Burma Ram Feh Dan Ding Part 103

Kum 2 Sungih Kan Tuan Suah Ding Mi Pawl

Kan ram kan harsat,kan farah le kan thanso lozia  kan thei thluh ih,thansonak hi kan ram a len hnu lawng ih acozah rinsan ih kan tuah ding a si ah cun kum 10 kum 15 kan ngah lai a tul ding.Kan mipi 80% tlun an harsa tuk ti kan theih ring ring a tul.Cuti a si ruangah a cozah ih tuan nghak lovi kan tuan ding pawl tui tum ah ka run ngan ding.Ka ngan mi pawl hi kum 2 sung ih theh ding tinak pawl a si ding.

Cerhmun khua hrang ah

Cerhmun hi ka suahnak khua khal a  si tho vi,hi khua hrang ah thansonak a rang bik ih kan tuah a tul ke.Ka rel zo vek in thansonak kan tuan nakah hin a khua ih um mi pawl,a khawsuak hmundang um mi pawl le a dang a bom thei tu pawl kan poimawh  thluh a si.

Cerhmun hrangah hna kum 2014 ih tuan mai ding pawl ah primary school nauhak pawl hrang ah tlawng saya private in pakhat lak sak  siseh la,cu cu India ih B.Th. tal ong si thei seh la,cuti cun kan nauhak pawl an nauhak lai ih sin English a thiam phah ding.

Cule harddam nak lam ah tui Capt.Taithio Memorial Fund clinic hi kan tithat deuh a tul ding.Cule himi kum 2 sung ah fang cinnak terrace ( cawngdawl lo ) acre 5 tal maw laih suah si thei seh la.Kan dung ih Cerhmun model village ah kan tuah ding ka ti zo vek in electric tidai tha ih lak mi hi KW 30 tal kan duh ding ih,hi kum 2 sung ah kan theh man lo khal le hydro electric a pe tu tidai khawl nak tal theh thei tum seh la.Cule kan khaw tidai khawl nak hi tu hnak in let 4 lai ih tum himi kum 2 sung ah tuah man siseh la.CTMF Plantation ding ah coffee acre 5 tal cing thei   sehla.

Falam Hrang kum 2 Plan

Falam khua nu khua pa pawl leh ramdang um hotu pawl thawn Falam ah English zirnak tlawng tha zet,a kaitu pawl ih man mal te pek ih an kai thei nak tuah man teng teng a tul ding.Damlo bomnak lam ah zarhkhat vawi 3 zoh awknak free clinic tla tuah man siseh la.Cule hi kum 2 sung ah Falam ih fur ih tidai luan nak drain pawl tuah that man thluh siseh la,hiti a si cun leimin tla a zia um zet ding.

Electric hi a thupi zet ih,ka ngan zo vi a cang thei tawk in diesel engine KW 500 cu kan tum ding nan cumi kan ti thei lo khal le KW 150 maw 200 maw cu kan tum teng teng a tul ko.Himi karlak ah tui Var hydro engine khal tu hnak ih power pe tam thei ding ih tuah  kan zuam ding.Cule Rallon ram lam ih Dawngva pi dawl ih KW 3000 ( MW3 ) lai ngah ding ih tuan cu 7 year plan or 10 year plan a si a tul ke.Kan dung ih ka nganmi town hall le Falam club khal kha 5 yr. le 7 year plan pawl a si ding.

Rangoon ihsin maw Tahan ihsin maw thuthangca tumpi copy 7000-10000 lai um thei cu a dang tei zuam ding a si nan Falam khua hrang khal ah,copy 2000 lai um thei nitin suak thuthangca kan tuah ding.Hihi Falam peng ih khawte pawl tiang ih kan kuat ah cun thil cang thei a si ko.

Bualrawn kiang ih Pathangkhan middle school khi high school ah tuah thei kan tum ding.Lumbang khua ih high school 1 a um thei cun mi 7000 lai um nak Falam ah cun 3 cu a tul ko.Falam Baptist biakinn pi ih hnuai lam ih lamzin tikauh hnu ih inn sak bet  tla kan tum ding.Cule FBA le Falam Baptist hotu pawl thawn lehhnu ih Cinmual ih mission compound tuah nak ding khal himi kum 2 sung ah  planning tal tuah  kan tum ding.Acozahih college tuah theinak an sian a si ve ten a hmaisa ah phun 12 tiang zirnak um mi college  hi kum 2 sung ah kan tuah ding.

Delhi ihsin nikum ah khan bomnak DBCF tlawng hrang ah USA ih Chin Pawl pi ih Rs.50,000 le hmundang in Rs.30,000 lai,cule dam lo pawl hrang tivek ah a za ten Rs.120,000 ( $ 2400 ) lai ka ngah.Falam le kan khua hrang ah keimah rori khal in $ 5000 lai kum khat ah ka dil suah thei a tul ih,cui tlun ah kan project hrang ih Cerhmun khawsuak pawl le Falam peng duhdaw tu pawl hnen ih kan dilmi pawl thawn tui ka timi hmun 2  Falam le Cerhmun hrang ah $ 15,000 tal kan hmuh thei ka beisei ih,cucu taima le rinum tei kan hman cun thansonak tam pi a lang ko ding.Nikum kum khat sung ih Rih Falam zin laihnak ah khan $ 35,000 lai nan thawh ti kha thei sal uh la.

Cerhmun na tan tuk inti sian lo hram uh.Thuneihnak ( power ) le sum ( finance ) nei lo cing ih tuan ding ka si ruang ah hmun 4 te lawng in ka tan thok ding.Suak leh ah Hmuntha ( Zuatit ) le Rangoon hrang ih kum2 sung ih kan tuan ding pawl.

 

(Visited 40 times, 1 visits today)
%d bloggers like this: