Burma Ram Feh Dan Ding Part 105

Zoeng Magazine Ka Rak Tuah (I)

Ka nauhak lai ih si hna ka rak tuan duh mi bik 2 cu ram le miphun hrang ih hna tuan le thuthangca suah hi a si.Falam ah 1966 hrawng ah khan Pu No Zam ih tha pek nak in U Mang Kham thawn thla tin suak magazine  rak tuah kan tum nan  kan hlawhtling lo.Cule 1968 ih phun 10 ka on tum, college ka feh hlan ah Falam Baptist Association ih Thang Cin magazine ah thla 2 sung editor ka rak tuan dah.Copy 900 lai kan rak suah thei.
1972 ih college ka theh tum ah khan Rangoon ihsin Kawl tong in thla tin magazine tuah ka rak tum dah.Kawl tong ih  i bom tu ding ah midang an tul ti ka thei.Cunah kha lai ih Asochin mi Burma air force ih Lt.Col. pa cun thiamnak in na tlin ding ti ka zum ih sum na neih tak ah acozah hnen ih dilnak lam cu keimah in mawh ka phur ding i ti.A si nan sum ka neih lo thawn kan rak tuah thei lo.
 
1976 ih Mizoram ih ka vaih hnuah khan  Mizoram ih thuthangca ih tuan hi ka rak tum dah lo.A sinan theih kaunak ( knowledge ) ah cun ka rinsan aw aw ih Calcutta lam ih magazine le paper tum pipi pawl ah staff nauta te pakhat vek tal in tuan thei seh la ka rak ti theu.
Himi lai fang,1982 April thla hrawng ih kawpi ( cabbage ) ka cin lai,ka hlawhtling ko nan ka bang ruah ih ka rak tuan cia mi high school teacher cu rel hlah primary teacher tuan hman a hlawk sawn  ka ti ih ka bei dong lai ah Champhai ih Mizo nupi nei ka rualpa pastor bang Tlei Thio cun Champhai ih Chawkhlei daily news ih editor a tuan thu i sim.Ka thinlung te cun ka rual ih Champhai ih a tuan thei cun kei in Aizawl ah ka tuan thei ding a si mai ka ti aw aw.Cucun himi 1982 kum tikcu tangmi pawl cu magazine tuah dan zir ding in ka zir aw aw.Chhawkhlei news ih Aizawl corespondent ah ka rak um ih Aizawl ih press mi pawl ih hna an tuan danpawl ka zir.Vawi khat cu Pu Thei Thio thawi Zodin cinema hall kawt ih kan feh lai ah tui ih Vanglaini editorrun tuan Pu K.Sapdang thawn kan tong aw ih,cunah cun ih bom ding in ka sawm.
Sum khal ka nei cuang lovi,cycloster khal midang dawr nei cia pawl ih ta hman kan tum.Aizawl Zion street ah kan her tir.A cover cu Zoding square ih Milan press ah kan print.A zem tu pawl tla a hlan ihsin ka rak hawl cia.Cuti cun 17th. March 1983 ih first issue suak ding in ka rual pa Dr.Sang Kung ih inn ah magazine pawl cu biding kan tuah.Copy 730 in kan thok.Tu ah Zoneg first copy hi a um lai ke maw ka thei lo.Kei ih tha te ka rek mi kum tam pi ta copy hlun pawl Delhi ka um nawn lo hnu ka nau Sui Thawn tei run kil mi pawl ca uk an rop thluh ruang ah ka nei nawn lo.
Mizoram ah weekly magazine ti hi a rak  um lovi,vawi leh khat ah kan hlawh tling mai.Mizo pa pakhat in ” Khawchhak  ho thil run tih zing ah a hlawlting ber pawl a ni awm e “a ti ti mi in in sim.Thal 3 thla 4 hnu ah kha lai ih a cozah officer pawl ih thla 1 ih Rs.7000 lai an hlawh lai ah kei cu a profit hmanah Rs.15000 lai ka ngah mai.
1984 November thla tawp ih India Prime Minister Indira Gandhi an that tum ah khan  kei in English newspaper a ra thleng mi pawl ih sin Indira thah thu pawl kha ka la ih Mizo tong in Zoeng suah ding ah ka ngan.Pu Sapa in Mizo tong tha zet in  ka ngan cia cu a ngan leh.Copy khal 5300 kan tuah.Kan zuar ve ten a cem thluh mai.Kan Laimi lak ih record rak tuah ve tu kum 24 a si lai ih Burma MP rak ngah tu Pu Hrang Nawl in ” Tui tum cu international level nan thleng a si ” i ti.
Pu Sapa lawng silovin i  run bomtu pawl ah tulai ih Mizoram Journalist Association ih secy. le treasurer run tuan tu Zonunsanga Khiangte, tulai ih Mizoram ih thuanthu ngan thiam pawl lak ih tel C.Lal Zawna ti pawl tla ih ka hnen ah hna an run tuan.Zoeng hi cycloster in,cui hnu ah press printing in,cui hnuah offset tla in ka run tuah.
Magazine na na na ah cun ka tuah lai ah keimai ti zawng in Mizo magazine dang pawl khal in an run ti ve theu.A man copy 1 Rs.3 in kan tan ih,Rs.4 ah ti kung an ti ih,kei in ka duh hrih lo.Ka ti lo cun an ti ngam ce lo.Kei ih Rs.4 ka ti cun an run ti ve.Cu le bi-weekly ti ih zarh khat ih vawi 2 ka suah le an nih khal in an suah ve.
Cuti cing in news lam ah cun a tha thei tawk in kan tang.Local,India leh world news,music,sports leh beauty ti vek tla in kan  then.

 

(Visited 52 times, 1 visits today)
%d bloggers like this: