Burma Ram Feh Dan Ding Part 100

Ram le Miphun Hrang Hnatuan Kan Rak Tum Dah

Kan ca ngan cu tu ah Part 100 kan thleng ta riai ih hi ti vek ih ngan thei ding ih in tuah tu hi Pathian a si ih Pathian hmin thangthat in um ko seh.A pahnihnak ah a siar tu pawl ih tha pek nak ruang ah a si ih a rak siar dah tu hmuah hmuah tlun ah lungawi thu ka lo sim.

Rangoon ih Pastor Caleb Lal Tin Hrem kha in rak nghak hram hram leh hrih seh la,part 110 nak hrawng ah cun a cem teng teng ding ih,amah in ca uk  in tuah sak ding.Tu ih sin Saya Caleb tlun ah lungawi thu ka sim lawk.

Kan dung kha Rangoon university ka rak kai thu a si ih tui tum ah cu cu kan peh ding.Ka ngan zo vek in kei kha Eco.  hman ah co-operative lam ka si ih kha lai 1972 kha rampi ralkap a cozah ih co-operative a uar ciamco lai a si.Kan tlawng suak pawl cu Phawnggyi ih thla 6 training hnu ih cooperative Dept. ih officer te nau tuan mai ding kan si.A si nan kei cun a ra um mai ding dan pi ( constitution ) hmang ih politic ih kan ram hrang ih hna tuan ka duh ruang ah a cozah hna cu tuan lovi,politic ti ding in kan ram ah ka kir.

Burmese Way to Socialism
danpi in 1974 ah hrilawk a si ding ih a hlan ah kum 2 hrawng can ka nei.Cumi pawl cu hnawh khat ding in Lumbang khua ih affiliate high school ah degree ngah teng teng ih teacher tuan a tul an ti ruang ah ka hmin va pek nak men ah Lumbang ah thla 2 ka va um.Ka tlun zik ah vok in thah ih Ks. 200  ( kha lai ah cazi  in Ks 160 an hlawh ) in pe nan sum cu ka la lo.Tu tiang in high school diktak an run ngah.Nikum USA ih Saya Thawng Cung Delhi a rak lai ah a nih cun kei kha Lumbang rak bom tu na si i ti phah.

Himi hnuah Tlauhmun khal ah phun 8 din nak ding in degree ngah pakhat ih hmin pek a tul ruang ah Cerhmun kan khua ih riak cing in,nitin a suk a so peng 2 feh in hlawh nei lovin Tlawuhmun tlawng ah thla 1 ka va bom.

Himi hnu ah Khuangli in affiliate middle school ah hmin in pek sak aw in ti ruang ah ka ve feh ve.

Cule politic lam ah,1974 ih Burma ram pum parliament hrilawk nak ah MP 480 lai in bial an nei ih,Falam in MP 2 co in Falam east le Falam west ti a si.Falam west lam ah hin Argi.Dept. zipeng tuan lai Pu Ngun Luai cun MP cuh a tum.Kei kha Falam party zung cun State level ( Mizoram ih MLA ) ding ah in recomend nan Rangoon central cun a kum  a nauhak tuk in ti ih in hnawl.Cumi cing ih independent ih ding                                                                                                                                                                                                                                          ding cu full time ka ngah lo ding ti ka thei.Cumi lai fang ah Relsing,Khuangli-Losau S.Dihai lam in state level ah Pu Ral Sai Lo feh seh ti an duh.

Hi khua  aiawh pawl cun kei cu in sut ih,state ( pine ) ih na duh ah cun nang mah kan lo bom ding ih Pu Ngun Luai kan bom lo ding,a si nan na duh lovi Pu Ral Sai Lo na ken ding cun Pu Ngun Luai MP ah kan bom ding in ti ih,Pu Ngun Luai rak bom uh ka ti.Pu Ngun luai hin a bial hmun dang  ih si cun bom tu a nei tha tawk nan kei mah ih Pu Ral Sai Lo ka ken nak hi a tlin thei nak ah a rung cang.Cu ti cu Burma ram pumpi ih BSPP party pi ih candidate si lovi candidate  rak thleng thei nak cu Burma ram MP bial 480 ah Falam West lawng a si.Himi thu hi kim zet in ni khat khat ah kan ngan leh ding.1974 hnu ah cun central ih MP candidate a tuah mi pawl cu ziang ti hman ih thleng thei lo ding in an run tuah law law.

Kei mah thung cu Myone ah  Tili le Tlangkhan in ka ding ih vote 99% ka ngah.A si  nan full time ding ih kan rak ruah mi kha ka pa in full time lo hmang a rak ti ih,a mah kha Falam party unit member a si,ka pa ih hmun khat ih i thawn ruang ah,part time ah ka tla fam teh.Ka lawng ti an theih khan Lumbang,Khuangli le Ram Thlo pawl in an school pawl ih headmaster ding in in sawm.Kei cun zo hman ka lo duhsak lo ding,i sawm hmaisa bik Khuangli ah ka feh ding ka ti ih,Sihhrual va suk le so feh cu hreh cing in nauhak lai ih si Lairam hrang ka tuan ding ka ti si ti ih tha pe aw  in Khaungli ah kum khat ka va um ih himi hnu cun Mizoram ah hna tuan hlawh aw ding in kan ram ka suah san.

College ka suhsan ve te ih ram hrang ih hna tuan ka tum cu ziang pipa tuan thei lovi mal te lai Lumbang,Khungli le Tlauhmun hrang ah cun ka tha hnem ah a cang.Tili leTlangkhan pawl tlun ah lungwi thu ka sim.

%d bloggers like this: