.Cutin kum 2,kum 3 le kum 4 nak khal ah magazine ah Zoeng in ka ngah ring ring. A kum 5 nak cu an tuah paih nawnlovi keimah in ka co ta.
Cule 1987 ah Mizoram ih Mizo National Front (MNF ) a cozah an tuan lai ah khalai ih nunau minister um sun Pi Lalhlimpuii cun Lalhlimpuii lawmman a suah ih magazien hrang lawng a si,Zoeng in ka ngah ih Rs.3000 le cup a keng tel.Pi Hlimpuii lawmman hi Zoeng in tum 2 ka ngah ih a cup khal cu ka co ta.,
1999 ah Mizoram ih chief secretary rak tuan dah IAS officer Pu Lalfakzuala ( a pa maw a pu maw si Khawrua suak a si ) cun a fanu Information Dept. ih officer hna tuan lai ih Puna khawpi kiang ih motor accident ruang ih thi hmin in Zoremsangi Memorial Award daily paper le magazine hrang ah a tuah.Lawmman a tha zet ih certificate,plague ( himi spelling ka ti sual maw ka thei lo ) le Rs.10,000 a keng tel.Himi prize khal hi Zoeng in kan ngah ih,lawmman Chief Minister Pu Zoramthanga ih i pek lai photo ka nei ring ring.
Cule a tawpnak,Aizawl ka suahsan hlan ah ka Hnehtu daily cu Mizoram Artist Society pawl ih laksawng ka run ngah ve.Cui ruang ah Zoeng in vawi 7,Hnehtu in vawi 1 ka ngah a si cu.Tulai ah ziang ruang ah maw si Mzoram ah journalist award  hi an run tuah nawn o.Cui ruang ah Mizoram ih  journalist lak ih laksawng ngah tam bik ah ka rung cang a si.
1990 ah khan Aizawl ih Vanapa hall pi ah hall khat in mi 1000 lai in journalist pawl ih tuahmi beauty contest kan nei.Fala hmeltha 20 lai an tel.Cumi tum ah thusuttu nu cu Information Dept. ih officer nunau nu a si ih fala pawl thu a phun phun a sut.Fala pakhat a suhmi cu thuthangca ah ziang ha na duh bik a ti ih a nih cunHnehtu a ti.Cui hnu midang 5 lai  thu a suh hnu ah fala pakhat a sut la la ih thuthangca ah ziangha na duh bik a tiih a nih cun Zoeng a run ti.Cuti cun tum khat na na na ah cun ka magazine le ka daily pawl cu Mizoram ih hminthang zet an rak si fam teh.
News ka tuanlai ih Mizoram ih duhsaknak ka run ngah, a si nan ka rak ti lo ruang ih ka sir awk mi 2 cu,vawi khat ah Pu Hnuna kan ti ih Press Information Bureau ( PIB ) ih officer in a mai depterment in Mizoram journalist 40 lai ( khalai ih um zat ) ih pakhat a hril thei mi ah keimah kha Delhi lam ih feh ding in i hril.Train ah 2nd. class air condi. ih to ding a si.Cuvek tho tho in Pu Sawihrila,Dept. pakhat ih director in kei Kawlrammi i duhsak ih Delhi lam tlawn nak ding i tuah sak.A si nan man ka ti aw lo maw si cu tluk ih duhsaka nak 2 cu ka rak pom ta lo a si.
(Visited 42 times, 1 visits today)
%d bloggers like this: